Beblia

	MBIVILIA ŨVOO MŨSEO AEVELANIA 11


Save Notes

1
Kwĩthĩwa na mũĩkĩĩo nĩ kwĩthĩwa na ũw'o ĩũlũ wa maũndũ ala twĩkwatasya, na kwĩtĩkĩla vyũ maũndũ matonekaa.

2
Nũndũ wa mũĩkĩĩo, atumĩa ma tene nĩmamwendeeisye Ngai.

3
Nũndũ wa mũĩkĩĩo, nĩtũmanyaa kana nthĩ yoombiwe nĩ Ngai kwa ndeto yake, na kwoou kĩla kyonekaa kyoombiwe kumana na kĩla kĩtonekaa.

4
Nũndũ wa mũĩkĩĩo, Aveli nĩwamumĩisye Ngai nthembo nzeo kũte Kaini. Kwondũ wa mũĩkĩĩo wake Ngai nĩwamũtwie kwĩthĩwa mũlũngalu na endeew'a nĩ nthembo yake. O na kau Aveli nĩwakwie, nũneena kwĩsĩla mũĩkĩĩonĩ wake.

5
Nũndũ wa mũĩkĩĩo, Enoko nĩwambatiw'e ĩtunĩ ndakakw'e. Vai mũndũ waamwona ĩngĩ, nĩkwĩthĩwa Ngai aĩ anamũtwaa ĩtunĩ. Maandĩko Matheu maasya mbee wa kwambatw'a ĩtunĩ nĩwamwendeeisye Ngai.

6
Vai mũndũ ũtonya kũmwendeesya Ngai ate na mũĩkĩĩo; mũndũ aimũthaitha no nginya akethĩwa na mũĩkĩĩo kana Ngai e kw'o, na kana nũmatuvaa andũ ala mamũmanthaa.

7
Nũndũ wa mũĩkĩĩo, Noa nĩweethukĩĩisye ũkany'o wa Ngai ĩũlũ wa maũndũ ma ĩvinda yookĩte mataĩ manamba kumĩla, na aaka ngalawa atangĩĩe mũsyĩ wake.

8
Nũndũ wa mũĩkĩĩo, Avalaamu nĩwamwĩwie Ngai yĩla wamwĩtie athi nthĩ ĩla wĩnengwa ĩtw'ĩke yake. Nĩwambĩĩie kyalo atesĩ ethi nakũ.

9
Nũndũ wa mũĩkĩĩo, nĩwatũie nthĩ ĩla wathĩtwe ta mũndũ wĩ ũeninĩ. Ekalaa maeemanĩ o ũndũ Isaka na Yakovo mekalile, ala o namo mathiwe nthĩ ĩsu.

10
Avalaamu ekalaa maeemanĩ nũndũ eeteelaa kwĩkala mũsyĩnĩ mũlũmu, ũla Ngai wambĩĩisye na awaka e we mwene.

11
Nũndũ wa mũĩkĩĩo, Sala nĩwanengiwe ũtonyi wa kũitava, o na kau nĩwathonokete myaka ya kũsyaa, we nĩweesĩ kana Ngai ũla wathanĩte ũu nĩ wa kũĩkĩĩwa.

12
Kwoou kuma kwa mũndũ ũmwe, ũla we mwene weanene na mũndũ mũkw'ũ, nĩkwasyaiwe nzyawa mbingĩ mũno syĩana ndata sya matunĩ, na itatalĩka ta kĩthangathĩ kya ũkanganĩ.

13
Andũ asu onthe makwie o maĩkĩĩe Ngai. Mayaakwata syĩndũ ila Ngai wamathĩte, ĩndĩ nĩmasyonie syĩ vaasa na maithokya, na nĩmaasya kana mo nĩ aeni na andũ mekalaa nthĩ ĩte yoo me kũũ nthĩ.

14
Andũ ala maneenaa mũthemba ũsu, monanasya nesa kana mo meĩkwatya kũkwata nthĩ yoo ene.

15
Mayasũanĩaa ĩũlũ wa nthĩ ĩla maumie; kethĩwa masũanĩaa ũu, methĩwa mamanthie ũndũ mekũsyoka.

16
Ĩndĩ mo mamanthaa nthĩ nzeo mbee, nayo nĩ nthĩ ya ĩtunĩ. Kwoou Ngai ndew'aa nthoni ayĩtwa Ngai woo, nĩkwĩthĩwa nũmaseũvĩsye mũsyĩ.

17
Nũndũ wa mũĩkĩĩo, Avalaamu nĩwaumisye mwana wake Isaka ta nthembo, yĩla Ngai wendie asisye ũndũ ũkwĩka. Avalaamu o ũsu wakwatĩte mawatho kuma kwa Ngai, nĩweeyũmbanĩtye kũthemba mwana wake ũla wasyaĩtwe e weka,

18
na Ngai nĩwamũtavĩtye akamwĩa atĩĩ, “No nzyawa sya Isaka iketwa nzyawa syaku.”

19
Avalaamu nĩweesĩ kana Ngai e na ũtonyi wa kũsyũkya mũndũ e mũkw'ũ, na kwa w'o nĩtũtonya kwasya kana Avalaamu akwatie Isaka ĩngĩ kuma kwa akw'ũ.

20
Nũndũ wa mũĩkĩĩo, Isaka nĩwaathimie Yakovo na Esaũ, nĩ kana mekwata ũathimo ũsu ĩvinda yũkĩte.

21
Nũndũ wa mũĩkĩĩo, Yakovo aikw'a nĩwaathimie syana sya Yosevu syĩ ilĩ, na nĩweetw'ĩĩkie na ndata yake amũthaitha Ngai.

22
Nũndũ wa mũĩkĩĩo, Yosevu aikw'a nĩwaneenie ĩũlũ wa ũndũ andũ ma Ĩsilaeli makauma Misili, na eeyĩaa ũndũ makekana na mwĩĩ wake.

23
Nũndũ wa mũĩkĩĩo, asyai ma Mwose nĩmamũvithie vandũ va myei ĩtatũ amina kũsyawa, nĩkwĩthĩwa moonie e kana kanake. Mayakĩaa mwĩao wa mũsumbĩ.

24
Nũndũ wa mũĩkĩĩo, Mwose amina kwĩana nĩwaleile ayĩtwa mwana wa mwĩĩtu wa mũsumbĩ.

25
Oonie nĩ kavaa kwake kũthĩnw'a vamwe na andũ ma Ngai, vandũ va kũtanĩa maũndũnĩ ma naĩ o kwa kavinda.

26
Nĩweesĩ kana kũthĩna kwondũ wa Klĩsto kũetae ũthwii mwingĩ kwĩ mothwii onthe ma nthĩ ya Misili, nĩkwĩthĩwa we eeteelete ĩtuvi yĩla yĩkoka ĩvinda yũkĩte.

27
Nũndũ wa mũĩkĩĩo, Mwose nĩwaumie Misili ateũkĩa ũthatu wa mũsumbĩ; nĩwaleile kũsyoka na ĩtina, nĩkwĩthĩwa ailyĩ ta mũndũ wamwonie Ngai ũla ũtonekaa.

28
Nũndũ wa mũĩkĩĩo, Mwose nĩwatanĩie Mboka ya Vasaka, na eeaĩa andũ mavake nthakame mĩomonĩ yoo, nĩ kana ũla mũlaĩka wa kũaa ndakoae makithathi ma ana ma Ĩsilaeli.

29
Nũndũ wa mũĩkĩĩo, andũ ma Ĩsilaeli nĩmesĩlile Ũkanganĩ Mũtune katĩ ta me nthĩ nyũmũ, ĩndĩ yĩla andũ ma Misili namo matatie kwĩsĩla vo, nĩmavw'ĩkiwe nĩ kĩw'ũ.

30
Kwondũ wa mũĩkĩĩo, ũkũta wa Yeliko nĩwavalũkile, ĩtina wa andũ ma Ĩsilaeli kũũthyũlũlũka vandũ va mĩthenya mũonza.

31
Nũndũ wa mũĩkĩĩo, Laavi ũla waĩ ĩlwaya ndaaũawa yĩla andũ ala maleile kũmwĩw'a Ngai mooaawa, nĩkwĩthĩwa we nĩwathokisye nesa ala andũ ma Ĩsilaeli matũmĩtwe kwa kĩmbithĩ makamanye ũndũ nthĩ ĩsu ĩilyĩ.

32
Nĩneena ũndũ ũngĩ mwaũ? Ndina ĩvinda yĩanu ya kũneena ĩũlũ wa Ngitioni, Mbalaka, Samusoni, Yevitha, Ndeviti, Samũeli na athani.

33
Kwondũ wa mũĩkĩĩo, andũ asu nĩmokitie na nthĩ ingĩ na maisinda, nĩmokitĩie ũw'o na nĩmakwataa kĩla Ngai wathanĩte. Nĩmavingie makanyw'a ma mĩnyambũ,

34
mavosya myaki mĩnene mũno, na mavinda maingĩ mavonoka kũawa na ũvyũ. O na kau maĩ onzu nĩmanengiwe vinya; nĩmeethĩiwe na vinya mwingĩ kaũnĩ na masinda asikalĩ ma nthĩ ingĩ.

35
Nũndũ wa mũĩkĩĩo, aka amwe nĩmasyũkĩiw'e andũ moo ala maĩ akw'ũ na mamatũngĩwa. Angĩ nĩmaleile kũthaw'a, namo mathĩnw'a mũno kũvika makw'a, nĩkwĩthĩwa mendaa methayũũkw'a na maikwata thayũ mũseo mbee.

36
Angĩ nĩmathekeeiwe na kũvũwa mũno, o na angĩ moovanw'a na nyololo na mavingĩwa yela.

37
Nĩmakimangawa na mavia, kana makatilanw'a na mũsumeno, kana makoawa na ũvyũ. Maendaa kĩla vandũ mekĩĩte ithuma sya mbũi kana sya malondu; mayaĩ kĩndũ na nĩmathĩnaw'a na kwĩkwa naĩ.

38
Nthĩ ndyaĩ mbaĩlu kwĩkalwa nĩ andũ ta asu; mekalaa weũnĩ na iĩmanĩ, na makomaa ngunganĩ na maimanĩ naku nthĩ.

39
Andũ asu onthe, o na kau nĩmakathawa kwondũ wa mũĩkĩĩo woo, mayaakwata kĩla Ngai wathanĩte,

40
nĩkwĩthĩwa Ngai nĩwavangĩte ũndũ ũseo mbee kwondũ witũ. Ndendaa asu matuwe eanĩu me oka ithyĩ tũte vo.


Kamba Bible 2011 BIBLE SOCIETY OF KENYA © 2011