Beblia

	MBIVILIA ŨVOO MŨSEO 1 VETELO 5


Save Notes

1
Nĩngũkũlya atumĩa ma ĩkanisa ala me katĩ wenyu, ta nĩ mũtumĩa ta mo, na ta nĩ ngũsĩ ya mathĩna ma Klĩsto, na ta nĩ ũmwe wa ala makakwata ũkumyo ũla ũkaumĩlw'a:

2
Ĩthĩwai aĩthi aseo ma ĩĩthya yĩla Ngai ũmũnengete, na kũyĩsũvĩaa kwĩanana na kwenda kwa Ngai, mwĩyumĩtye na mũtekũingĩĩw'a. Thũkũmaai mũtena ĩtomo ya kũtuvwa, ĩndĩ mwĩ na wendi wa kũthũkũma.

3
Mũikatũmĩĩe vinya ala me ungu wenyu, ĩndĩ ĩthĩawai mwĩ ngelekany'o nzeo kwoo.

4
Yĩla nake Mũĩthi ũla Mũnene wĩũka, akamũnenga ngovia ya kĩ-ũsumbĩ yĩna ũkumyo ũtakathela o na ĩndĩĩ.

5
O ta ũu andũ ma mũika ĩnyivĩsyei atumĩa. Kwa w'o inyw'onthe nĩmwaĩlĩte kwĩnyivanĩsya. Nũndũ Maandĩko Matheu maĩtye, “Ngai nũleanaa na andũ ala menenevasya, ĩndĩ nũnengae mumo andũ ala menyivasya.”

6
Kwoou ĩnyivyei mbee wa Ngai Mwene Ũtonyi W'onthe, nĩ kana emũnenevya ewe ĩvinda yake yĩla yaĩlĩte yavika.

7
Ekeai Ngai kwĩmakĩa kwenyu kw'onthe nũndũ nĩwe ũmũsũvĩaa.

8
Ĩkalaai mwĩyũmbanĩtye na mũsyaĩĩsye! Mũmaitha wenyu ũla nĩ Satani, angangaa kũũ na kũũ ta mũnyambũ ũũluluma aimantha mũndũ amine.

9
Mũsiĩĩei mwĩ alũmu mũĩkĩĩonĩ, nũndũ nĩmwĩsĩ kana aĩkĩĩi ala angĩ ĩũlũ wa nthĩ maendee na kũthĩna o tenyu.

10
Ĩndĩ ĩtina wa kũthĩna kwa kavinda kanini, Ngai ũla ũnenganae mumo mwingĩ, na ũla ũmwĩtĩte mwĩthĩwe na ũkumyo wake wa tene na tene kwa kũmũĩkĩĩa Klĩsto, akamũtw'a ethĩanu amũlũlũmĩĩlye, na kũmũnenga vinya na kũmwĩkalya mũtathingithw'a nĩ kĩndũ.

11
Kwa Ngai nĩkwĩthĩwe ũtonyi tene na tene! Ameni.

12
Namũandĩkĩa valũa ĩno nguvĩ ngĩtetheew'a nĩ Sila, ũla nĩmwosaa ta Mũklĩsto mũĩkĩĩku. Nĩenda kũmũthangaasya na kũmũnenga ũkũsĩ kana maũndũ asu onthe maumanĩte na mumo wa w'o wa Ngai. Ĩkalaai na ũlũmu mumonĩ ũsu.

13
Aĩkĩĩi ma Mbavilonĩ ala manyuvĩtwe nĩ Ngai o tenyu nĩmamũkethya; Maliko mwana wakwa o nake nĩwamũkethya.

14
Kethanasyai na ngethi ya wendo wa Kĩ-klĩsto. Mũuo nĩwĩthĩwe nenyu inyw'onthe ala mũĩkĩĩaa Klĩsto.


Kamba Bible 2011 BIBLE SOCIETY OF KENYA © 2011