Beblia

	YUTA 1


Save Notes

1
Kuma vala nĩĩ nyie Yuta mũthũkũmi wa Yesũ Klĩsto na mwana-a-inyia wa Yakovo, valũa ũũ wakwa nĩ kwenyu inyw'ĩ ala mwĩtĩtwe nĩ Ngai, na mwĩkalaa nthĩnĩ wa wendo wa Ngai Asa, na mwĩ ũsũvĩonĩ wa Yesũ Klĩsto.

2
Tei, mũuo na wendo nĩsyĩthĩwe nenyu kwa wingĩ.

3
Endwa makwa, o na kau nĩnaĩ na mea mũno ma kũmũandĩkĩa ĩũlũ wa ũtangĩĩo ũla ithyonthe twĩ naw'o, nĩnonie ve vata wa kũmũandĩkĩa nĩmũthangaasye, nĩ kana mũendee na kwĩsũvĩa mũikaw'e mũĩkĩĩonĩ ũla Ngai wanengie aĩkĩĩi ĩvinda o yĩmwe tũ.

4
Nũndũ andũ amwe ala ũsilĩlo woo nĩwatwiwe kuma tene, nĩmelikĩtye katĩ wenyu mevithĩte. Andũ asu mai na kĩkĩo kya Ngai, na nĩmatusaa mumo wa Ngai waitũ ta kĩndũ kya kũmanenga mwanya wa kwĩkaa molaalai, na makamũlea Yesũ Klĩsto ũla nĩwe e weka Mũnene na Mwĩai waitũ.

5
O na kau nĩmwĩsĩ maũndũ aa, nĩenda kũmũlilikany'a ũndũ Mwĩai watangĩĩie andũ make kuma nthĩ ya Misili, ĩndĩ ĩtina aananga ala matamũĩkĩĩaa.

6
Na lilikanai ĩũlũ wa ala alaĩka maleile kũsũvĩa wĩa ũla manengetwe nĩ Ngai, na matia wĩkalo woo ũla wamaĩlĩte: Ngai nũmovete vandũ kĩvindunĩ na nyololo syake itatw'ĩka o na ĩndĩĩ, meteeletw'e Mũthenya Mũnene wa ũsilĩlo masilĩlwe.

7
Lilikanai ũndũ andũ ma Sondomu na Ngomola, na ma ndũa ila ingĩ syaĩ vakuvĩ meekie ta alaĩka asu, na malika molaalainĩ na kũmanyana kĩ-mwĩĩ aũme kwa aũme na aka kwa aka. Nĩmavĩviw'e na mwaki wa tene na tene, nĩ kana methĩwe ta ũkany'o kwa andũ ala angĩ onthe.

8
Andũ ma mũthemba ũsu maotaa ndoto itumaa meka maũndũ ma kũvukya mĩĩ yoo, na kũleana na ũkũmũ wa Ngai na kũumanga syũmbe ila ikumaw'a na syĩkalaa ĩtunĩ.

9
O na Mikaeli mũlaĩka ũla mũnene, ndaaĩthĩwa na kĩvũthya kĩu yĩla waneenanasya na Satani ĩũlũ wa ũla ũkũthika mwĩĩ wa Mwose, ĩndĩ eekie kũmwĩa, “Mwĩai nĩakũkany'e!”

10
Ĩndĩ andũ asu nĩmaumangaa syĩndũ syonthe o na ila matesĩ; manangawa nĩ syĩndũ ila mamanyaa mateũtũmĩa kĩlĩko, o tondũ nyamũ sya kĩthekanĩ imanyaa.

11
Kyeva nĩ kwoo, nĩkwĩthĩwa mwĩkalo woo ũilyĩ ta ũla wa Kaini. Kwondũ wa kwenda mbesa kwoo, nĩmenenganĩte na kũlika ĩvĩtyonĩ ta yĩla Mbalaamu weekie. Nĩmatw'ĩkĩte mbaa matũ o tondũ Kola wailyĩ, namo makaanangwa o take.

12
Andũ ma mũthemba ũsu nĩmeũmwanangĩa ĩsyĩtwa, yĩla mekwĩtanĩthya mo ene mate na nthoni, yĩla mũkũĩsanĩa mbokanĩ sya ngwatanĩo ya wendo. Wĩa woo nĩ kwĩthĩnĩkĩa mo ene. Mailyĩ ta matu matauma mbua makuĩtwe nĩ kĩseve, mailyĩ ta mĩtunda ĩtasyaa o na ĩvinda ya yo ya kũsyaa yavika; mo nĩ ta mĩtĩ yakũiwe tene na yooma vyũ.

13
O ta ũu mailyĩ ta itulumo nthũku sya ũkanga, na meko moo me nthoni nĩ ta ĩvũyũ yĩla yumanaa na itulumo isu yĩtavithĩka. Andũ asu mailyĩ ta ndata ila itw'ĩkaa na kwambĩĩa kwanganga. Ngai nũmeteeletye ũsilĩlo wa kĩvindu kya thĩna wa tene na tene.

14
Andũ aa nĩmo ala Enoko, ũla waĩ wa nzyawa ya mũonza kuma vala ve Atamu wathanie ĩũlũ woo asya, “Ĩthukĩĩsyei! Mwĩai nĩwũkĩte e na ngili mbingĩ sya alaĩka atheu,

15
kũmasilĩla aa onthe na ala angĩ mate na kĩkĩo kya Ngai, nũndũ wa meko moo mathũku na ndeto syoo nthũku ila maneenie mateũmũkĩa Ngai!”

16
Amanyĩsya aa ma ũvũngũ wĩa woo nĩ kũnyungunyĩsya na kũlea kwĩanĩwa, na mekalaa thayũ wa kũtongoew'a nĩ mawendi ma mwĩĩ. Mekathĩĩaa mo ene na kũneena ndeto sya kwendeesya andũ, nĩ kana makwate kĩla mekwenda kuma kũla kwĩ andũ.

17
Endwa makwa, lilikanai maũndũ ala mwataviw'e navu mbeenĩ nĩ atũmwa ma Mwĩai waitũ Yesũ Klĩsto.

18
Nĩmamwĩie atĩĩ, “Ĩvindanĩ ya mũminũkĩlyo kũkeethĩwa andũ me kĩvũthya, na matongoeaw'a nĩ mawendi mataendanĩtye na kwenda kwa Ngai.”

19
Andũ asu nĩmo matumaa kwĩthĩwa ũtilĩkangano katĩ wa andũ; matongoeaw'a nĩ wendi wa maũndũ ma nthĩ, na maitongoeaw'a nĩ Veva.

20
Ĩndĩ inyw'ĩ endwa makwa, endeeai na kwongeleka vinya nthĩnĩ wa mũĩkĩĩo wenyu ũla mũtheu mũno, na kũvoyaa mũtongoew'e nĩ Veva Mũtheu.

21
Ĩkalaai mwĩ na wendo wa Ngai, mweteelete Mwĩai waitũ Yesũ Klĩsto, ũla teinĩ wake wĩmũnenga thayũ wa tene na tene.

22
Mew'ĩei tei ala me na nzika.

23
Tangĩĩai amwe kwa kũmavulya kuma mwakinĩ, na angĩ mew'ĩei tei mwĩsũvĩĩte na kũmena kũvukw'a nĩ mothũku moo.

24
Kwake we ũla ũtonya kũmũsũvĩa mũikalike naĩnĩ, na kũmwĩkalya mwĩ atheu na kũmũlikya ũkumyonĩ wake mwĩ na atanu mwingĩ,

25
kwa ũsu ũla nowe weka Ngai na Mũtangĩĩi kwĩsĩla vala ve Yesũ Klĩsto Mwĩai waitũ, nĩkwĩthĩwe ũkumyo, ũnene, ũsumbĩko na ũtonyi kuma tene, na yu na kũvika tene na tene! Ameni.


Kamba Bible 2011 BIBLE SOCIETY OF KENYA © 2011