Beblia

	MBIVILIA ŨVOO MŨSEO ŨVUAN’YO 1


Save Notes

1
Ĩvuku yĩĩ yĩandĩkĩtwe maũndũ ala Yesũ Klĩsto wavuanisye. Ngai amũnengie Yesũ Klĩsto maũndũ aa nĩ kana ony'e athũkũmi make kĩla kĩtatĩa kwĩkĩka mĩtũkĩ. Klĩsto nĩwamanyĩthisye mũthũkũmi wake Yoana maũndũ aa kwa kũtũma mũlaĩka kwake,

2
nake Yoana atavany'a maũndũ onthe ala woonie. Ii nĩsyo ndeto syake ĩũlũ wa ũtũmani kuma kwa Ngai, na ũw'o ũla Yesũ Klĩsto wavuanisye.

3
Nĩ mũathime ũla ũsomaa ĩvuku yĩĩ, na o ta ũu nĩ aathime ala methukĩĩasya ũtũmani wa wathani ũũ, na kwĩkaa ũndũ ndeto ila iandĩkĩtwe ĩvukunĩ yĩĩ ikwasya, nũndũ ĩvinda ya kwĩkĩka kwa maũndũ aa nĩ ĩthengeeu.

4
Kuma vala nĩĩ nyie Yoana, kwenyu inyw'ĩ makanisa mũonza ma Asia: Mumo na mũuo nĩsyĩthĩwe nenyu kuma kwa Ngai ũla wĩvo, ũla waĩ vo na ũla ũkethĩwa, na kuma kwa maveva mũonza ala me mbee wa kĩvĩla kyake kya kĩ-ũsumbĩ,

5
na kuma kwa Yesũ Klĩsto, ngũsĩ ya kũĩkĩĩwa, ũla nĩwe wa mbee kũthayũũka kuma kwa akw'ũ, na mũnene wa asumbĩ onthe ma nthĩ. Klĩsto nũtwendete, na nĩwatũthaisye kuma naĩnĩ sitũ na nthakame yake,

6
na atũtw'ĩkĩthya athembi ma kĩ-ũsumbĩ tũthũkũmae Ngai Ĩthe wake. Kwake nĩkwĩthĩwe ũkumyo na ũtonyi tene na tene! Ameni.

7
Sisyai! Okĩte e mathweonĩ ĩũlũ! Kĩla ũmwe akamwona, o vamwe na ala mamũtonyie. Andũ onthe ĩũlũ wa nthĩ makaĩa nũndũ wake. Ĩĩ nĩkwĩthĩwe ũu!

8
Mwĩai Ngai Mwene Ũtonyi W'onthe, ũla wĩ vo, ũla waĩ vo na ũla ũkethĩwa vo easya atĩĩ, “Nyie ninyie wa mbee na wa mũthya.”

9
Nyie Yoana mwana-a-asa wenyu na mũatĩĩi wa Yesũ, nĩ vamwe nenyu nthĩnĩ wa kũmĩĩsya mathĩna ala mokaa kwa ala ma ũsumbĩ wake. Naĩ kĩthamanĩ kĩtawa Vatimo, nũndũ nĩnatavanĩtye ndeto ya Ngai na ũw'o ũla Yesũ Klĩsto wavuanisye.

10
Mũthenyanĩ wa Mwĩai, Veva Mũtheu nĩwoosie ũtongoi ĩũlũ wakwa, na neew'a wasya mũnene ũilyĩ ta wa soo ũineena ĩtina wakwa.

11
Nĩwaisye atĩĩ, “Andĩka vandũ ĩvukunĩ kĩla ũkwona, na ũitwaa ĩvuku yĩu kwa makanisa ma ndũa ii mũonza: Eveso, Simĩlina, Velikamamu, Thiatila, Salindisi, Vilandevia na Laondisia.”

12
Nĩnathyũũkie none ũsu waneenaa nakwa, na noona syĩndũ mũonza sya thaavu sya kwilĩĩla taa,

13
na katĩ wasyo vaĩ kĩndũ kyailyĩ ta mũndũ weekĩĩte ngũa ndaasa yavikĩte nyaĩĩnĩ, na akeyova mũsivi wa thaavu kĩthũinĩ.

14
Nzw'ĩĩ syake syaĩ nzaũ ta vamba kana ĩa, namo metho make makenaa ta kyeni kya mwaki;

15
nyaĩĩ syake syatisaa ta kyũma kĩtawa mbulonzi kyumĩtw'e mwakinĩ mũvyũ mũno na kĩkakutwa. Wasya wake weew'ĩkaa ta wa kĩw'ũ kingĩ kĩtheete.

16
Aĩ na ndata mũonza kw'okonĩ kwake kwa aũme, na ũvyũ mũĩ ngalĩko syelĩ nĩwaumaa kanyw'anĩ wake aineena. Ũthyũ wake nĩwatisatisaa ta syũa mũthenya katĩ.

17
Yĩla namwonie oou, nĩnavalũkile nthĩ vakuvĩ na maũũ make ta mũndũ mũkw'ũ. Nĩwambilĩĩile kw'oko kwake kwa aũme na asya atĩĩ, “Eka kũkĩa! Ninyie wa mbee na wa mũthya.

18
Ninyie ũla wĩ thayũ! Naĩ mũkw'ũ, ĩndĩ yu nĩ thayũ tene na tene. Nĩna mbungũo sya kĩkw'ũ na sya vala maveva ma ala akw'ũ mekalaa.

19
Yu andĩka maũndũ ala woona, ala maendee, na ala meĩkĩka ĩtina.

20
Ũũ nĩw'o ũelesyo wa kĩmbithĩ kya ila ndata mũonza wonie syĩ kw'okonĩ kwakwa kwa aũme, na ila syĩndũ mũonza sya thaavu sya kwilĩĩla mataa: Ndata isu mũonza nĩ alaĩka ma makanisa mũonza, nasyo syĩndũ isu mũonza sya thaavu sya kwilĩĩla mataa nĩ makanisa mũonza.


Kamba Bible 2011 BIBLE SOCIETY OF KENYA © 2011