Beblia

	Krio Fɔs Oli Baybul Job 1


Save Notes

1
Wan man bin de we nem Job, ɛn i bin tap na Ɔz. Job na bin gud man ɛn i bin de waka tret wit PAPA GƆD. In fred ɛn rɛspɛkt fɔ PAPA GƆD, ɛn in layf nɔ bin gɛt wan bɔt.

2
I bin bɔn sɛvin bɔypikin ɛn tri gyal pikin.

3
I bin gɛt sɛvin tawzin ship, tri tawzin kamɛl, wan tawzin man kaw we i kin yuz fɔ wok na fam, ɛn fayv ɔndrɛd uman dɔŋki wit bɔku bɔku wokman dɛn, so dat nɔbɔdi nɔ bin de we tap na di ist, we jɛntri pas am.

4
In bɔypikin dɛn kin mek pati na dɛn difrɛn os dɛn bay tɔn; ɛn dɛn kin kɔl dɛn tri sista fɔ go it ɛn drink wit dɛn.

5
Ɛvri mɔnin afta di pati kin dɔn, Job kin mek shɔ se i sɛn go was dɛn; spɛshal was fɔ mek shɔ se dɛn klin na PAPA GƆD yay; i kin grap ali mɔnin mek bɔn ɔfrin fɔseka dɛn ɔl. I kin tink se sɔntɛm we dɛn de na di pati, dɛn dɔn du ɔ se sɔntin we go dɔn mek PAPA GƆD vɛks pan dɛn. Na so Job bin de du ɔltɛm.

6
Wande, we PAPA GƆD in pikin dɛn go sho dɛnsɛf to am, Setan sɛf bin de de.

7
PAPA GƆD aks Setan se, usay i kɔmɔt. I tɛl PAPA GƆD se in bin jɛs de waka ɔp ɛn dɔŋ de paspas na wɔl.

8
PAPA GƆD aks am if i dɔn tink bɔt Job we nain wokman. PAPA GƆD tɛl Setan se nɔbɔdi nɔ de na wɔl lɛk Job bikɔs na gud man ɛn i de waka tret wit am. I fred ɛn rɛspɛkt in PAPA GƆD ɛn nɔ miks pan bad.

9
Nain Setan ansa PAPA GƆD se, nɔto fɔ natin mek Job tan aw i tan.

10
I se PAPA GƆD dɔn mek i nɔ ebul du in, in famili ɛn ɔl wetin i gɛt natin. I se PAPA GƆD dɔn mek bɛtɛ de fala Job pan ɔl wetin i de du ɛn dɔn gi am animal dɛn ɔlɔbɔt na di land.

11
Setan se, if PAPA GƆD go jɛs tret in an ɛn tek ɔl wetin i bin dɔn gi Job, i go mɔs tɔk bad bɔt am bifo in fes.

12
So PAPA GƆD tɛl Setan se, i de lɛf Job gi am mek i nyakanyaka ɔl wetin Job gɛt, bɔt mek i nɔ mek natin du insɛf. So Setan jɛs kɔmɔt bifo PAPA GƆD.

13
Wande, we Job in pikin dɛn bin de it ɛn drink na di brɔda we big pas dɛn ɔl in os,

14
wan mɛsenja rɔn kam tɛl Job se, we di man kaw we i kin yuz fɔ wok na fam de dig di grɔn fɔ plant ɛn di uman dɔŋki dɛn de de de it,

15
sɔm tifman dɛn we na Sabian dɛn, atak dɛn ɛn tif ɔltin go; dɛn kil ɔl di wokman dɛn na di fil pas in wangren we ebul rɔnawe fɔ kam tɛl am.

16
I nɔ tɔk di tɔk dɔn, nain wan ɔda mɛsenja kam tɛl Job se, laytin flash ɛn kil ɔl di ship dɛn ɛn di man dɛn we de luk dɛn; bɔt nain wangren ebul rɔnawe kam tɛl an.

17
Insɛf nɔ tɔk di tɔk dɔn nain wan ɔda mɛsenja kam tɛl Job se, tri grup tifman dɛn we na di kiŋ in advaysa dɛn, bɔs pan di kamɛl dɛn, tek dɛn ɔl go, ɛn kil ɔl di wokman dɛn, pas in wangren we ebul rɔnawe kam tɛl am.

18
Insɛf nɔ tɔk di tɔk dɔn nain wan ɔda mɛsenja kam tɛl Job se, Job in pikin dɛn bin de it ɛn drink na di brɔda we big pas dɛn ɔl in os;

19
na de big big tinada bigin blo te i ib di os dɔŋ pan dɛn ɔl ɛn dɛn day, pas in wangren we ebul rɔnawe kam tɛl am.

20
Wɛn Job dɔn lisin to ɔl wetin dɛn gɛt fɔ se, i grap, chɛr in klos, krep in ed, nildɔŋ wit in ed na grɔn ɛn wɔship PAPA GƆD.

21
I se, ‘we a bɔn, a nɔ kam wit natin, semweso we a day, a nɔ gɛt fɔ kɛr natin go; na PAPA GƆD gi mi ɔl wetin a gɛt ɛn na PAPA GƆD dɔn tek dɛn na mi an bak; mek ɔlman prez in nem.’

22
Pan ɔl wetin bi, Job nɔ sin ɛn i nɔ blem PAPA GƆD.


Krio Fɔs Oli Baybul Krio Bible © The Bible Society of Sierra Leone, 2013