Beblia

	Krio Fɔs Oli Baybul Sam 106


Save Notes

1
Una mek wi prez PAPA GƆD! Tɛl PAPA GƆD tɛnki bikɔs na gud PAPA GƆD; in lɔv fɔ mɔtalman nɔ de ɛva chenj.

2
Nɔbɔdi nɔ go ebul tɔk bɔt ɔl wetin PAPA GƆD de du; nɔbɔdi nɔ go ɛva prez PAPA GƆD aw i fɔ prez am.

3
I go fayn fɔ dɛn wan dɛn we de fɛt fɔ wetin rayt, ɛn we de du wetin rayt ɔltɛm.

4
PAPA GƆD, mɛmba mi we rɛdi fɔ du gud to yu pipul, nɔ fɔgɛt mi we yu de sev dɛn,

5
lɛ misɛf go ɛnjɔy pan di bɛtɛ we de fala di pipul we yu dɔn pik, so dat misɛf go jɔyn di neshɔn fɔ gladi ɛn di pipul we na yu yon fɔ prez yu.

6
Wi, lɛkɛ wi fɔstɛm pipul dɔn du bad; wi riali dɔn rɔŋ yu ɛn wi gilti.

7
Wɛn wi pipul bin de Ijipt, dɛn nɔ bin de tink sɛf bɔt yu mirekul dɛn; dɛn nɔ mɛmba ɔl di gud tin dɛn we yu dɔn du, ɛn dɛn barɔf we dɛn rich, di Rɛd Si.

8
Pan ɔl dat, PAPA GƆD sev dɛn bikɔs i nɔ wan pwɛl in gud nem, i wan mek ɔlman no se i gɛt pawa fɔ du ɔlkayn tin.

9
I gi ɔda to di Rɛd Si ɛn i dray wantɛm; dɔn i lɛ in pipul pas midul sote dɛn rich dray grɔn.

10
I pul dɛn kɔmɔt na dɛn ɛnimi dɛn an.

11
Dɛn ɛnimi dɛn drawn; wan pan dɛn nɔ lɛf fɔ tɛl di stori.

12
Dat mek di Izrɛlayt dɛn biliv wetin PAPA GƆD bin dɔn se i go du ɛn dɛn bigin siŋ fɔ prez am.

13
Bɔt i nɔ te sɛf, dɛn fɔgɛt bɔt wetin i dɔn du ɛn nɔ bɔda wet fɔ PAPA GƆD fɔ tɛl dɛn wetin fɔ du.

14
Na di ɛmti land we pɔsin nɔ go ebul tap, na de dɛn bigin aŋri fɔ it ɔda tin dɛn; na de dɛn chalenj PAPA GƆD.

15
So insɛf gi dɛn wetin dɛn aks fɔ, bɔt i mek i bɔn dɛn mɔt.

16
We dɛn de na kamp dɛn bigin jɛlɔs Mozis ɛn Erɔn we PAPA GƆD pik fɔ sav am.

17
Di grɔn opin ɛn swɛla Detan; dɔn i swɛla ɔl udat jɔyn gɛŋ wit Abiram.

18
PAPA GƆD sɛn faya kam dɔŋ we bɔn dɛn ɛn bɔn ɔl di bad wan dɛn.

19
We dɛn bin de na Mawnt Ɔrɛb, dɛn mek wan pikin kaw wit ayɛn ɛn bigin wɔship am.

20
Dɛn lɛf fɔ wɔship dis wɔndaful PAPA GƆD ɛn bigin wɔship di tin we dɛn mek lɛkɛ man kaw we na gras i de it.

21
Dɛn fɔgɛt aw PAPA GƆD dɔn sev dɛn, dɛn fɔgɛt ɔl di wɔndaful tin dɛn we i du na Ijipt,

22
di mirekul dɛn na Ijipt ɛn di tin we i du na di Rɛd Si we du fɔ mek pɔsin fred am.

23
So i se if nɔto we Mozis, di man we i bin dɔn pik, beg fɔ dɛn, lɛk i de dɔnawe wit dɛn. Na Mozis tap am nɔ fɔ kil dɛn ɔl we i vɛks.

24
Dat nɔ dɔn, dɛn nɔ gri go insay di land we i prɔmis se go bi dɛn yon; dɛn nɔ biliv wetin i se.

25
Dɛn grɔmbul bɔku usay dɛn de ɛn nɔ gri fɔ du wetin PAPA GƆD se.

26
We dɛn pasmak, i swɛ se i mɔs mek dɛn day na di ɛmti land we pɔsin nɔ go ebul tap.

27
I go mek ɔda neshɔn dɛn kil dɛn dɔn udat nɔ day, i go skata dɛn jɛnareshɔn dɛn ɔlɔbɔt.

28
Dɛn put waala pan dɛnsɛf we dɛn grap go jɔyn di pegan dɛn gɔd Beal na Piɔ ɛn it di sakrifays it dɛn we dɛn de pul to dɛn gɔd dɛn we nɔ gɛt layf;

29
dɛn provok PAPA GƆD te i vɛks wit ɔl di bad, bad tin dɛn we dɛn de du so insɛf sɛn bad sik pan dɛn.

30
Bɔt we Finɛas du wetin fɔ mek PAPA GƆD in at kol, i lɛ di sik lɛf fɔ kil dɛn.

31
Pipul go de mɛmba dis tin ya we Finɛas du sote go.

32
We dɛn rich Mɛriba brij bak, dɛn mek PAPA GƆD vɛks, ɛn na dat mek Mozis gɛt in yon waala;

33
dɛn barɔf sɔm kayn barɔf, we mek Mozis vɛks ɛn tɔk wetin i nɔ fɔ tɔk.

34
Dɛn nɔ gri fɔ dɔnawe wit di ɔda pipul lɛk aw PAPA GƆD se,

35
bifo dat, dɛn miks fɔ du ɔlkayn tin wit dɛn sote dɛn bigin du ɔl wetin dɛn de du.

36
Dɛn wɔship dɛn tin dɛn we dɛn mek fɔ pre to, we kam tɔn bon na dɛn trot.

37
Dɛn pul dɛn bɔypikin dɛn sara ɛn gi dɛn gyal pikin dɛn to dɛbul.

38
Dɛn shɛd dɛn bɔypikin ɛn gyal pikin dɛn blɔd fɔ natin, we dɛn tek dɛn pul sara to dɛn tin we dɛn mek fɔ pre to na Kenan; dɛn mek di ples nɔ fit fɔ mek pɔsin wɔship PAPA GƆD de bikɔs ɔf di blɔd dɛn we wes.

39
Dɛn nɔnsɛns dɛnsɛf bay wetin dɛn du, dat mek dɛn biev lɛk rare gyal.

40
Dis mek PAPA GƆD vɛks pan in pipul ɛn nɔ want fɔ gɛt natin fɔ du wit dɛn.

41
I lɛf dɛn gi ɔda neshɔn dɛn ɛn lɛ dɛn ɛnimi dɛn mek bɔs pan dɛn.

42
PAPA GƆD mek di ɛnimi dɛn yuz dɛn pawa fɔ pas am pan dɛn.

43
PAPA GƆD bin dɔn de sev dɛn, bɔt dɛn bin dɔn min fɔ mek rebɛl pan PAPA GƆD ɛn pwɛl dɛnsɛf bikɔs ɔf sin.

44
Bɔt we dɛn pre ɛn kɔmplen i yɛri dɛn ɛn ansa dɛn prea;

45
bikɔs i wan ɛp dɛn, i mɛmba wetin i bin se nain Kɔvinant, ɛn bikɔs in lɔv nɔ de chenj, i chenj in maynd.

46
I mek ɔl udat bin dɔn kapchɔ dɛn sɔri fɔ dɛn.

47
E PAPA GƆD wi PAPA GƆD, kɛr wi go bak usay wi fɔ de so dat we go tɛl yu tɛnki ɛn blɔf we wi de prez yu oli nem.

48
Una lɛ wi prez PAPA GƆD, di waŋren PAPA GƆD we Izrɛl gɛt in na di PAPA GƆD we go de sote go. Mek ɔlman ansa se “Emɛn.” Una lɛ wi prez PAPA GƆD!


Krio Fɔs Oli Baybul Krio Bible © The Bible Society of Sierra Leone, 2013