Beblia

	Krio Fɔs Oli Baybul Prɔvabs 17


Save Notes

1
I bɛtɛ lɛ yu it dray bred wit kolat pas fɔ de it am ɛn bekin wit dombolo.

2
Wokman we gɛt sɛns go gɛt pawa nain masta in os pas in masta in pikin we de put in dadi pan shem, ɛn na semweso di wokman go gɛt pan di prɔpati lɛk se in na wan pan di masta in pikin dɛn.

3
Lɛkɛ aw dɛn de yuz faya fɔ tɛst gold ɛn silva if dɛn piɔ, na so PAPA GƆD de tɛst pɔsin in at.

4
Bad pɔsin lɛk fɔ lisin to koŋosa tɔk, layman lɛk fɔ lisin to udat de pwɛl in kɔmpin.

5
Udat provok poman nɔ rɛspɛkt PAPA GƆD we mek am ɛn yu gladi wɛn trɔbul mit in kɔmpin nɔ de go skɔchfri.

6
Lɛkɛ aw grampa de gladi fɔ si grampikin, na so pikin dɛnsɛf de gladi fɔ dɛn mami ɛn dadi.

7
Gud wɔd nɔ de kɔmɔt na fulman mɔt, na so pɔsin we gɛt rɛspɛkt nɔ de lay.

8
Brayb kin ple wɔnda lɛkɛ majik to di pɔsin we de gi am; ɛnisay we i brayb in biznɛs de klia.

9
If yu want lɛ pipul lɛk yu, na fɔ fɔgiv dɛn; bɔt if yu tɔk tumɔs bɔt di bad we dɛn du, una padi go skata.

10
Pɔsin we gɛt sɛns wɛn dɛn kɔrɛkt am de lan mɔ, bɔt i lɛk yu bit fulman wan ɔndrɛd tɛm na fɔ natin.

11
Bad pɔsin lɛk fɔ biev lɛk rebɛl ɔltɛm, bɔt i mɔs mit ɔp in machis.

12
I bɛtɛ fɔ lɛ pɔsin mit ɔp wit wayl animal we dɔn lɔs in pikin, pas fɔ de wit fulman we nɔ no se i ful.

13
If yu du ɛnibɔdi bad we dɔn du yu gud, trɔbul nɔ go ɛva kɔmɔt biɛn yu.

14
Plaba kin bigin lɛkɛ we wata de lik, so na fɔ tap am bifo i prɛd.

15
Tu tin we PAPA GƆD et bad bad, na fɔ lɛ udat we de jɔj kes fri udat gilti, ɛn sɛntɛns udat nɔ gilti.

16
Wetin fɔ mek fulman go pe fɔ lɛ dɛn tich am, we i no se go ɔp kan dɔŋ, in na fulumunku?

17
If padi dɛn de sho lɔv ɔltɛm, wetin fɔ mek blɔd brɔda dɛn nɔ ɛp dɛn kɔmpin pan prɔblɛm?

18
Na man we nɔ gɛt sɛns de tinap as garantɔ ɛn se in go pe ɔda pɔsin in dɛt.

19
Udat lɛk fɔ de ambɔgin lɛk plaba; if yu yams wayt na fɔ kɔba am.

20
Pɔsin we gɛt bad at nɔ de bɛtɛ, ɛn na so layman de de pan trɔbul ɔltɛm.

21
Pikin we ful, na disgres to in papa, i nɔ de mek in at swit atɔl.

22
Wɛn yu at layt yu de gɛt wɛlbɔdi, bɔt if yu at pwɛl, ɔltɛm yu sik.

23
Bad pɔsin de ayd tek brayb fɔ lɛ i nɔ go du tiŋs di rayt we.

24
Udat gɛt sɛns de tink bɔt bɛtɛ tin, bɔt yu nɔ gɛt sɛns gɛt skatabren.

25
Pikin we ful na disgres to in papa, i kin mek in mami sɔri ɔltɛm.

26
Aw i nɔ fayn fɔ pɔnish inosɛnt pɔsin, na so i nɔ fayn fɔ bit bigman.

27
Udat gɛt sɛns nɔ de tɔk bɔku, semweso udat ebul kɔntrol insɛf, gɛt sɛns;

28
Afta ɔl fulman sɛf wɛn i nɔ tɔk bɔku, dɛn de fil se i gɛt sɛns; wɛn i lɔk in mɔt, dɛn kin se i no wetin i de pan.


Krio Fɔs Oli Baybul Krio Bible © The Bible Society of Sierra Leone, 2013