Beblia

	Krio Fɔs Oli Baybul Ɛfisɔs 4


Save Notes

1
Mi, Pɔl, we dɛn jel bikɔs a de wok fɔ di Masta, de beg una fɔ mek una liv ɛn du wetin Gɔd tɛl una fɔ du.

2
Una nɔ fɔ lif unasɛf ɔp ɛn una fɔ de bia wit una kɔmpin fɔ sho se una lɛk dɛn.

3
Una fɔ tray ɔltɛm fɔ mek di wanwɔd we Gɔd in Spirit de gi, nɔ dɔn, so dat una nɔ go de mek plaba wit una kɔmpin.

4
Wi ɔl na wan bɔdi, wi gɛt di sem Spirit lɛkɛ aw Gɔd kɔl wi fɔ abop pan di sem pɔsin.

5
Wi ɔl blant wan Masta, wi ɔl biliv pan di sem pɔsin, wi ɔl baptayz wan,

6
na wan Gɔd we na wi Papa we de rul wi ɔl, de wok insay wi ɔl ɛn de insay wi.

7
Krays dɔn mek wi ɔl sabi fɔ du difrɛn, difrɛn wok.

8
Na dat mek dɛn rayt bɔt Krays na Gɔd in Buk se, “Wɛn i go ɔp ɔp, i kɛr dɛn wan we i win, go; ɛn i gi mɔtalman ɔl wetin i want gi dɛn.”

9
Wetin wi min wɛn wi se “I go ɔp ɔp?” Dat min se i bin dɔn kam dɔŋ na wɔl fɔs.

10
Di pɔsin we bin kam dɔŋ na wɔl, na di sem pɔsin we pas di klawd go ɔp na ɛvin, so dat i go de ɔlɔbɔt.

11
Nain bin mek wi sabi fɔ du difrɛn difrɛn wok. Sɔm pan di wok dɛn we i gi wi fɔ du na dɛn dɛn wan ya: I mek sɔm pan wi bi apɔsul; sɔm bi prɔfɛt; sɔm bi ivanjɛlist, dat na dɛn pipul we de tɛl ɔda pipul di Gud Nyuz bɔt Jizɔs Krays; sɔm bi pastɔ; ɛn sɔm bi ticha.

12
I du ɔl dis fɔ mek Gɔd in pipul dɛn rɛdi ɛn ebul fɔ du dɛn wok, so dat dɛn go bil Krays in bɔdi we na di chɔch.

13
So wi ɔl go gɛt wanwɔd pan wetin wi biliv ɛn wetin wi no bɔt Gɔd in Pikin, ɛn wi go tink lɛkɛ bigman bɔt aw Krays tan ɛn Krays go de insay wi gud.

14
Da tɛm de wi nɔ go liv lɛkɛ pikin we kin chenj wetin dɛn biliv wɛn dɛn yɛri nyu tin, ɔ wɛn pɔsin mek dɛn ful.

15
If wi lɛk pipul ɛn wi de tek tɛm fɔ tɛl dɛn wetin tru, ɔl wetin wi de du go bi wetin Krays want. Krays na wi edman.

16
Na Krays mek ɔl dɛn difrɛn pat pan di bɔdi jɔyn wan ples ɛn nain de rul dɛn. Na dɛn difrɛn, difrɛn jɔynt na di bɔdi lɛkɛ di ni ɛn di ɛlbo ol ɔl di bɔdi wan ples. If ɔl di pat dɛn pan di bɔdi de du dɛn wok gud, dat go mek ɔl di bɔdi gro lɛkɛ aw Gɔd want am fɔ gro, so ɔl di pat dɛn pan di bɔdi, dat na di pipul dɛn, go lɛk dɛn kɔmpin.

17
A de tek di Masta in nem fɔ tɔk to una ɛn wɔn una se, una nɔ fɔ liv di layf igen we dɛn pipul we nɔ no Gɔd de liv.

18
We dɛn at nɔ opin, na dat mek dɛn nɔ sabi natin; dɛn de na dak ɛn dɛn nɔ gɛt di layf we Gɔd de gi.

19
Dɛn nɔ de du di rayt tin, dɛn nɔ gɛt wan shem. Dɛn de liv fri layf ɛn dɛn satisfay fɔ liv da we de.

20
Bɔt nɔto so ɔda pipul bin lan una bɔt Krays.

21
A no se pipul dɔn tɛl una bɔt Krays ɛn aw una fɔ liv di tru layf we Jizɔs want una fɔ liv.

22
Una fɔ lɛf fɔ liv di bad layf we una bin liv, da layf de bin de pwɛl una ɛn mek una ful.

23
Lɛ Gɔd in Spirit chenj una at ɛn wetin una de tink.

24
Una fɔ liv di nyu layf we Gɔd dɔn gi una lɛkɛ aw i want. Pɔsin we liv dis kayn layf go du wetin rayt na Gɔd yay ɛn ɔl wetin Gɔd tɛl am fɔ du.

25
Frɔm naw sote go, una nɔ fɔ lay igen. Ɔlman fɔ de tɔk tru to in kɔmpin, bikɔs wi ɔl na pat pan Krays in bɔdi.

26
If una vɛks, una nɔ fɔ gri mek dat mek una du bad, ɛn una nɔ fɔ vɛks ol de.

27
Una nɔ gi Setan da chans de.

28
Mek di pɔsin we bin de tif lɛf fɔ tif, ɛn bigin wok traŋa wan fɔ ɛp insɛf ɛn fɔ ɛp ɔda pipul we nɔ gɛt.

29
Una fɔ lɛf fɔ tɔk bad wɔd, una fɔ de tɔk dɛn wɔd we go ɛp ɔda pipul, so dat wetin una de tɔk go du gud fɔ di pipul dɛn we de yɛri una.

30
Una nɔ mek Gɔd in Spirit sɔri, na da Spirit de Gɔd tek mak una, fɔ di de we i go fri una.

31
Una nɔ fɔ gɛt bad at fɔ una kɔmpin, una nɔ fɔ gɛt wam at, una nɔ fɔ ala pan ɛnibɔdi, ɛn una nɔ fɔ kɔs. Una nɔ fɔ et ɛnibɔdi ɛn una nɔ fɔ tɔk bad bɔt una kɔmpin.

32
Bɔt una fɔ de du gud ɛn gɛt sɔri at fɔ una kɔmpin. Una fɔ de padin una kɔmpin lɛkɛ aw Gɔd dɔn padin una bikɔs una na Krays yon pipul.


Krio Fɔs Oli Baybul Krio Bible © The Bible Society of Sierra Leone, 2013