Beblia

	Krio Fɔs Oli Baybul Ibru 1


Save Notes

1
Fɔstɛm, Gɔd bin de tɔk to wi grampapa papa dɛn, plɛnti tɛm, ɛn i bin de yus difrɛn difrɛn we. Nain prɔfɛt dɛn i bin de sɛn fɔ tɛl wi grampapa papa dɛn in wɔd.

2
Bɔt dis tɛm we di wɔl de dɔn, nain Pikin i sɛn fɔ tɛl wi in wɔd. Na bay dis Pikin ya, i mek ɔl di wɔl, ɛn nain i pik fɔ gɛt ɔltin we i gɛt.

3
I de sho pipul Gɔd in wɔndaful pawa. Wɛn una si di Pikin, una dɔn si Gɔd, ɛn na di Pikin in wɔd we gɛt pawa de mek ɔltin na di wɔl de aw dɛn fɔ de. Afta di Pikin dɔn pul mɔtalman sin kɔmɔt pan dɛn, so dat dɛn go klin na Gɔd yay, i go na ɛvin ɛn sidɔm na Gɔd we de rul ɔltin, in raytan.

4
Gɔd mek in Pikin pas di enjɛl dɛn fawe, lɛkɛ aw di nem we i gi am pas di enjɛl dɛn nem fawe.

5
Wan enjɛl nɔ de we Gɔd dɔn tɛl se, “Yu na mi Pikin; a dɔn bi yu Papa tide.” Ɔ Gɔd nɔ tɔk bɔt ɛni enjɛl se, “A go bi in Papa, ɛn in go bi mi Pikin.”

6
Ɛn igen, wɛn Gɔd bin want sɛn in fɔs Pikin kam na wɔl, Gɔd se, “Una ɔl we na mi enjɛl dɛn fɔ nil dɔŋ bifo mi Pikin.”

7
Wɛn Gɔd tɔk bɔt di enjɛl dɛn, i se, “A mek di enjɛl dɛn we de sav mi tan lɛkɛ briz, ɛn lɛkɛ faya we de blez.”

8
Bɔt wɛn Gɔd tɔk bɔt in Pikin, i se, “O Gɔd, yu go rul sote go! Ɛn yu de rul di rayt we.

9
Yu lɛk wetin rayt, yu nɔ lɛk wetin nɔ rayt. Na dat mek Gɔd we na yu Gɔd pik yu fɔ mek yu gɛt ɔna ɛn jɔy pas ɔl yu kɔmpin dɛn.”

10
Gɔd tɔk igen se, “Masta, da tɛm we natin nɔ bin de yet, na yusɛf mek di wɔl ɛn na yu yon an yu tek mek ɔltin we de na di klawd.

11
Ɔltin we yu mek go dɔn, bɔt yu go de sote go; ɔl dɛn tin de go ol ɛn pwɛl lɛkɛ aw klos de ol ɛn pwɛl.

12
Yu go fol dɛn lɛkɛ ol klos we pɔsin de fol, dɛn go chenj lɛkɛ aw pɔsin de chenj in ol klos fɔ nyu wan. Bɔt yu go de sote go, ɛn yu nɔ go ol.”

13
Gɔd nɔ tɛl ɛni wan pan in enjɛl dɛn se, “Sidɔm na mi raytan sote a mek yu mas dɛn wan we nɔ lɛk yu lɛkɛ na grɔn yu de mas.”

14
Udat na di enjɛl dɛn? Dɛn na spirit ɛn dɛn na Gɔd in mɛsenja dɛn; na dɛn Gɔd de sɛn fɔ ɛp dɛn pipul we Gɔd go sev.


Krio Fɔs Oli Baybul Krio Bible © The Bible Society of Sierra Leone, 2013