Beblia

	Krio Fɔs Oli Baybul Jems 1


Save Notes

1
Na mi Jems we de wok fɔ Gɔd ɛn wi Masta Jizɔs Krays, de rayt to ɔl Gɔd in pipul dɛn we skata ɔlɔbɔt na wɔl. A de tɛl una ɔl adu!

2
Mi Kristiɛn pipul dɛn, una fɔ gladi wɛn ɛni waala mit una,

3
bikɔs una no se dɛn tin de na fɔ tɛst una fɔ no if una biliv Gɔd gud; ɛn if una stil biliv Gɔd, una go ebul fɔ bia ɔltin.

4
If una ebul bia ɔltin, una go bi lɛkɛ aw Gɔd want una fɔ bi ɛn una nɔ go gɛt ɛni bɔt na una layf.

5
If ɛni wan pan una want mɔ sɛns fɔ du ɛnitin, mek i aks Gɔd, Gɔd go gi am, bikɔs Gɔd de gi mɔtalman plɛnti tin dɛn ɛn i gladi fɔ du dat.

6
Bɔt wɛn ɛnibɔdi aks Gɔd fɔ ɛnitin, mek da pɔsin de biliv se Gɔd go gi am wetin i aks fɔ, mek i nɔ dawt. Ɛnibɔdi we de dawt tan lɛkɛ swɛlin na wata we briz de blo, i nɔ stɛdi.

7
Pɔsin lɛkɛ dat jɛs de chenj chenj in maynd. Da pɔsin de fɔ no se Gɔd nɔ go gi am ɛnitin.

8
Mek di Kristiɛn we po gladi bikɔs Gɔd dɔn tek am lɛkɛ sɔmbɔdi.

9
Mek di Kristiɛn we jɛntri gladi bikɔs Gɔd nɔ tek in jɛntri mek natin, bikɔs di jɛntri man go day lɛkɛ dɛn fayn flawa we wi kin si tide, tumara dɛn dɔn lɔs.

10
Di ɔt san kin bɔn di flawa, ɛn di flawa kin fɔdɔm. Na dɔn ɔl di fayn we di flawa bin fayn kin dɔn so. Semwe so, jɛntri pɔsin go de pan in biznɛs wɛn day go mit am.

11
Pɔsin we nɔ tap fɔ biliv pan Gɔd wɛn trɔbul mit am gɛt blɛsin, bikɔs if i stil tinap traŋa afta trɔbul dɔn mit am, Gɔd go gi am di tru layf we i bin dɔn prɔmis dɛn wan we lɛk am.

12
Wɛn ɛnitin mit pɔsin we go mek di pɔsin want fɔ du bad, i nɔ fɔ se, “Na Gɔd mek a want du dis bad ya.” Bikɔs Gɔd nɔ de du bad ɛn i nɔ de du ɛnibɔdi ɛnitin we go mek di pɔsin fil fɔ du bad.

13
Na di bad we de na pɔsin in at de mek di pɔsin want fɔ du bad.

14
Na di bad we de na pɔsin at de mek di pɔsin want sin, ɛn wɛn pɔsin sin dat go mek i day.

15
Mi Kristiɛn pipul dɛn, mek nɔbɔdi nɔ mek una ful.

16
Na Gɔd nɔmɔ de gi wi ɔl dɛn tin we gud ɛn we mek wi nɔ want ɛnitin mɔ. Na Gɔd mek di san, di mun ɛn di sta dɛn. Gɔd nɔ de chenj, i nɔ de lɛf wi na dak afta i dɔn mek layt shayn pan wi.

17
Gɔd mek in wɔd we tru gi wi dis nyu layf lɛkɛ aw i want, so dat wi kin pas ɔl dɛn ɔda pipul we i mek we wi dɔn bi in yon pikin dɛn.

18
Mi Kristiɛn pipul dɛn we a lɛk, una fɔ shap una yes fɔ yɛri wetin pipul de tɔk, bɔt una fɔ tek tɛm tɔk ɛn una at nɔ fɔ de wam kwik.

19
Bikɔs pɔsin we gɛt wam at nɔ go ebul du di gud we Gɔd want mek i du.

20
Na dat mek a de tɛl una se, mek una pul ɔltin we bad kɔmɔt na una layf. Una put unasɛf ɔnda Gɔd ɛn mek di wɔd we i dɔn put na una at sidɔm, bikɔs in wɔd gɛt pawa fɔ sev una.

21
Una fɔ du wetin Gɔd in wɔd se. Pɔsin we jɛs de lisin Gɔd in wɔd nɔmɔ, bɔt i nɔ de du wetin i se, de mek insɛf ful.

22
Ɛnibɔdi we yɛri Gɔd in wɔd ɛn i nɔ du wetin Gɔd tɛl am, tan lɛkɛ pɔsin we luk insɛf na glas ɛn si aw i tan,

23
bɔt wɛn i dɔn luk insɛf na di glas, i go in we ɛn fɔgɛt aw i tan wantɛm.

24
Gɔd in wɔd na di rayt tin fɔ mɔtalman ɛn i de mek mɔtalman fri; ɛnibɔdi we put ɔl in at pan am, we nɔ jɛs lisin am nɔmɔ ɛn fɔgɛt, bɔt i de du wetin i se, Gɔd go blɛs ɔl wetin da pɔsin de put in an pan.

25
If ɛnibɔdi tink se in de fala Gɔd ɛn i nɔ de tek tɛm wɛn i de tɔk, i de mek insɛf ful. Na fɔ natin di pɔsin de fala Gɔd.

26
Pɔsin we de fala Gɔd fɔ de ɛp dɛn pikin we nɔ gɛt mama ɛn papa ɛn dɛn uman we dɛn man dɔn day. I fɔ tek tɛm mek dɛn bad pipul na wɔl nɔ mek insɛf bigin du bad. Na so Gɔd we na di Papa want pɔsin we de fala am fɔ tan.


Krio Fɔs Oli Baybul Krio Bible © The Bible Society of Sierra Leone, 2013