Beblia

	Krio Fɔs Oli Baybul 1 Pita 1


Save Notes

1
Mi Pita, we na Krays in apɔsul, de rayt to una we Gɔd dɔn pik, we skata ɔlɔbɔt na Pɔnchɔs, Galeshya, Kapadoshia, Eshya ɛn Bitinya, we de lɛkɛ trenja na ɔl dɛn kɔntri ya.

2
Na Gɔd, we na wi Papa, dɔn pik una, lɛkɛ aw i bin dɔn plan, ɛn Gɔd in Spirit dɔn mek una bi Gɔd yon pipul, so dat una go du wetin Jizɔs Krays tɛl una fɔ du, ɛn di day we Jizɔs Krays day na di krɔs go mek una klin na Gɔd yay. A de pre mek Gɔd sho una aw i gud ɛn mek i gi una kol at mɔ ɛn mɔ.

3
Lɛ wi tɛl Gɔd, we na Masta Jizɔs Krays in Papa, tɛnki! Bikɔs Gɔd sɔri fɔ wi, i mek Jizɔs Krays rayz frɔm di grev fɔ gi wi nyu layf, na dat mek wi abop fɔ gɛt layf we go de sote go,

4
ɛn so, wi abop fɔ gɛt di wɔndaful blɛsin dɛn we Gɔd bin dɔn prɔmis in pipul dɛn ɛn we i kip na ɛvin fɔ una. Dɛn blɛsin ya nɔ de pwɛl, dɛn nɔ de chenj ɛn dɛn go de sote go.

5
Bikɔs una biliv pan Gɔd, Gɔd go kip una wit in pawa, so dat una go gɛt da layf we go de sote go, we dɔn rɛdi naw ɛn we Gɔd go gi una di de we i go jɔj ɔlman.

6
Dis fɔ mek una gladi pan ɔl we ɔl kayn waala de mek una sɔfa naw; bɔt i nɔ go te igen we una go sɔfa.

7
Dɛn waala ya na fɔ tray una fɔ si if una biliv Gɔd gud wan, lɛkɛ we dɛn kin put gold na faya fɔ tray am fɔ si if i gud, ɛn gold na tin we de pwɛl. Di biliv we una biliv Gɔd bɛtɛ fawe pas gold, so Gɔd go tray una fɔ si if una biliv pan am gud, ɛn una nɔ go tap fɔ biliv pan am. If una biliv Gɔd gud gud, di de we Jizɔs go kam mek ɔlman si am, Gɔd go prez una, i go mek una gɛt rɛspɛkt ɛn i go mek una de wit am sote go.

8
Pan ɔl we una nɔ si Jizɔs yet, una lɛk am. Pan ɔl we una nɔ de si am naw, una biliv pan am; so una gladi bad ɛn una nɔ ebul tɔk sɛf bɔt di gladi we una gladi, bikɔs

9
di biliv we una biliv Gɔd dɔn mek una gɛt layf we go de sote go na ɛvin.

10
Dɛn prɔfɛt we bin dɔn tɔk bɔt dis gud tin ya we Gɔd dɔn gi una, bifo i gi una, bin tek tɛm fɔ dig fɔ no bɔt dis layf ya we go de sote go na ɛvin, we Gɔd de gi dɛn wan we biliv pan Krays.

11
Wɛn Krays in Spirit we bin de insay dɛn bin tɔk bɔt aw Krays bin gɛt fɔ sɔfa ɛn di wɔndaful tin dɛn we bin gɛt fɔ apin afta dat, di prɔfɛt dɛn bin tray fɔ no ustɛm dɛn tin de go bi ɛn aw dɛn go bi.

12
Gɔd sho dɛn prɔfɛt ya se nɔto fɔ ɛp dɛnsɛf dɛn de wok, bɔt na fɔ ɛp una. Di wok we dɛn de du na we dɛn de tɔk bɔt dɛn tin we una dɔn yɛri, we dɛn wan we de tɛl pipul di Gud Nyuz dɔn tɔk. Na Gɔd in Spirit we Gɔd sɛn kɔmɔt ɛvin, nain mek dɛn pipul ya ebul tɛl pipul di Gud Nyuz. Na dɛn tin ya dɛn enjɛl dɛnsɛf go lɛk fɔ ɔndastand.

13
Na dat mek una fɔ mekɔp una maynd fɔ du wetin una gɛt fɔ du, una fɔ kɔntrol unasɛf ɛn una fɔ put ɔl una at pan di blɛsin we Jizɔs Krays go gi una di tɛm we i go sho insɛf to ɔlman.

14
Una fɔ du ɔl wetin Gɔd tɛl una fɔ du, una nɔ fɔ fala una at fɔ du dɛn bad tin we una bin lɛk fɔ du di tɛm we una nɔ bin no di Gud Nyuz bɔt Jizɔs Krays yet.

15
Bɔt una fɔ du ɔl wetin una de du lɛkɛ aw Gɔd yon pipul de du dɛn, jɛs lɛkɛ aw Gɔd, we kɔl una fɔ du in wok, nɔ de du ɛnitin bad.

16
Dɛn rayt na Gɔd in Buk se, Gɔd se, “Una nɔ fɔ gɛt natin fɔ du wit ɛnitin we bad lɛkɛ we misɛf nɔ gɛt natin fɔ du wit ɛnitin we bad.”

17
Wɛn una de pre ɛn una se, “Papa,” una de kɔl Gɔd, we de jɔj ɔlman di sem we, bay di wok we ɔlman de du, so ɔl di tɛm we lɛf fɔ una na dis wɔl, una fɔ ɔna am, pan ɔl wetin una de du.

18
Unasɛf no se nɔto tin lɛkɛ silva ɛn gold we de pwɛl, dɛn tek pe fɔ pul una kɔmɔt pan di yuslɛs layf we una grampapa papa dɛn bin liv ɛn we unasɛf bin liv;

19
bɔt na Krays in yon blɔd dɛn tek pe fɔ una, Krays we na lɛkɛ Ship we nɔ gɛt bɔt.

20
Bifo Gɔd mek di wɔl, i bin dɔn pik Krays fɔ du di wok we i fɔ du na wɔl, ɛn naw, we plɛnti tɛm nɔ lɛf igen, Krays dɔn kam fɔ ɛp una.

21
Krays dɔn mek una biliv pan Gɔd, we mek i rayz frɔm di grev ɛn ɔna am; na dat mek una trɔs Gɔd ɛn abop se i go du wetin i dɔn prɔmis se in go du.

22
Naw we una de fala dɛn tru tin we dɛn lan una bɔt Jizɔs Krays, we mek una dɔn lɛf fɔ du bad, ɛn mek una layf dɔn klin, ɛn mek una lɛk una kɔmpin Kristiɛn dɛn fɔ tru, una fɔ lɛk dɛn naw wit ɔl una at.

23
Gɔd in wɔd we de gi layf ɛn we de sote go dɔn mek una gɛt nyu layf; i tan lɛkɛ se, una dɔn bɔn bak, ɛn di wan we mek una bɔn bak go de sote go; i nɔ tan lɛkɛ di wan we bɔn una di fɔs tɛm, we mɔs day.

24
Dɛn rayt na Gɔd in Buk se, “Mɔtalman na lɛkɛ gras, ɛn ɔl wetin fayn pan am jɛs tan lɛkɛ dɛn flawa we de gro pan gras. Di gras go wida ɛn di dray flawa dɛn go fɔdɔm na grɔn,

25
bɔt di Masta in wɔd go de sote go.” Dis wɔd ya na di Gud Nyuz bɔt Jizɔs we dɛn bin tɛl una.


Krio Fɔs Oli Baybul Krio Bible © The Bible Society of Sierra Leone, 2013