Beblia

	Kurukh Bible 2014 Kurux मत्ती 1


नोट सहेजें

1
ईद अब्राहमसी ख़द्दस दाऊदसी ख़द्दस येसु मसीसी पूरखर ही नामे हवे।

2
अब्रा‍हमस इसाकसी तम्‍बस। इसाकस याकॊबसी तम्‍बस। याकॊबस यहूदा अरा आसी भइय्योर ही तम्‍बस।

3
यहूदास फारेस अरा सारासी तम्‍बस अरा तंग्यो तामार रहचा। फारेस हेसरॊमसी तम्‍बस। हेसरॊमस आरामसी तम्‍बस।

4
आरामस अमिनदाबसी तम्‍बस। अमिनदाबस नास्‍सॊनसी तम्‍बस। नास्‍सॊनस सलमॊनसी तम्‍बस।

5
सलमॊनस बोआसी तम्‍बस अरा तंग्यो राख़ाब रहचा। बोआस यॊबॆदसी तम्‍बस अरा तंग्यो रूत रहचा। यॊबॆदस येसैसी तम्‍बस।

6
येसैस दाऊद बॆलासी तम्‍बस। दाऊदस सालोमॊनसी तम्‍बस। सालोमॊनसी तंग्यो मुन्‍द उरियसी तंग्‍आली रहचा।

7
सालोमॊनस रहोबोअमसी तम्‍बस। रहोबोअमस अबियासी तम्‍बस। अबियास आसाफसी तम्‍बस।

8
आसाफस यॊसफटसी तम्‍बस। यॊसफटस यॊरामसी तम्‍बस। यॊरामस ओसियसी तम्‍बस।

9
ओसियस यॊतामसी तम्‍बस। यॊतामस आहाजसी तम्‍बस। आहाजस हेसेकियसी तम्बस।

10
हेसेकियस मनास्‍सॆसी तम्‍बस। मनास्‍सॆस आमॊनसी तम्‍बस। आमॊनस यॊहोसियसी तम्‍बस।

11
यॊहोसियस येहोनियास अरा आसी भइय्योर ही तम्‍बस। ई बेड़ा नू आलर गुड़र'अरकी बाबुलॊन होच्‍चर केरर।

12
गुड़र'अरकी बाबुलॊन हो'अना ही ख़ॊख़ा: येहोनियास सलातिऎलसी तम्‍बस रहचस। सलातिऎलस जोरोबाबेलसी तम्‍बस।

13
जोरोबाबेलस अबियूदसी तम्‍बस। अबियूदस एलियाकिमसी तम्‍बस। एलियाकिमस असॊरसी तम्‍बस।

14
असॊरस सदॊकसी तम्‍बस। सदॊकस अखीमसी तम्‍बस। अखीमस एलियूदसी तम्‍बस।

15
एलियूदस एलेयासरसी तम्‍बस। एलेयासरस मत्तानसी तम्‍बस। मत्तानस याकॊबसी तम्‍बस।

16
याकॊबस यॊसॆफसी तम्‍बस। यॊसॆफस मरियम ही तंग्‍आलस। मरियम येसुसी तंग्यो। येसुसिन मसी ब'अनर।

17
ई लेखा अब्राहमस ती दाऊदस गूटी चौदा पिड़ही, अरा दाऊदस ती आलर गुड़र'‍अरकी बाबुलॊन हो'अना गूटी चौदा पिड़ही, अरा गुड़र'‍अरकी बाबुलॊन हो'अना ती मसीस गूटी चौदा पिड़ही मनी।

18
येसु मसीसी कुन्‍द्रना एन्ने मंजा का आसी तंग्यो मरियम अरा यॊसॆफसी पाही मंजकी रहचा ख़ने, आर ही ओन संगे मन्ना ती मुन्‍द नेम्हा बॊलतस ती आद ओत्‍था ऎख़‍ र'अना ख़क्‍ख‍तारा।

19
अन्‍ति अदही आलस यॊसॆफस उजगो रहचस अरा अदिन नठाब'आ मल बेद्दालियस, औंगे आस अदिन कलेकसे अम्‍बा गे तिहा ननालियस।

20
आस इबड़ा कत्‍था ही सोचनुम रहचस ख़नेम, उर्बासी पैकस आस गे तुंगुल नू ऎथ्रस दरा आनियस, “यॊसॆफ, दाऊदसी ख़द्दायो, नीन निंग्‍है आली मरियम आबोन ओन्‍द्र'आ गे अमा एल्‍चा, ‍आद नेम्‍हा बॊलतस ती ओत्‍था ऎख़ र'ई।

21
आद ख़द्द पाको अरा नीन आसी येसु नामे पिंजके, एन्‍देरगेका आस तंग्है आलारिन तम्‍है पाप गुट्ठी ती नाड़ोस।”

22
इबड़ा उर्मी एन्ने गे मंजा धर्मेसी कत्‍था तिंगुर ती उर्बासी आनका कत्‍था मनन नेक‍अन।

23
“ऎरा! डिं‍डा पेल्‍लो ओत्‍था ऎख़ मनो अरा ओन्‍टा ख़द्दासिन पाको अरा आसिन इम्मानुऎल ब'ओर अदही माने ‘धर्मेस नम्‍है गने र'अदस’।”

24
यॊसॆफस चॊचस ख़ने उर्बासी पैकस पॆसका रहचस अन्नेम नंजस ती अदिन बेंज्रस अरा तंग्‍‍है आलिन तंग्‍‍हा गने ओन्‍द्रस।

25
लिकिन ख़द्दासी अरगी कुन्‍द्रना गूटी मरियम गुसन मल केरस अरा आसी नामे येसु पिंजयस।


Kurukh Bible 2014 Kurux No Data