Beblia

	Kurukh Bible 2014 Kurux प्रेरितों के काम 1


नोट सहेजें

1
अना थेओफिलुस! ऎन एंग्‍है मुन्‍द ता पुथी नू येसुसी नंजका अरा सिखाबाचका उर्मी कत्थन लिखचकादन।

2
आस तान चज्‍जियस अबड़ा त‍इरकर गे नेम्‍हा बॊलतस ती पॆसका चिच्का ती मेर्ख़ा होतारना गूटी येसुस नंजका अरा सिखाबाचका उर्मी कत्‍थन अइय्यम लिखचकन।

3
येसुस दुक्‍खे भोगचका अरा केचका ख़ॊख़ा आर गे कोड़हे सबुत ऎदस का तान उज्‍जालदस। अरा आर गे बग्गे हॆल चालीस उल्‍ला गूटी ऎथ्रते रहचस अरा धर्मेसी राजी ही पत्त नू कछनख्रते रहचस।

4
ओंग्‍होल येसुस आर गने मंडी ओनो बारी आरिन पॆसस का, “नीम येरुसलॆम नगरेन अमके अम्‍बा, लिकिन बंगासी गच्‍छरका ही पाब ऎरा, एकदा ही पत्त नू ऎन निमन मुन्‍द तिंकन।

5
यॊहनस गा अम्मु ती नॊड़रताचस, लिकिन जोक्‍क उल्‍ला ख़ॊख़ा नीम नेम्‍हा बॊलतस ती नॊड़तार'ओर।”

6
एकाबारी त‍इरकर ख़ॊंड़रर ख़ने येसुसिन मेंजर, “अना उर्बायो, नीन अक्‍कुनिम इस्राऎल आलर गे राजिन किर्त'ओय चि'ओय का?”

7
येसुस आरिन बाचस, “बंगस एका उल्ला महले बेड़ा गुट्ठिन ओक्‍ताचस ती तंग्‍है आकुस नू दिम उइय्कादस, अदिन अख़ना निम्‍है चाड़ मलकी।

8
लिकिन इकला नेम्‍हा बॊलतस निम्‍है म‍इय्याँ एत्तोस, नीम सवंग ख़क्‍खोर अरा येरुसलॆम नू अरा गोट्टा यूदेया अरा समारिया नू अरा ख़ॆख़ेल ही ठुट्ठु गूटी नीम एंग्‍है गोवाह मनोर।”

9
आस इबड़न बाचका ख़ॊख़ा, आर ही ईरनुम ईरनुम आस म‍इय्याँ होतारस। अरा ओन्‍टा बदाली आर ही ईरनुम ती आसिन कुल्‍लिया चिच्‍चा।

10
अरा आसी कानुम, एकाबारी आर मेर्ख़ा तरा मॆन ऎरनुम रहचर, ख़नेम आचका ऎंड़ मॆतर पंडरू किचरी अत्तर आर गुसन बरचर इज्‍जर।

11
अरा आर बाचर, “अना गलिलेया आलारो, नीम एन्‍देरगे इज्‍जनुम मेर्ख़ा तरा मॆन ऎरालदर? ई येसुस, नॆ निम्‍है गुसते मेर्ख़ा होतारस, एकासे नीम आसिन मेर्ख़ा काना ईरकादर, अन्नेम आस फिन बर'ओस।”

12
तहाँ आर जैतून नामे ही परता ती येरुसलॆम किर्रियर। ईद येरुसलॆम ती अधा कॊस गेच्‍छा नू र'ई।

13
अरा असन आर अंड़सियर ख़ने, ओन्टा पाटन कुठला नू केरर। अइय्यम पतरस अरा यॊहन अरा याकॊब अरा अन्‍द्रेयस अरा फिलिप्‍पोस अरा तॊमस अरा बरतोलोमैस अरा मत्तायोस अरा हलफैसी तंग्‍दस याकॊब अरा यहूदीर ही छछिन्‍द सैना ता सिमॊन अरा याकॊबसी तंग्‍दस यूदस र'आलियर।

14
इबड़ा ओर्मर अरा जोक्‍क मुक्‍कर येसुसी तंग्यो मरियम, अरा आसी भ‍इय्योर गने ओन जिया मंजर ती गोहरारना अरा ने'अना नू र'आलियर।

15
अबड़ा उल्‍ला नू उन्दुल मलागूटी ओन सौ बीस आलर ख़ॊंड़रका रहचर, पतरस आर ही मझी नू इज्‍जस ती बाचस,

16
“अना भ‍ईरो, नेम्‍हा पुथी ता लिख्रका मन्ना चाड़ रहचा, आद नेम्‍हा बॊलतस दाऊदसी ब‍ई ती येसुसिन हॆंरका आलर गे कड़हाब'ऊ रहचका यूदसी पत्त नू मुन्‍द बाचका रहचस।

17
यूदस गा एम्‍है गने गन्‍तारस, अरा ई सुसर'अना नू संगे रहचस।

18
(यूदस तंग्‍है मलदौ नलख ही अर्जाचका ती ओन्‍टा ख़ल्ल ख़ीन्‍दियस, अरा आस अइय्या कुक्‍कु भरसा खत्रस, अरा आसी कूल बिदिगरा केरा, अरा आसी पोट्टा बहरी उरखा केरा।

19
ई कत्‍थन येरुसलॆम ता उर्मी र'ऊ आलर अक्‍खर। औंगे आ ख़ल्ल ही नामे तम्‍है भखा नू ‘हकेलदामख़’ बातार'ई, इदही माने ‘ख़ॆंस ही ख़ल्ल’ हवे।)

20
ईद गा दाऊदसी डंडी पुथी नू एन्ने लिख्रकी र'ई, ‘आसी र'अना अड्डा धंस्र'ओ क'ओ नेकअन, अरा अइय्या नॆ हूँ मल ओक्र'ओर नेकअन।’ अरा ‘आसी पद आबोन नन्नस इंझ्र'ओस नेकअन।’

21
औंगे उर्बा येसुस एम्‍है संगे काला बर'आ लगियस अबड़ा उर्मी बेड़ा गूटी एम्‍है गने रहचका आलर ती ओर्तोसिन नाम यूदसी अड्डा नू चाजना र'ई।

22
आस येसुस यॊहनस ती नॊड़रस ती मेर्ख़ा होतारना गूटी एम्‍है गने रहचका आलर ती ओर्तोस र'अना र'ई। आस एम्‍है गने येसुसी उज्‍जा चो'अना ही गोवाह र'ओस।”

23
ख़ने आर बरसब्‍बास बारना यॊसॆफसिन (ईसी नन्ना नामे यूसतोस हवे) अरा मत्तियसिन इजताचर।

24
अरा आर एन्ने बिन्‍ती नंजर, “अना उर्बायो, नीन ओर्मर ही मनेन अख़दय, इदिन दहदर नना का इबड़र ती नॆकन चज्जिकादय,

25
का आस ई सुसर'अना नलख अरा त‍इरकर ही अड्डन हो'ओस, एकदन यूदस अम्‍बियस ती तंग्‍है अड्डा किर्रिम बिच्‍चियस।”

26
तहाँ आर आर ही नामे ती चिठी टिड्डर अरा चिठी मत्तियसी नामे नू उरखा। ख़ने आस अबड़ा ग्यारा त‍इरकर गने त‍इरकस मंजस।


Kurukh Bible 2014 Kurux No Data