Beblia

	Kurukh Bible 2014 Kurux गलातियों 1


नोट सहेजें

1
ई चिठी त‍इरकन पौलुस एंग्हा तरती र'ई। ऎन एक‍अम आलर ही खोंड़हा तरती मला महले एकअम अक्स'ऊ आलर ती तइरका मल्‍ला मंजका। लिकिन येसु मसीस ती अरा धर्मे बंगस ती तइरका मंजकादन, एकास येसुसिन केचका ती उज्‍जा चॊदस।

2
अरा तइरका पौलुस एंग्‍है तरती अरा एंग्‍है संगे र'अनर अबड़ा भईर तरती हूँ गलातिया चकभार नू र'ई अबड़ा कलीसिया गुट्ठी गे ई चिठिन त‍इय्‍दम।

3
नम्‍है धर्मे बंगस अरा उर्बस येसु मसीस निमा मया अरा कोड़े चि'अदस नेकअन।

4
येसुस दिम धर्मेसी अरा बंगासी मने ती ई मलदौ ख़ॆख़ेल ती नमन नाड़ा गे नम्‍है पाप गुट्ठी गे केच्‍चस।

5
धर्मे बंगस गे हुल्‍लो ती हुल्‍लो गूटी महबा मनन नेकअन। आमेन।

6
धर्मेस मसीसी मया ती निमन मीख़ियस। एंगा हैकट मंजा का एन्ने चाँड़हे नीम आसिन अम्‍बकर ती नीम नन्‍ना रकम ही दौ कत्‍थन मेंजकर ती किर्रा लगदर।

7
नन्ना दौ कत्‍था गा र'अम मलकी। लिकिन कैनो आलर एन्ने र'अनर का आर निमन अकबकाब'अनर ती मसीसी दौ कत्‍थन बगड़'आ बेद्दालनर।

8
लिकिन ऎन निमन एका दौ कत्‍थन तिंकन अदिन अम्‍बरकी नन्‍ना दौ कत्‍था नीकईम तेंगनर होले, ऎम ऎमिम हूँ र'ओम महले मेर्ख़ा ता पैकस हूँ र'ओस, ऎम जनमजुग गे सर्पार'ओम।

9
मुन्‍द एका दौ कत्‍था ऎन निमा तिंकादन, अक्‍कुन फिनिम तेंगदन, एका दौ कत्‍थन नीम इंझ्रकर अत्रु ती नन्‍ना दौ कत्‍थन एकअम ओर्तस तेंगदस होले, आस मइय्याँ सरपारना मनी।

10
अक्‍कु ऎन नॆख'आ सोग्‍गे ख़क्‍खा बेद्ददन आलर ही मलता धर्मेसी? महले ऎन आलारिन रिझाब'आ बेद्ददन का? ऎन आलारिन रिझाब'आ बेद्दना होले, मसीसी जॊंख़ मल र'ओन दने।

11
अना भ‍ईरो! ऎन निमन अख़त'आ बेद्ददन का एका दौ कत्‍था ऎन निमन तिंकादन, आद आलर ही चिताबुता ती गढ़चका मल्‍ली।

12
ऎन अदिन एकअम आलस ती मल्‍ला इंझ्रका, अरा एकअम आलस ती हूँ मल्‍ला सिख्रका, आद एंगा येसु मसीस दहदर नंजस ख़ने ख़क्‍ख्रा।

13
ऎन मुन्‍द यहूदी धरम नू रहचकन ख़ने एकासे उज्‍जा ओक्‍का लिक्‍कन अदिन नीम अख़दर। ऎन कैयो खेप धर्मेसी कलीसिया आबोन बुड़ाब'आ गे चिताबुता नंजकन।

14
एंग्‍है बग्‍गे जातियर गुट्ठी ती नॆ एंग्‍है गने ता रहचर, आर ती यहूदी खोंड़हा नू परदनुम मुन्‍द काला लिक्‍कन। अरा एम्‍है पूरखर ही चाल गुट्ठी गे नगदे रिझ्र'आ लिक्‍कन।

15
लिकिन धर्मेस एंगन अयंग ही ओदर तिम चज्‍जिकाचस अरा तंग्‍है मया नू मीख़काचस।

16
अरा आस एग्‍है नू अरा एंग्‍है ती तंग्दासिन दहदर नना गे हुकमारस। एकत्रु ऎन नन-यहूदीर नू तंग्‍दासी दौ कत्‍थन तेंगा कुद्दोन। इदही ख़ॊख़ा ऎन एक‍अम आलर ती सलहा मल्‍ला मंजका।

17
अरा एंग्‍है ती मुन्‍द त‍इरकर रहचकर आरिन ऎरा गे ऎन येरुसलॆम मल केरकन। लिकिन लॆम अरबिया देस किर्रीम बिच्‍चकन फिन असले दमसकोस नगरे किर्कन बर्चकन।

18
अरा ऎन तीन बछर ख़ॊख़ा पतरस गने भेंट मना गे येरुसलॆम केरकन अरा आसी गने पन्‍द्रा उल्‍ला रहचकन।

19
उर्बासी तंग्ड़िस याकॊबसिन अम्‍बर नन्‍ना तइरकर गने नॆख'आ संगे हूँ एंग्‍है भेंट मल मंजा।

20
धर्मेस अख़दस ऎन निमा लिखचका र'अदन आद जम्मा मानिम रई।

21
इदही ख़ॊख़ा ऎन सीरिया अरा किलिकिया ही चकभार गुट्ठी नू केरकन।

22
आ बेड़ा नू यूदेया ता कलीसिया गुट्ठी ता मसी आलर एंगन बल्‍ला लगियर।

23
आर इवंदम अख़'आ लगियर का एकास नम्‍है मइय्याँ सताब'आ लगियस, आस अक्‍कु ई पत्त'अना ही कत्‍था तेंगा कुद्दा लगदस। एकदन आस नठाब'आ बेद्दा कुद्दा लगियस।

24
अरा अबड़ा कलीसिया एंग्‍है पत्त नू धर्मेसी ओहमा नना लगिया।


Kurukh Bible 2014 Kurux No Data