Beblia

	Kurukh Bible 2014 Kurux इब्रानियों 12


नोट सहेजें

1
औंगे ई लेक्‍खा नगदे बग्‍गे पत्त'अना ती उज्‍जका आलर ही पत्त ता गोवाह गुट्ठी कोहाँ बदाली बेसे नम्‍है ओनबेंड़र'आ र'ई। होले बरा, नाम छिक'ऊ उर्मी आलॊ गुट्ठिन अरा लॆम अड़झ'अना पाप गुट्ठिन अम्‍बोत ती धर्मेस नमा गे उइय्कादस आ बोंगना नू सहना ती चिहुट नन्‍ते बोंगदत नेक‍अन।

2
नम्‍है पत्त'अनन ऒर ननू अरा पखड़ ननू येसुस तरा मॆन ऎरदत नेक‍अन। आस तंगा गे उइय्का रहचका रिरयारना ही चड्डे क्रुस ही लज्‍जेन मल सोच्‍चस ती क्रुस नू दुक्‍खेन चॊदस ती केच्‍चस। अक्‍कु धर्मेसी बॆल-गदिया ही तीना पक्‍खा उक्‍कदस।

3
पपहा आलर ती बरचका उर्मी दुक्‍खन सहचका येसुसी पत्त नू सोच'आ, होले नीम ख़ॆना मनोर ती पत्त'अनन मल अम्‍बोर।

4
नीम निम्है पाप ही बिड़दो ही तिहा नू निम्‍है जियन चि'अना गूटी हुरभेटा मल नंजकर।

5
अरा धर्मेस निमन तंग्‍है ख़द्दर एन्ने मॆख़रकी निम्‍है गने बाचका रिझ्रत'अना कत्‍था गुट्ठिन नीम मोधरकर केरकर, “अना एंग्‍है ख़द्दायो! उर्बासी कोड़नन नेब्‍बा अमा सोच'आ, अरा आस निमन दन्‍दक'ओ बारी डिढन अमा अम्‍बा।

6
एन्‍देरगेका उर्बस नॆकन चोन्‍हा नन्‍दस आसिन कोड़दस, अरा नॆकन तंग्‍है ख़द्द लेक्‍खा इंझ्रदस आसिन दन्‍दकादस।”

7
दुक्‍खे बर'ओ बारी आद निमन कॊड़ा गे बर'ई एन्‍ने अख़'अरकी अदिन सह'आ। धर्मेस निमन तंग्‍है ख़द्दर लेक्‍खा ऎकत'अदस। ख़द्दर ओर्मर गा तम्‍है तम्‍बस ती कोड़ोरनर।

8
धर्मेस तंग्‍है उर्मी ख़द्दारिन नन्ना लेक्‍खा निमन मल कोड़दस होले, अदही मने एन्ने र'ई का नीम आसी ख़द्दर मलदर, मलदौ मदहे ती कुन्‍द्रका ख़द्दर र'ओर दने।

9
नाम गा नमन कोड़र'ऊ नम्‍है ई ख़ॆख़ेल ही बंगर गे म‍ईन नन्‍दत। अन्ने होले नम्‍है बॊलता ही बंगासी अउरिम कोड़हे तबे नू र'अना ती उज्‍जा गे चाड़ र'ई।

10
नम्‍है ई ख़ॆख़ेल ही बंगर तम्‍है अख़ना लेक्‍खा जुक्‍किम उल्‍ला गे नमन कोड़ा लगियर। लिकिन धर्मेस गा नाम आसी नेम्‍हा नू मेस्र'आ गे नम्‍है दौ गे नमन कोड़दस।

11
एकअम कोड़ना हूँ कोड़र'ऊ बारी रिझ मल मनी, लिकिन सस्‍ती ही कत्‍था दिम मनी। अन्नु हूँ अदही ती सिख्रका आलारिन आद ख़ॊख़ा उजगो कम'ओ अरा आर कोड़े ख़क्‍खोर।

12
औंगे निम्‍है उलू फूलु ख़ेक्खा अरा पयहा मूका गुट्ठिन बड़ियर नना।

13
अरा नीम निम्‍है उज्‍जना नू उजगो डहरे नू ऎका। होले निम्‍है उज्‍जनन ऎररकी निम्‍है गने चॊंख़्र'ऊ लेड़ह'ऊ आलर अउर हूँ लेड़हना ती नास मल मनरकी उजगार'ओर।

14
ओर्मर गने मेस्र'आ ती उज्‍जा गे अरा निम्‍है ऎकना नू नेम्‍हा गने र'आ गे चिहुट नना। बिगर नेम्‍हा ती नॆ हूँ धर्मेसिन ऎरा पोल्‍लोर।

15
चिहुंक नन्‍ते र'आ का नॆ हूँ धर्मेसी मया आबोन ख़क्‍ख'आ गे अम्‍बोर अम्‍बर'आ, अरा एक‍अम ख़ड़ख़ा निम्‍है मझी नू उरखा गे अमा चि'आ। आद निमा दुक्‍खे चि'अरकी बग्‍गे आलारिन सोतबोड़'आ ननो चि'ओ।

16
‍अरा नॆ हूँ भड़वा नलख अमा नना, अरा एसावस लेक्‍खा बिगर महबा आल अमा मना, एकास ओंग्‍होन ता मंडी गे तंग्‍है जेट्ठा ही अदिया आबोन बीसियस चिच्‍चस।

17
नीम अख़दर का ख़ॊख़ा आस तम्‍बस ती जेट्ठा ही आसीस ख़क्‍खा बिद्दियस ख़ने, आस ख़ाँड़रस केरस। आस ई आसीस आबोन चींख़ा चींख़ा बेद्दना नू हूँ आस गे आसी आ दसा बदलार'आ पोल्‍ला।

18
अक्‍कु नीम बरचकादर आ अड्डा मुन्‍द टुंगरी नू इस्राऎल आलर केरका सीनाय परता मल्‍ली। आ परतन गा आलर एंसड़'आ ओंगनर। अरा आ परता नू चिच्‍ची हदकारा, अरा गर्रा घटा अरा ऊख़ा अरा बरंडो कुलरकीचा।

19
अरा असन पेंड़हे ही ख़रख़ना मेन्‍तारा। अरा अइय्या इस्राऎल आलर ओन्‍टा सड़ा ब'अनन मेंजर, लिकिन आर आ ब'अनन अउर मल मेना गे गोहरारर।

20
एन्‍देरगेका, “एक‍अम मेक्‍खो हूँ आ परतन एंसड़'ओ होले, अदिन पखना ती लोड़गना ती पिटना मनो” एन्ने बाचका पॆसकन आर सह'आ पोल्‍लर।

21
आ देखार कोड़हे भयभयान रहचा। औंगे मूसस हूँ बाचस, “ऎन एल्‍चदन ती अस्रदन।”

22
लिकिन नीम गा अक्‍कु उज्‍जना धर्मेसी नगरे मेर्ख़ा ता येरुसलॆम सीयॊन परता नू बरचकादर। अइय्या गन'आ पोलना मेर्ख़ा पैकर रिझ गने ख़ॊंड़रनर।

23
नीम धर्मेसी जेट्ठर ख़ॊंड़रना ही कलीसिया नू बरचकादर। ई जेट्ठर ही नामे मेर्ख़ा नू लिख्रकी र'ई। अरा नीम उर्मी आलारिन नेंवई ननू धर्मेस गुसन बरचकादर। अरा नीम पखड़ मंजका उजगो आलर ही बॊलता गुट्ठी र'ऊ अड्डा गे बरचकादर।

24
अरा नीम पुना गच्‍छरना नू धर्मेस अरा आलर ही मझी आल येसुस गुसन बरचकादर। अरा नीम हाबेलसी ख़ॆंस ती बॆस कत्‍था तिंगू येसुसी छिंछड़ाचका ख़ॆंस गुसन बरचकादर।

25
औंगे चिहुंक र'आ का निम्‍है गुसन ब'ऊ धर्मेसिन मेना गे बिड़दो मुंही अमा नना। ख़ॆख़ेल नू मूसासी चेताब'अनन मेना गे इस्राऎल आलर बिड़दो मुंही नंजर ती आर पोल्‍लर बछर'आ। अन्ने होले नाम मेर्ख़ा ती चेताब'उसिन मेना गे बिड़दो मुंही ननोत ती एकासे बछर'ओत?

26
आ बेड़ा नू गा धर्मेसी सड़ा ख़ॆख़ेलन नुकुचकीचा, लिकिन अक्‍कु आस एन्ने गच्‍छरकादस, “अउर ओंग्होन ऎन नुक'ओन, ख़ॆख़लन लेका मला मेर्ख़न हूँ नुक'ओन।”

27
“अउर ओंग्‍होन” ई कत्‍था इदन दहदर ननी का उर्मी गढ़चका आलॊ नुकतार'ओ क'ओ अरा गुछर'ओ क'ओ, औंगे नुकतार'आ पोलना आलॊ ठिमठिम ने र'ओ।

28
औंगे नाम गा नुकतार'आ पोलना राजिन दिम ख़क्‍खालदत। ई चड्डे नाम धन्‍यवाद ननरकी म‍ईन अरा इल्चका गने महबा ननरकी धर्मेसिन रिझ्रत'अदत नेक‍अन।

29
एन्‍देरगेका नम्‍है धर्मेस गा ओलत'अना चिच्‍ची हिकदस।


Kurukh Bible 2014 Kurux No Data