Beblia

	Kurukh Bible 2014 Kurux याकूब 1


नोट सहेजें

1
धर्मेस अरा उर्बस येसु मसीसी जॊंख़न ऎन याकॊब, तम्है राजी ती बहरी बींड़रका इस्राऎल आलर ही बारा गोतोर ता पत्त'ऊ आलर निमा गे मोंजरा नन्दन ती ई चिठिन लिखदन।

2
अना एंग्‍है भईरो, एका एका बारी निमा गे कैनो रकम ही सस्ती गुट्ठी मनी, आ बारी निम्है पत्त'अना ही बिढ़्रना निमा गे खतिर म‍न्नन चि'ई एन्ने अक्कर ती अदन रिझ्रना बुझुरके।

3
***

4
अरा नीम निम्है इन्द्रिइम चाड़ नू मल खंग्ररकी पखड़ अरा निंद्रका ती र'आ गे, निम्‍है खतिर नन्ना उर्मी तरा नलख ननन नेकअन।

5
निम्‍है ती एकअम ओर्तस लूर नू खंग्रका र'अदस होले, आस धर्मेस गुसले ने'अना र'ई। ख़ने आद आस गे चीतार'ओ। धर्मेस बिगर केबर'अरकी ओर्मर गे हरकट ती बग्गे ती बग्गे चि'ऊ र'अदस।

6
लिकिन आस दुई भिदी मनके ती मला, पत्त'अना संगे ने'अना र'ई। एन्देरगेका नॆ दुई भिदी मनारकी ने'अदस, आस ताका ती अत्र इत्र मन्ना समुदर ता लहरा लेक्‍खा र'अदस।

7
एन्ने दुई भिदी मनू आलस तान उर्बस ती इन्द्रिइम ख़क्खोन एन्ने मल सोचना र'ई।

8
आ आलस दुई मति ही आलस र'अना ती आस तंग्है उर्मी नलख नू धर'ऊ मल्ला।

9
पत्त'ऊ भईस नॆ कीड़ा र'अस, आस धर्मेस तंगा गे चिच्का बॊलता ही मेच्‍छा ओहदा नू फुलई मन्दस नेकअन।

10
लिकिन पत्त'ऊ भईस नॆ उरुब र'अदस, आस धर्मेस तंगा गे चिच्का बॊलता ही लुदऊ जिया ही चड्डे फुलई मन्ना र'ई, एन्देरगेका आस लट्टी ही पूंप लेक्खा नठार'ओ क'ओस।

11
बीड़ी अर्गी ख़ने, बिड़ना झोला ती लट्टी चड़मी अरा अदही पूंप निदगी क'ई अरा अदही फबना उधियार'ई क'ई। अन्नेम उरुब आलस हूँ तंग्‍है उर्मी नलखन नन्नुम बारिम नठार'ओस कालोस।

12
बिढ़्रनन सह'ऊ आलासिन धर्मेस आसीस नन्दस। एन्देरगेका आस आ बिढ़्रना नू बड़ियर र'अना ती उजगो आलस उरखका ख़ॊख़ा, धर्मेस तंग्हा नू चोन्हा ननुर गे चि'ओन एन्ने गच्छरका जनमजुग उज्जना ही इनामन आस ख़क्खोस।

13
बिढ़्रना बारी नॆ हूँ “धर्मेस एंगन बिढ़दस” एन्ने मल ब'अना र'ई। एन्देरगेका धर्मेसी बिढ़ना एकअम मलदौ कत्‍था ती मना पुल्ली, मलता आस तानिम नॆक'आनिम बिढ़दस।

14
लिकिन ओर्मर तम्है तम्है मलदौ चिबाख़ारना ती मॊंहरनर ती बहकारनर ती बिढ़्रनर।

15
तहाँ ई चिबाख़ारना बग्गे मन्ना ती पापन कुन्द्रत'ई, अरा पाप परदी क'ई ख़ने, आद जनमजुग खे'अना तरा कड़हाब'ई।

16
अना एंग्‍है चोन्‍हा भईरो, अमके फोक्र'आ।

17
उर्मी दौ अरा बॆस इनाम धर्मे बंगस ती बर'ई, नॆ मेर्ख़ा ता उर्मी बिल्लिन गढ़चस। आस ऎख़ अड्डा अड्डा बदलारना बेसे बदलार'ऊ मलदस।

18
आस तान गढ़चका उर्मी नू नाम ओन मदहे ती पहिल ख़ंजपा मना गे तंग्‍है मने ती तंग्है मानी कत्‍था ती नमन पुना गढ़चस।

19
अना एंग्‍है चोन्हा भईरो, ई कत्‍थन नीम अख़'आ हो'आ का, अक्कु नीम ओर्मर मेन्ना नू लॆम मिनुर मना। अरा ब'अना नू अरा कैर मन्ना नू दीरी नना।

20
एन्देरगेका आलर ही कैर धर्मेस बेद्दना उजगो उज्जनन मल उन्द्र'ई।

21
औंगे उर्मी मदहे ही सोतबोड़'आ अरा मलदौ नलखन निम्है उज्जना ती तरकूटी नना ती निम्है जिया नू धर्मेसी चाँख़का कत्‍था आबोन लुदऊ ती इंझ्र'आ। आ कत्था निम्‍है जियन नाड़ा गे सवंगिय र'ई।

22
अक्कु ती नीम धर्मेसी कत्‍थन मिनुर लेका मला, अदही लेक्खा ईकू मना। मला होले नीम नीमिम फोक्र'ऊ र'अदर।

23
एका ओर्तस कत्‍थन मेन्दस अरा अदही लेक्‍खा मल नन्दस, आस ऐना नू तंग्‍है मुहिन ईरू आलस लेक्‍खा र'अदस।

24
आस गा तंगन ऎरदस ती किर्रिम बि'अदस ख़ने, लॆम मॊध्रदस कादस का तान एकासे रहचस।

25
लिकिन नॆ नमा गे छछिन्‍द चि'ऊ ई निंद्रका नॆग नू चिहुंक ती जिया लगा ब'अते र'अदस, आस तान एन्द्रन मेंजकादस अदिन मल मॊध्रदस ती अदही लेक्खा नलख नन्तेम र'अना र'ई। अन्नेम आस नन्दस होले, आस एन्द्रन नन्दस अइय्या आसीस ख़क्‍खोस।

26
नीकईम तंगन भगतस एन्ने सोचदस, लिकिन तंग्है बइय्यन मल सम्ड़ह'अदस होले, आस तंगन फोकाब'अदस। आसी भगती अन्‍भनियाँ मनो।

27
टुरर अरा रड़ियाहीर ही दुक्‍खे नू आरिन ऎरना ख़ॊजना, अरा तान तंगन ख़ॆख़ेल ता सोतबोड़'आ ती तरकूटी उइय्ना दिम नम्‍है धर्मे बंगासी ऎरना नू निमन अरा बिगर दगहा भगती हवे।


Kurukh Bible 2014 Kurux No Data