Beblia

	२ यूहन्ना 1


नोट सहेजें

1
ई चिठी ऎन यॊहन सेयान आलन तरती र'ई। ऎन इदन धर्मेस ती चज्ज्रका मुध आली अरा अदही ख़द्दर गे लिखदन। मानिम नू ऎन निमन चोन्हा नन्दन। ऎन लेका मला, एकार धर्मेसी मानिमन अख़नर, अबड़ा ओर्मर निमन चोन्हा नन्नर।

2
नम्है नू र'अना आ मानी ही चड्डेम ऎम ई लेक्खम चोन्हा नन्दम। ई मानी नम्है गने हुल्लो गूटी बन्चका र'ओ।

3
मानी अरा चोन्हा नू ईकू नमा गे धर्मे बंगस अरा बंगासी ख़द्दस येसु मसीस तरती मया, अरा सोग्गे, अरा कोड़े मनन नेकअन।

4
धर्मे बंगस ती ख़क्ख्रका पॆसका ही लेक्खा निंग्है ख़द्दर ती जोक्कोर मानी नू ऎकनन ईरकन ती ऎन कोड़हे रिझ मंजकन।

5
अनय आली, ऎन अक्कु निंगा गे पुना पॆसकन मल लिखदन। नाम ऒड़ तिम ख़क्ख्रका पॆसकन दिम लिखदन ती निंगन गोहरारदन का नाम ओर्त ओर्त गने चोन्हा नन्ना र'ई।

6
नाम धर्मेसी पॆसका गुट्ठिन पॆस्रना ती उज्जना र'ई, ईदिम चोन्हा हवे। अरा नीम ऒड़ तिम मेंजका लेक्खा नीम चोन्हा नन्ना ही उज्जनन उज्जना र'ई, ईदिम आसी पॆसका हवे।

7
ई ख़ॆख़ेल नू बग्गे भुरइ'ऊ आलर चॊचका र'अनर, आर मल पत्त'अनर का येसु मसीस आल कया नू मंजस ती ख़ॆख़ेल नू बरचस। ईरिम भुरइ'ऊ अरा ठकवा मसी हिकनर।

8
नीम चिहुंक र'आ, होले नीम एन्देरगे कोड़हे नलख नंजकादर अदही ख़ंजपन मल एब्स'ओर, अरा निम्है सुसर गे धर्मेस ती गोट्टा ख़ंजपन ख़क्खा ओंग्दर।

9
एकास मसीसी सिखाब'अना नू बन्चका मल रहचका ती अइय्या ती चाड़दस, आस गे धर्मेस गने नता मल र'ई। लिकिन एकास मसीसी सिखाब'अना नू बन्चका र'अस, आस गे धर्मे बंगस अरा ख़द्दस इरबर ही गने नता र'ई।

10
एकअम ओर्तस निम्है गुसन बर'ओस ती मसीसी ई सिखाब'अना ती नन्ना कत्थन सिखाब'अदस होले, आसिन निम्है एड़पा नू अमा परघ'आ अरा आसिन मोंजरा हूँ अमा नना।

11
एन्देरगेका एका ओर्तस एन्ने आलासिन मोंजरा नन्दस, आस आसी मलदौ नलख गुट्ठी नू मेस्रदस।

12
निमा गे लिख'आ गे नगदे कत्था र'ई, लिकिन ऎन कागज अरा सियाही ती लिख'आ मल बेद्ददन। ऎन निम्है गने भेंटार'ओन ती छम्‍हा छम्‍हें कछनख्र'ओन। एकत्रु नम्है रिझ्रना अउर कोड़हे मनो क'ओ।

13
निंग्है बहिन एकाद धर्मेस ती चज्ज्रकी र'ई, अदही ख़द्द-ख़र्रर निंगन मोंजरा नन्नर।


Kurukh Bible 2014 Kurux No Data