Beblia

	Kurukh Bible 2014 Kurux प्रकाशित वाक्य 1


नोट सहेजें

1
ईद येसु मसीसी चिच्का दहदर हवे। चाँड़हेम मन्ना कत्था गुट्ठिन तंग्है जॊंख़र गे ऎद'आ गे धर्मेस ई दहदर आबोन येसु मसीस गे चिच्चस। येसुस तंग्है पैकासिन तइय्यस ती तंग्है जॊंख़स यॊहनस गे इदन अख़ताचस।

2
यॊहनस धर्मेसी कत्‍था ही पत्त नू अरा येसु मसीसी गोवाह ही पत्त नू तान ईरका उर्मी ही गोवाह चिच्‍चस।

3
एकास धर्मेस ती मुन्द तिंका ई कत्‍था गुट्ठिन पढ़'उस अरा मिनुर अरा इय्या लिखचका लेक्खा ईकुर धर्मेस ती आसीस ख़क्ख'ऊ र'अनर। एन्‍देरगेका इबड़ा कत्था मन्ना ही बेड़ा हेद्दे अंड़सकी र'ई।

4
ऎन यॊहन आसिया देस ता अबड़ा सतियो कलीसिया गुट्ठी गे एन्देर लिखदन का: नॆ र'अदस, अरा रहचस, अरा बर'ऊ र'अदस आ धर्मेस ती निमा मया अरा कोड़े बर'अन नेकअन। अरा आसी बॆल-गदिया मुन्दहारे र'ऊ सतियो बॊलता गुट्ठी ती,

5
अरा येसु मसीस ती निमा मया अरा कोड़े बर'अन नेकअन। मसीस दिम पत्त'अना जॊगे गोवाह, अरा केचका ती उज्‍जा चो'अना नू जेट्ठा, अरा ख़ॆख़ेल ता उर्मी बॆलारिन राजी ननू र'अदस। आस दिम नमन चोन्‍हा नंजस ती नमन तंग्‍है ख़ॆंस ती नम्‍है पाप गुट्ठी ती नाड़ियस।

6
अरा आस तंग्‍है बंगस धर्मेसिन सुसर नना गे नमन ओन्टा राजी अरा नैगर कमचस। आसी महबा अरा सवंग आस गे हुल्‍लो ती हुल्‍लो गूटी मनन नेकअन! आमेन!

7
ऎरा! आस बदाली गुट्ठी गने बर'ऊ र'अदस। ओर्मर आसिन ऎरोर, नॆ आसिन जोबचका रहचर आर हूँ आसिन ऎरोर। ख़ॆख़ेल ता उर्मी जातियर आसी चड्डे चींख़ोर ओलख़ोर। हाँ, ईद मनो दिम। आमेन!

8
नॆ र'अदस, अरा रहचस, अरा बर'ऊ र'अदस, अरा उर्मी ती सवंगिय र'अस, आ धर्मे उर्बस ब'अदस, “ऎन अल्‍फा अरा ओमेगा हिकदन।”

9
ऎन यॊहन निम्‍है भई हिकदन, अरा ऎन निम्है लेक्खा येसुस गने चॊख़रना नू अरा खिलपत चॊदना नू अरा धर्मेसी राजी ही आल मन्ना नू अरा खतिर गने दुक्खे सारना नू निम्है गने मेस्र'ऊ हिकदन। धर्मेसी कत्‍था तेंगना ही चड्डे अरा येसुसी गोवाह र'अना ही चड्डे दंडे ही रूपे नू ऎन पतमॊस नामे टापू नू रहचकन।

10
उर्बासी उल्‍ला नू ऎन नेम्हा बॊलतासी आकुस नू मनरकी महबा नना लिक्कन ख़ने, एंग्है ख़ॊख़ा तरा पेंड़हे ही ख़रख़ना लेक्‍खा जॊरसरिया सड़न मेंजकन।

11
आ सड़ा एन्ने बाचा का, “एन्‍देर एन्‍देर नीन ऎरदय, अदिन ओन्टा पुथी नू लिख'आ ती, इफेसुस, स्मुरना, पेरगमोन, थुअतीरा, सरदीस, फिलदेलफिया, अरा लवोदिकेया नगरे ही सतियो कलीसिया गे तइय्या चि'आ।”

12
एंग्‍है गने कछनख्र'आलिया आ सड़न ऎरा गे ऎन किर्रे ईरकन। ऎन किर्रे ईरकन ख़ने, ऎन सात गोटा सोना ही बिल्‍ली पटनी गुट्ठिन ईरकन।

13
अरा अबड़ा सतियो बिल्‍ली पटनी गुट्ठी ही मझी नू ओन्टा मनवा ख़द्दस लेक्‍खा ओर्तोसिन ईरकन। आसी अत्तका किचरी गुंड़ख़ी गूटी दिगहा रहचा, अरा एंवख़ नू सोना ही गतला नंजका रहचस।

14
अरा आसी कुक्‍कु अरा चुट्टी पंडरू तूली अरा कीबा लेक्‍खा पंडरू रहचा। अरा आसी ख़न्न गौंगौंरना चिच्‍ची लेक्‍खा रहचा।

15
अरा आसी ख़ेड्डे पसरा नू पान्ताचका पितल लेक्‍खा बिल्‍चा लगिया, अरा आसी सड़ा बग्गे अम्मु ही हउकारना लेक्‍खा रहचा।

16
अरा आस तंग्है तीना ख़ेक्खा नू सात गोटा बीनको धरचका रहचस। अरा आसी बई ती ओन्टा अखी-पखी धारे तलवार उरखा लगिया। अरा आसी मुंही लोहाड़ी बेड़ा ता बीड़ी लेक्‍खा बिल्‍चा लगिया।

17
आसिन ईरकन ख़ने, ऎन आसी ख़ेड्डे नू केचका लेक्‍खा खत्रकन केरकन। ख़ने आस तंग्है तीना ख़ेक्खन एंग्है मइय्याँ नंजस ती बाचस, “अमा एल्‍चा, ऎन मुन्द ता अरा ख़ॊख़ा ता हिकदन।

18
अरा ऎन उज्‍जू र'अदन। ऎन केचका केरकन, लिकिन ऎरा, ऎन हुल्‍लो ती हुल्‍लो गूटी उज्‍जू र'अदन। अरा खे'अना अरा नरक गड्डी ही कुची गुट्ठी एंग्‍है गुसन र'ई।

19
औंगे एकाबड़ा कत्‍थन नीन ईरकय, अरा एकाबड़ा कत्‍था अक्कु मना लगी अरा इदही ख़ॊख़ा मन्ना र'ई, अबडा उर्मिन लिख'आ।

20
एका सतियो बीनको गुट्ठिन एंग्‍है तीना ख़ेक्खा नू नीन ईरकय, अरा अबड़ा सतियो सोना ही बिल्‍ली पटनी गुट्ठी ही गम एन्ने र'ई। सात गोट बीनको सात कलीसिया ही पैकर हवे, अरा सात गोट बिल्‍ली पटनी सात कलीसिया हवे।


Kurukh Bible 2014 Kurux No Data