Beblia

	Lahu Bible 2020 Tawˇ naˉ ve li‸ 17


Save Notes

1
Nyi ma gawˬ lehˍ ve hkʼaw lo hkaoˍmonˇ teˇ hkʼeh‸ gʼa caˇ ve lehˬ, deˇ da‸ ya‸ da‸ ve hkʼaw lo hti caˇ hti dawˬ chehˇ ve a‸ kehˉ da‸ leuˉ ve yoˬ.

2
Cuˇ yiˍ cawˬ ve awˬ ceˬ paˍ lehˬ, te‸ chiˉ tcuhˉ kuiˬ maˇ cawˬ ve awˬ shehˍ hpaˇ ve yaˇ paˍ awˬ hkʼoˆ awˬ hoˉ gʼa te leh, awˬ shinˉ hta‸ htawˇ gʼa puiˉ ve yoˬ.

3
Hpu shi hta‸ aˬ miˬ hkʼaw lawˇ nyi ve hkʼe, chaw yaˇ ve nyi ma hta‸ Gʼuiˬsha lawˇ nyi ve yoˬ.

4
Heˍ puiˉ ve chaw lehˬ heˍ ve tawˇ hta‸ na yuˬ ve yoˬ.

5
Haˍ ve gʼawˇ ve chaw hta‸ maˇ shawˍ maˇ caˆ te ve chaw lehˬ, yawˇ hui hta‸ te hpanˍ shehˍ hpaˇ Gʼuiˬsha hta‸ maˇ shawˍ maˇ caˆ te ve yoˬ. Shu dawˇ haˍ ve hta‸ mawˬ leh ha lehˬ chehˇ ve chaw lehˬ, ciˍ yanˍ ve hta‸ gʼa hkanˍ tuˬ yoˬ.

6
Yaˇ paˍ teˇ hpaˍ lehˬ a shu yawˇ ve awˬ pa hta‸ nyi leh ha lehˬ chehˇ ve hkʼe, chaw mawˇ teˇ hpaˍ htawˇ a shu yawˇ ve awˬ hawehˍ hta‸ nyi leh ha lehˬ chehˇ ve yoˬ.

7
Chaw luˬ paˍ lehˬ awˬ bon cawˬ ve tawˇ hta‸ maˇ yaw puiˉ.

8
Shu geh la‸ shawnˍ yuˬ caˇ ve lehˬ faˍ te ve hkʼe yoˬ, teh‸ chaw teˇ hpaˍ hpaˍ dawˇ ve yoˬ. Oˇ ve lehˬ laiˉ ceuˬ te puiˉ ve yoˬ, teh‸ yonˍ ve yoˬ.

9
Shu nawˬ hta‸ nyi ma cawˇ piˇ lawˬ gaˇ ve kʼo, yawˇ hui nawˬ hta‸ te ya‸ laˇ ve hta‸ venˇbaˆ hpehˇ piˇ-oˆ. Shu te ya‸ laˇ ve hta‸ tawnˇ taˍ ve chaw lehˬ, awˬ chawˇ hta‸ gʼa hpaˆ da‸ puiˉ ve yoˬ.

10
Cuˇ yiˍ cawˬ ve chaw hta‸ teˇ pawˆ ceh deˇ maˍ piˇ ve lehˬ, chaw luˬ paˍ hta‸ teˇ ha hkʼe jaw‸ maˍ piˇ ve a‸ kehˉ henˇ yuˬ gʼa ve yoˬ.

11
Sho‸ sha‸ tuˬ te hkʼeh ve chaw haiˬ teˇ hpaˍ geh suh ve awˬ ceuˬ gaˬ la tuˬ yoˬ.

12
Awˬ yehˇ mehˉ kʼai ve yehˬ miˉ tawˍ hta‸ gʼa hpuˇ da‸ ve lehˬ, haiˬ ve kanˉ hkʼaˇ gu chehˇ ve chaw luˬ paˍ hta‸ gʼa hpuˇ da‸ ve a‸ kehˉ da‸ leuˉ ve yoˬ.

13
Nawˬ lehˬ da‸ ve awˬ tan maˇ da‸ ve hta‸ kʼaw‸ te hkʼaw‸ piˇ ve kʼo, nawˬ ve yehˬ hkʼaw maˇ da‸ ve awˬ ceuˬ hta‸ teˇ pawˆ ka‸ yuˬ baˬ gʼa tuˬ ve maˇ heˆ.

14
Tawˇ gʼawˬ da‸ ve lehˬ iˉ kaˆ gʼuiˬ hkʼaˇ pe‸ tawˆ la ve hkʼe hpeh‸ ve yoˬ. Maˇ jaˇ la sheˍ htaˇ haˆ haˆ hpehˇ cawˇ ve yoˬ.

15
Te‸ chiˉ ya‸ kuiˬ maˇ cawˬ ve chaw hta‸ ciˍ yanˍ piˇ leh, haiˬ ve chaw hta‸ hkʼe leˇ ponˬ piˇ ve hta‸ Gʼuiˬsha canˇ ve yoˬ.

16
Hpu piˇ leh chaw luˬ paˍ hta‸ cuˇ yiˍ henˇ tcuh ve lehˬ, te‸ chiˉ awˬ bon maˇ cawˬ. Awˬ lawn kʼo, yawˇ shiˍ puiˉ ve nyi ma maˇ cawˬ ve pa taw yoˬ.

17
Awˬ chawˇ teˇ hpaˍ lehˬ teˇ gʼaˇ hta‸ teˇ gʼaˇ ha‸ da‸ puiˉ ve yoˬ. Teˇ gʼaˇ loˍ htaˇ teˇ gʼaˇ maˇ ga da‸ ve kʼo, awˬ viˉ awˬ nyi hpeh‸ ve htawˇ aˬ hto‸ ma tcuhˉ kuiˬ cawˬ le.

18
Te‸ chiˉ maˇ dawˇ nyi puiˉ ve chaw lehˬ, shu ve jeˬ hta‸ ga shaiˍ laˇ tuˬ kʼoˆ puiˉ ve yoˬ.

19
Venˇbaˆ hta‸ ha‸ ve chaw lehˬ dawˇ haˍ tuˬ hta‸ ha‸ ve chaw hpeh‸ ve yoˬ. Tawˇ uiˍ tawˇ mvuh yaw ve chaw lehˬ dawˇ haˍ tuˬ hta‸ ca chehˇ ve chaw hpeh‸ ve yoˬ.

20
Haiˬ ve hta‸ dawˇ leh kʼoˆ chehˇ ve chaw lehˬ da‸ ve awˬ ceuˬ hta‸ ca mawˬ tuˬ ve maˇ heˆ. Dawˇ haˍ tuˬ hta‸ tiˉ gʼa mawˬ tuˬ yoˬ.

21
Haiˬ ve kanˉ hta‸ tiˉ te chehˇ ve yaˇ paˍ lehˬ awˬ pa hta‸ dawˇ haˍ tuˬ leh, nyi ma luˬ tuˬ te piˇ chehˇ ve yoˬ.

22
Ha lehˬ puiˉ ve chaw lehˬ chehˇ sha puiˉ ve yoˬ. Hkʼaˬ htaˆ ka‸ dawˇ haˍ chehˇ ve chaw lehˬ awˬ meu-eˇ awˬ meu-eˇ suh kʼai chehˇ ve yoˬ.

23
Awˬ liˇ awˬ hkʼaˇ maˇ da‸ ve suhˉ jehˬ shehˍ hpaˇ lehˬ baˬ kuiˬ lo la‸ shawnˍ yuˬ caˇ ve yoˬ. Hteˇ ve cawˇ ve hkʼaw suhˉ maˇ jehˬ puiˉ.

24
Cuˇ yiˍ cawˬ ve chaw lehˬ awˬ bon cawˬ ve kanˉ hta‸ te tuˬ dawˇ nyi puiˉ ve yoˬ. Ya‸ hkʼaˇ, chaw luˬ paˍ lehˬ yawˇ dawˇ tawˆ ve hkʼe te kʼai ve yoˬ.

25
Haiˬ ve yaˇ paˍ lehˬ yawˇ ve awˬ pa hta‸ dawˇ haˍ piˇ leh, yawˇ ve awˬ e hta‸ dawˇ tuiˬ gaˇ tui‸ piˇ lawˬ ve yoˬ.

26
Te‸ chiˉ ya‸ kuiˬ maˇ cawˬ ve chaw hta‸ meuˉ caˇ ve lehˬ maˇ cawˇ. Da‸ ve chaw hta‸ ciˍ yanˍ piˇ ve kʼo, hteˇ ve cawˇ ve awˬ ceuˬ mehˉ kʼai ve yoˬ.

27
A shu yawˇ awˬ to hta‸yonˍ gʼa ve chaw lehˬ, tawˇ laiˉ hkawˇ maˇ yaw. Ta‸ iˉ gawˬ lehˍ chehˇ puiˉ ve chaw lehˬ, dawˇ shiˍ puiˉ ve chaw hpeh‸ ve yoˬ.

28
Tawˇ maˇ yaw leh ta‸ iˉ gawˬ lehˍ chehˇ taˍ ve kʼo, chaw luˬ paˍ hta‸ htawˇ cuˇ yiˍ cawˬ ve chaw, teh‸ shu dawˇ puiˉ ve yoˬ.


Lahu Bible Edited 2020 Lahu Bible Edited © Thailand Bible Society and Bible Society of Myanmar, 2010, 2020