Beblia

	Lahu Bible 2020 Tawˇ naˉ ve li‸ 25


Save Notes

1
Tawˇ chi teˇ hpaˍ lehˬ, Yuˇda‸ jawˇmawˇ Heˍsaˍkiˆ ve hawˉ yehˬ hkʼaw bvuh‸ yuˬ taˍ ve Sawˉla‸monˍ ve tcuhˉ kuiˬ naˉ ve tawˇ teˇ hpaˍ hpeh‸ ve yoˬ.

2
Awˬ ceuˬ hkʼa peu-eˬ ve hta‸ faˉ taˍ gʼa ve Gʼuiˬsha hta‸ ngaˬ hui taˍ uiˍ ve yoˬ. Awˬ ceuˬ teˇ hpaˍ hta‸ hpeu‸ maˍ laˇ gʼa ve jawˇmawˇ teˇ hpaˍ hta‸ ngaˬ hui taˍ uiˍ ve yoˬ.

3
Jawˇmawˇ teˇ gʼaˇ dawˇ nyi chehˇ ve awˬ ceuˬ hta‸ nawˬ shiˍ maˇ hpeh‸. Mvuhˇ naw ma mvuh leh laˇ tsuhˇ gʼuiˬ naˉ ve hkʼe, yawˇ ve dawˇ hkʼaˇ hta‸ ngaˬ hui gʼa‸ maˇ mi taˬ.

4
Hpu hta‸ lawˍ ve kʼo da‸ jaˇ ve hpu hta‸ gʼa ve yoˬ.

5
Haiˬ ve dawˇ hkʼaˇ piˇ shehˍ hpaˇ teˇ hpaˍ hta‸ jawˇmawˇ geh gʼa‸ kʼoˬ ve kʼo, mvuhˇmiˬ hkʼaw hteˇ ve cawˇ ve awˬ ceuˬ kʼaw‸ cawˬ la tuˬ yoˬ.

6
Nawˬ jawˇmawˇ gʼuˇ suhˍ lo huˉ chehˇ ve kʼo, chaw uiˍ teˇ gʼaˇ hkʼa shuˍ caˆ muiˬ ve hkʼaw tawˇ yaw ve taˇ te.

7
Da‸ ve chehˇ kuiˬ lo mui tcuh laˇ ve lehˬ, nawˬ mui taˍ ve mui hkʼawˇ awˬ nu ve chaw uiˍ teˇ gʼaˇ hta‸ gʼa kʼaw‸ piˇ ve a‸ kehˉ da‸ leuˉ ve yoˬ.

8
Nawˬ hkʼa gʼa mawˬ ve awˬ ceuˬ shaˉ nanˉ lo haˆ taˇ ca gʼuiˇ hto piˇ. Nawˬ a‸ kehˉ shiˍ ve chaw teˇ gʼaˇ ca kʼaw‸ hto gaˬ la leh, nawˬ kʼoˆ ve hkʼe maˇ heˆ ve kʼo hkʼaˬ hkʼe te tuˬ le.

9
Nawˬ ve dawˇ hkʼaˇ leh shu ve dawˇ hkʼaˇ maˇ hawˍ da‸ ve kʼo, cawˇ da‸ tuˬ haˆ haˆ te-o. Faˉ taˍ cawˇ ve awˬ ceuˬ shu hta‸ taˇ hto piˇ.

10
Oˇ hkʼe te ve kʼo, nawˬ lehˬ shaˍ ti‸ maˇ cawˬ ve chaw hpeh‸ ve hta‸ shu shiˍ la leh nawˬ gʼa ya‸ taw tuˬ yoˬ.

11
Da‸ ve dawˇ hkʼaˇ hpeu‸ maˍ laˇ ve lehˬ, hpu hkʼeun hta‸ tcuhˉ taˍ ve shi hkʼe hpeh‸ ve yoˬ.

12
Na yuˬ gaˇ puiˉ ve chaw hta‸ shaˍ ti‸ piˇ ve tawˇ hkawˇ lehˬ, awˬ hpfuhˇ hkʼaˆ jaˇ ve shi la‸ peˍ leh shehnˉ shiˍ a‸ kehˉ da‸ leuˉ ve yoˬ.

13
Gʼaˇ va gʼa ve awˬ ceˬ paˍ lehˬ mvuhˇ cha chiˆ htaˇ gʼa dawˬ ve iˉ kaˆ hkʼa shuˍ, awˬ shehˍ hpaˇ hta‸ nyi ma sha piˇ ve yoˬ.

14
Shu hta‸ piˇ tuˬ ka ti‸ te taˍ ve htawˇ maˇ piˇ ve chaw lehˬ, mvuhˇ yeˬ shiˍ ce la piˇ maˇ gʼa ve moˬ hkʼe hpeh‸ ve yoˬ.

15
Tawˇ nuˇ lehˍ yaw ve lehˬ, heh jaˇ ve nyi ma hta‸ nuˇ la piˇ leh, uˉ peunˍ shehˍ hpaˇ teˇ hpaˍ hta‸ htawˇ na sha piˇ lawˬ ve yoˬ.

16
Pehˇ gʼuiˬ hta‸ nawˬ loˍ ve a‸ kehˉ taˇ caˇ. Caˇ maˇ kʼo hpe‸ tuˬ yoˬ.

17
Nawˬ paˇ nawˬ kui chehˇ ve chaw hui geh teˇ hkui teˇ hkui taˇ ca guiˇ. Yawˇ nawˬ hta‸ nyi bawˬ leh canˇ tuˬ yoˬ.

18
Maˇ heˆ heˆ ve shaˉ hkiˆ hkanˍ ve lehˬ, aˉ hte‸ leh hkaˆ ce hkʼa shuˍ kawˆ tuˬ uiˍ jaˇ ve yoˬ.

19
Sho‸ sha‸ ve awˬ yanˇ awˬ hkʼaw lo, yonˍ maˇ gʼa ve chaw hta‸ gʼaˇ va ve lehˬ, ciˬ maˇ cawˬ ve chaw awˍ caˇ ve, leh hkui luˬ paˍ ya‸ kʼaw toˇ ve hta‸ shuˍ ve yoˬ.

20
Nyi ma maˇ sha ve chaw hta‸ kʼa muiˬ hkawˇ kʼa maˍ piˇ ve lehˬ, mvuhˇ kaˆ yanˇ htaˇ shu ve aˉ po‸ hta‸ kʼehˆ baˬ piˇ ve, leh hkʼaw taˍ kuiˬ hkʼaw aˉ leh‸ cu keu piˇ ve hkʼe hpeh‸ ve yoˬ.

21
Nawˬ ve canˇ paˍ awˍ meu‸ ve kʼo caˍ piˇ-oˆ. Iˉ kaˆ shiˉ ve kʼo taw piˇ-oˆ.

22
Oˇ hkʼe te ve kʼo, yawˇ mehˆ hpfuhˇ haw leh Gʼuiˬsha htawˇ nawˬ hta‸ awˬ bon na‸ laˇ tuˬ yoˬ.

23
Awˬ na hpawˇ ve mvuhˇ haw meuˆ laˬ kʼo mvuhˇ yeˬ laˬ ve hkʼe, teˇ gʼaˇ ve awˬ lawn teˇ gʼaˇ kʼoˆ da‸ ve kʼo nyi ma gʼa zuhˆ ve yoˬ.

24
Tawˇ maˇ ve awˬ miˇ ma geh yehˬ hkʼaw gʼa chehˇ ve a‸ kehˉ, yehˬ hkʼoˆ lo ca taˆ mui taˍ ve lehˬ leuˉ leh da‸ jaˇ ve yoˬ.

25
Vuiˇ ve mvuhˇmiˬ lo gaˬ la ve da‸ ve awˬ lawn sha tanˇ lehˬ, iˉ kaˆ shiˉ chehˇ htaˇ gawˬ lehˍ ve iˉ kaˆ teˇ kawˆ gʼa dawˬ ve hkʼe hpeh‸ ve yoˬ.

26
Haiˬ ve chaw hui ve dawˇ hkʼaˇ hta‸ ha‸ yuˬ ve chaw lehˬ, kuiˇ nuˬ ve nanˬ bawˍ leh, tiˬ jaˇ ve iˉ kaˆ lawˬ hkʼe hpeh‸ ve yoˬ.

27
Pehˇ gʼuiˬ caˇ maˇ ve kʼo maˇ da‸. Awˬ me‸ awˬ hponˇ hta‸ ca ve chaw lehˬ, awˬ me‸ awˬ hponˇ luˬ kʼai tuˬ yoˬ.

28
Yeunˇ hkanˍ puiˉ ve nyi ma maˇ cawˬ ve chaw lehˬ, lanˇ venˇ maˇ cawˬ ve venˇ hta‸ shuˍ ve yoˬ.


Lahu Bible Edited 2020 Lahu Bible Edited © Thailand Bible Society and Bible Society of Myanmar, 2010, 2020