Beblia

	Lahu Bible 2020 Oˉ kʼoˍ pui ve li‸ 1


Save Notes

1
Gʼuiˬsha lehˬ aˉ po kʼo bon yehˬ hkʼaw chehˇ taˍ leh, Moˉseˍ hta‸ oˇ kaˬ lo kuˬ yuˬ peuˬ hkʼaw‸ nawˉ,

2
Iˉsaˍreˍlaˆ chaw teˇ hpaˍ ca tuˉ tanˇ la ve teˇ yanˇ, yawˇ hui hkʼaˬ hkʼe te cawˇ ve awˬ lawn yawˇ hta‸ kʼoˆ maˍ piˇ ve yoˬ. Chaw teˇ gʼaˇ Gʼuiˬsha hta‸ ca tuˉ tanˇ la ve teˇ yanˇ, tuˉ tanˇ tuˬ yuˬ veu laˇ ve nuˇ, yawˬ, aˉ che‸ oˇ ve lehˬ yawˇ ve ceˇ gʼa hpeh‸ ve yoˬ.

3
Yawˇ yuˬ veu laˇ ve tuˉ tanˇ tuˬ oˇ ve lehˬ, te‸ chiˉ awˬ kuiˉ awˬ haiˇ maˇ cawˬ ve ceˇ gʼa hpeh‸ ve yoˬ. Gʼuiˬsha yawˇ ve tuˉ tanˇ tuˬ hta‸ ha‸ yuˬ hpeh‸ tuˬ, yawˇ lehˬ ceˇ oˇ ve hta‸ bon yehˬ yehˬmiˉhpe‸ lo gʼa chiˇ a‸ piˇ ve yoˬ.

4
Chaw oˇ ve lehˬ, yawˇ ve la‸ sheh ceˇ oˇ ve oˉ kʼoˍ hkʼoˆ gʼa taˍ ve yoˬ. Oˇ hkʼe te ve kʼo, yawˇ ve venˇbaˆ hta‸ hpehˇ piˇ tuˬ awˬ pon, tuˉ tanˇ piˇ ve ceˇ oˇ ve hta‸ ha‸ yuˬ piˇ tuˬ yoˬ.

5
Yawˇ lehˬ ceˇ oˇ ve hta‸ oˇ kaˬ lo gʼa tiˇ pehˍ ve yoˬ. Aˍronˍ awˬ ceuˬ awˬ hkʼaˇ paw hkuˇ teˇ hpaˍ lehˬ, awˬ suhˍ hta‸ yuˬ leh aˉ po kʼo bon yehˬ yehˬmiˉhpe‸ lo cawˬ ve tuˉ tanˇ kuiˬ hta‸ gʼa hpeh‸ pfuhˍ piˇ ve yoˬ.

6
Oˇ hkʼe te peuˬ hkʼaw‸ nawˉ, chaw oˇ ve lehˬ ceˇ oˇ ve hta‸ gʼa hpaˆ ve yoˬ.

7
Paw hkuˇ teˇ hpaˍ lehˬ, tuˉ tanˇ kuiˬ hkʼoˆ lo suhˆ gʼawˆ hpoˆ leh aˬ miˍ gʼa ceh ve yoˬ.

8
Yawˇ hui lehˬ suhˆ awˬ hkʼoˆ lo nuˇ shaˍ, nuˇ oˉ kʼoˍ leh nuˇ chu teˇ hpaˍ gʼa yuˬ teh ve yoˬ.

9
Chaw oˇ ve lehˬ, nuˇ gʼuˬ tehˆ leh hkui sheh teˇ hpaˍ hta‸ gʼa tsuhˇ baˬ ve yoˬ. Peuˬ hkʼaw‸ nawˉ, nuˇ oˇ ve hta‸ gʼa tuˉ tanˇ ve yoˬ. Chi hkʼe ve tuˉ tanˇ tuˬ lehˬ, awˬ shaˉ hawnˉ leh Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ.

10
Chaw teˇ gʼaˇ lehˬ, yawˇ ve yawˬ maˇ heˆ kʼo, aˉ che‸ yuˬ veu laˇ leh ca tuˉ tanˇ la ve kʼo, ceˇ oˇ ve lehˬ awˬ paˍ gʼa hpeh‸ leh, te‸ chiˉ awˬ kuiˉ awˬ haiˇ maˇ cawˬ ve ceˇ gʼa hpeh‸ ve yoˬ.

11
Yawˇ lehˬ, yawˬ ehˉ oˇ ve hta‸ tuˉ tanˇ kuiˬ awˬ na hpawˇ lo gʼa tiˇ pehˍ leh, paw hkuˇ lehˬ awˬ suhˍ hta‸ yuˬ leh tuˉ tanˇ kuiˬ hta‸ gʼa hpeh‸ pfuhˍ piˇ ve yoˬ.

12
Chaw oˇ ve lehˬ, yawˬ ehˉ oˇ ve hta‸ hpaˆ leh tawˆ hpoˆ peuˬ hkʼaw‸ nawˉ, paw hkuˇ lehˬ shaˍ oˇ ve teˇ hpaˍ, oˉ kʼoˍ leh awˬ chu hkʼa peu-eˬ ve hta‸ tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ.

13
Chaw oˇ ve lehˬ, awˬ gʼuˬ tehˆ leh hkui sheh teˇ hpaˍ hta‸ gʼa tsuhˇ baˬ ve yoˬ. Paw hkuˇ lehˬ tanˇ tuˬ oˇ ve Gʼuiˬsha hta‸ gʼa tuˉ tanˇ piˇ ve yoˬ. Chi hkʼe ve tuˉ tanˇ tuˬ lehˬ awˬ shaˉ hawnˉ leh Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ.

14
Chaw teˇ gʼaˇ lehˬ, ngaˆ ehˉ teˇ hkeh yuˬ veu laˇ leh ca tuˉ tanˇ la ve kʼo, ngaˆ oˇ ve lehˬ aˉ pui kʼaˍ, maˇ heˆ kʼo guˇ gʼa hpeh‸ piˇ ve yoˬ.

15
Paw hkuˇ lehˬ, ngaˆ oˇ ve hta‸ tuˉ tanˇ kuiˬ lo yuˬ kʼai leh, kʼawˍ suhˉ cheˆ peuˬ hkʼaw‸ nawˉ, oˉ kʼoˍ shiˍ hta‸ tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ. Tuˉ tanˇ kuiˬ hta‸ ngaˆ suhˍ gʼa hpeh‸ pfuhˍ piˇ ve yoˬ.

16
Yawˇ lehˬ ngaˆ pehˬ pui leh, awˬ hkʼaw ve teˇ hpaˍ hta‸ hkʼaw‸ laˉ yuˬ baˬ kuiˬ, tuˉ tanˇ kuiˬ mvuhˇ nyi tawˆ hpawˇ lo gʼa yuˬ baˬ ve yoˬ.

17
Yawˇ lehˬ toˍ la‸ kʼuˉ nyiˇ paˉ hta‸ yuˬ taˍ leh, awˬ to hta‸ shaˉ hkoˇ peuˬ hkʼaw‸ nawˉ, tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ. Chi lehˬ Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ.


Lahu Bible Edited 2020 Lahu Bible Edited © Thailand Bible Society and Bible Society of Myanmar, 2010, 2020