Beblia

	Lahu Bible 2020 Gaˍlaˍtiˆ li‸ 1


Save Notes

1
Ngaˬ tcuh yaˇ hpeh‸ ve Pawˇlu‸ leh ngaˬ geh chehˇ ve awˬ viˉ awˬ nyi hkʼa peu-eˬ lehˬ, Gaˍlaˍtiˆ mvuhˇmiˬ awˬ hkʼaw lo cawˬ ve Hkri‸ yaˇ awˬ moˍ teˇ hpaˍ hta‸ li‸ bvuh‸ laˇ ve yoˬ.

2
Ngaˬ tcuh yaˇ hpeh‸ ve lehˬ, chaw yaˇ geh lo gʼa ve maˇ heˆ. Chaw yaˇ hta‸ pa taw hpeh‸ la ve ka‸ maˇ heˆ. Yeˍsuˆ Hkri‸ leh yawˇ hta‸ suh kuiˬ lo kʼaw‸ te‸ tu la piˇ shehˍ hpaˇ Awˬ pa Gʼuiˬsha hta‸ pa taw hpeh‸ la ve yoˬ.

3
Awˬ pa Gʼuiˬsha leh ngaˬ hui ve Jawˇmawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.

4
Jawˇmawˇ Yeˍsuˆ Hkri‸ lehˬ, ngaˬ hui ve Awˬ pa Gʼuiˬsha ve a loˍ cawˇ ve hkʼe, haiˬ ve chi teˇ ca‸ na‸ awˬ hkʼaw lo ngaˬ hui hta‸ ponˬ laˇ tuˬ, ngaˬ hui ve venˇbaˆ hta‸ pa taw ngaˬ hui awˬ pon yawˇ awˬ to chiˇ a‸ piˇ ve yoˬ.

5
Awˬ pa Gʼuiˬsha hta‸ co co taiˍ taiˍ chiˇ uiˍ chiˇ mvuh piˇ-oˆ. A menˬ.

6
Hkri‸ ve awˬ bon awˬ shinˉ awˬ hkʼaw lo nawˬ hui hta‸ kuˬ yuˬ taˍ ve Gʼuiˬsha hta‸ haˆ haˆ baˬ taˉ leh awˬ kaˍ awˬ nu ha lehˬ ve bon hkawˇ hta‸ nawˬ hui ha‸ yuˬ ve pa taw, ngaˬ anˇ jaˇ ve yoˬ.

7
Awˬ kaˍ awˬ nu ha lehˬ ve bon hkawˇ cawˬ tehˬ ve maˇ heˆ. Ya‸ hkʼaˇ, nawˬ hui hta‸ sho‸ sha‸ tuˬ te laˇ leh, Hkri‸ ve ha lehˬ ve bon hkawˇ hta‸ yuˬ hpfuhˆ gaˇ ve chaw teˇ hpaˍ hpaˍ cawˬ ve yoˬ.

8
Ngaˬ hui nawˬ hui hta‸ maˍ laˇ peuˬ ve ha lehˬ ve bon hkawˇ hta‸ maˇ caˉ da‸ ve awˬ kaˍ awˬ nu ve bon hkawˇ ngaˬ hui maˇ kʼoˆ, mvuhˇ naw ma tcuh yaˇ maˇ kʼoˆ, nawˬ hui hta‸ maˍ laˇ ve kʼo, hkeu ve hta‸ gʼa hkanˍ piˇ-oˆ.

9
Ponˬ laˬ htaˇ ngaˬ hui kʼoˆ taˍ ve hkʼe, ngaˬ teˇ pawˆ kʼaw‸ kʼoˆ laˇ shaˍ. Nawˬ hui ha‸ yuˬ peuˬ ve ha lehˬ ve bon hkawˇ hta‸ maˇ caˉ da‸ ve awˬ kaˍ awˬ nu ve bon hkawˇ, chaw teˇ gʼaˇ gʼaˇ nawˬ hui hta‸ maˍ laˇ ve kʼo, hkeu ve hta‸ gʼa hkanˍ piˇ-oˆ.

10
Ngaˬ chi hkʼe kʼoˆ ve lehˬ, chaw yaˇ nyi ma cawˇ tuˬ ngaˬ te ve laˇ. Maˇ heˆ kʼo, Gʼuiˬsha nyi ma cawˇ tuˬ ngaˬ te ve laˇ. Chaw yaˇ hui nyi hkʼaˇ suh tuˬ ngaˬ ca ve laˇ. Chaw yaˇ hui nyi hkʼaˇ suh tuˬ ngaˬ ca chehˇ sheˍ ve hkʼe kʼo, ngaˬ lehˬ Hkri‸ ve awˬ ceˬ hpeh‸ ve maˇ heˆ.

11
Awˬ viˉ awˬ nyi teˇ hpaˍ-oˬ, ngaˬ maˍ piˇ taˍ ve ha lehˬ ve bon hkawˇ lehˬ, chaw yaˇ geh lo tawˆ la ve maˇ heˆ teh‸, ngaˬ nawˬ hui hta‸ hkʼa deh‸ shiˍ tcuh laˇ gaˇ ve yoˬ.

12
Awˬ lawn kʼo, chaw yaˇ geh lo ngaˬ gʼa ve maˇ heˆ. Shu ngaˬ hta‸ maˍ laˇ ve ka‸ maˇ heˆ. Yeˍsuˆ Hkri‸ ngaˬ hta‸ hpeu‸ maˍ laˇ ve pa taw gʼa ve yoˬ.

13
Yuˇda‸ ve awˬ liˇ awˬ hkʼaw lo ngaˬ chehˇ sheˍ ve teˇ yanˇ, ngaˬ hkʼaˬ hkʼe te ve awˬ lawn hta‸ nawˬ hui kaˇ jaw ve yoˬ. Oˇ htaˇ, Gʼuiˬsha ve Hkri‸ yaˇ awˬ moˍ hta‸ ngaˬ gʼaˇ hte‸ fawˉ mehˍ leh, luˬ kʼai tuˬ te ve yoˬ.

14
Ngaˬ ve awˬ puˍ awˬ pi hui teh taˉ laˇ ve awˬ liˇ teˇ hpaˍ hta‸ te tuˬ ngaˬ nyi ma pfuhˇ jaˇ ve pa taw, ngaˬ ve chaw ceuˬ awˬ hkʼaw lo a sha‸ ngaˬ hkʼe ceh ve chaw maˇ-awˍ ve a‸ kehˉ Yuˇda‸ awˬ liˇ hta‸ ngaˬ te ve yoˬ.

15
Ya‸ hkʼaˇ, ngaˬ maˇ paw la sheˍ htaˇ ka‸ ngaˬ hta‸ leuˆ yuˬ leh, yawˇ ve awˬ bon hta‸ pa taw ngaˬ hta‸ kuˬ yuˬ laˇ ve Gʼuiˬsha lehˬ,

16
yawˇ ve Yaˇ hpu awˬ lawn ha lehˬ ve bon hkawˇ chi, buiˇshaˆaˉnaˆ chaw hui hta‸ maˍ piˇ tuˬ, yawˇ a loˍ cawˇ ve hkʼe, yawˇ ve Yaˇ hpu ngaˬ hta‸ yawˇ hpeu‸ maˍ laˇ ve yoˬ. Chi hkʼe hpeu‸ maˍ laˇ peuˬ hkʼaw‸ nawˉ, chaw yaˇ geh ngaˬ ca jehˬ da‸ ve maˇ heˆ.

17
Chi hkʼoˆ ka‸, ngaˬ tcuh yaˇ maˇ hpeh‸ la sheˍ htaˇ tcuh yaˇ hpeh‸ chehˇ taˍ ve, Yeˍruˆsaˍlehnˍ venˇ hkʼaw lo chehˇ ve chaw teˇ hpaˍ geh ngaˬ maˇ kʼai. Aˍraˆ mvuhˇmiˬ lo ngaˬ kʼai leh, awˬ hkʼaw‸ nawˉ Daˍmaˍsehˆ venˇ lo kʼaw‸ la ve yoˬ.

18
Oˇ ve hkʼaw‸ nawˉ, shehˆ hkʼaw‸ gaˬ ve teˇ yanˇ, Keˍhpaˆ geh ngaˬ ca guiˇ-e tuˬ Yeˍruˆsaˍlehnˍ venˇ lo kʼai leh, yawˇ geh teˇ chi ngaˇ nyi hkʼa gaˬ chehˇ taˍ ve yoˬ.

19
Jawˇmawˇ Yeˍsuˆ ve awˬ nyi paˍ Yaˍko hta‸ maˇ heˆ kʼo, awˬ kaˍ awˬ nu tcuh yaˇ teˇ gʼaˇ hta‸ ka‸ ngaˬ maˇ mawˬ.

20
(Ngaˬ nawˬ hui hta‸ li‸ chi hkʼe bvuh‸ laˇ ve lehˬ, ngaˬ heˍ ve maˇ heˆ teh‸, Gʼuiˬsha mehˆ gʼuˇ suhˍ ngaˬ kʼoˆ ve yoˬ.)

21
Oˇ ve hkʼaw‸ nawˉ, Suˇriˆ leh Kiˇliˇkiˆ mvuhˇmiˬ lo ngaˬ kʼai ve yoˬ.

22
Oˇ htaˇ, Yuˇda‸ mvuhˇmiˬ awˬ hkʼaw lo cawˬ ve Hkri‸ yaˇ awˬ moˍ teˇ hpaˍ ngaˬ hta‸ maˇ mawˬ jaw sheˍ.

23
Ponˬ laˬ htaˇ ngaˬ hui hta‸ fawˉ mehˍ laˇ jaw ve teˇ gʼaˇ lehˬ, oˇ htaˇ yawˇ te luˬ chehˇ ve yonˍ ve teˇ ceuˬ hta‸ chi beu‸ bon maˍ chehˇ ve yoˬ teh‸, kʼoˆ ve awˬ hkawˇ hta‸ ceh tiˉ yawˇ hui gʼa kaˇ ve yoˬ.

24
Ngaˬ hta‸ pa taw yawˇ hui Gʼuiˬsha hta‸ chiˇ uiˍ chiˇ mvuh ve yoˬ.


Lahu Bible Edited 2020 Lahu Bible Edited © Thailand Bible Society and Bible Society of Myanmar, 2010, 2020