Beblia

	Lugbara Bible E'yo O'beza 17


Save Notes

1
Enyasa a’wiru nyale de asi anzuru ciri eri onyiru aga jo gapi tre omu nyazasi te agata gazani ovuzu ciri ra.

2
’Ba ati’boru ’yepi onduasiri nga adri opiru mva adaru drinza fepiri ma drilia, azini eri nga kari nya adripi nde ’diyi ma eselia.

3
Okalamvu ovu dahabu o’bizu,, azini ad ’ba oka dipirini ovu mele o’bizu, te Yehovani ’ba ma asi o’bini.

4
’Ba azi onzi ’yepiri ’ba asi tile onziri erizu; azini ’ba inzo lipiri bile co andre onzikanyaruri erizu’i.

5
’Ba ’ba alioru ’bapi aparakaruri eri Mungu eri ’Bapiri o’da; ’ba ovupi ayikosi ’ba azini ma ocokosiri ngani ece panga isukokoru ku.

6
A’bianzi yi oku dizaru ’ba deza ’diyini, azini anzi ma diza atipi yi’i.

7
E’yo ’yole onyiru turi sini ’ba ondua kokoruri ku; agapiri, tile inzo lipiri sini opimva ku.

8
Afa feza ’ba ti razuri si ekile nyoro aje amboru berile agu fepiri ma milia; ka i oja pari ngoaria ti, eri nga ovu drilebaru.

9
’Ba ’ba azini ma ezata ozipiri eri ’di leta nda, te ’ba e’yo onzi ojipi dika dikari eri agyi ma esele co ra.

10
’Ba ka ega ’ba e’yo vaza beri ma dria, e’yoni fi eri asia tu aga e’yo fipi ’ba ondua kokoruri ma asia cota turu alusiri ra.

11
’Ba onzini geri nda kiri ini mbuzu amve, e’yo ’disi yi nga ojio yiki kokoruri ma ti pe eri vu’i.

12
Onyiru ’ba ma fu dri nguru ’bani anzini ’duleri be aga dri fuzu ’ba ondua kokoru onduaako ini ma aliari beri ra.

13
’Ba e’yo onzi omvipi e’yo onyiru ma pariari, e’yo onzi ngani aku erini ku aluni ku.

14
Awata ma e’doza ovu ekile ’bani yi bileri ma geri lulerile; e’yo ’disi mi ku agata gaza ja de nga ’ba awani yi ma eselia onzi ku.

15
’Ba ’ba onzi ’diyi lapi kililiruri, azini ’ba ’ba kililiruri ma e’yo lipi onzi akari yi iri tro afa Yehovani ngule onzi’diyi.

16
’Ba ondua kokoruri ’du aje ondua jezuri i ma dria a’disi ya, de isu asini econi e’yoni vazaru ku?

17
Agu ma agyini eri le etu dria le le, azini osi adripi ’bani ’ba aza kozu etu candinirisi.

18
’Ba e’yo vaza kokoruri zi i dri tualu ’ba azini be, afa toboru fezu ’ba i aku ejeleari ma milia.

19
’Ba ezata lepiri le ’di awatani; ’ba i ma jotile ’bapi uru afusiri eri ’di dri jaza nda.

20
’Ba asia lokiri beri isuni onyi ku, ’ba andre amboru beri e’de candi ma alia.

21
’Ba ’ba ondua kokoruri lipiri ti mva nde candi fezu dri; azini ’ba ondua kokoruri ma ati ovuni ayiko be ku.

22
Asi ayikoru ovu aro onyiruri, te asi nyozaru fe falani ovu a’wiru.

23
’Ba onziri enze afa feza ’ba ti razuri i ma aga tiasi geri e’yo liza kililiruniri ezazu.

24
’Ba e’yo vaza beri fe dri ondua vualeru, te ’ba ondua kokoruri ma mile ovu anguni ti asirialeru.

25
Mva ondua kokoruri candi fe i ati drini, azini fe candi okangaliru andri i osi piri dri.

26
Silingi lizu ’ba kililiruri ma dria akari ovuni onyiru ku; ’ba onyiru cozuri ovuni onyiru ku indi.

27
’Ba e’yo ’yopi wereri ovu nita be, azini ’ba asi anzururi ovu ’ba e’yo vaza beri’i.

28
’Ba ka ovu ondua kokoru ti, eri ka adri ciri ’ba nga ega eri ovu ’ba onduaruni; eri ka i ma tile bi ci, ’ba ega eri ’ba e’yo vaza beri.


E’yo Siza Alatararu Munguniri BIBLIA Bible in Lugbara © United Bible Societies, 1966.