Beblia

	Lugbara Bible Galatiaa 1


Save Notes

1
Paulo ’ba ti peleri-ti pezaniri engani ’ba vu ku, ovuni geri ’ba vurisi ku, te Yesu Kristosi, azini Mungu Ata eri engapi ’ba draza eseliarisi indi-

2
adripi dria ovupi ma be ’diyi pie, Kanisa Galatiaa ’diyi vu:

3
’Yeta anzutiri pi ma ovu emi vu asi anzuru be engazu Mungu Ata pi vu Opi Yesu Kristo be,

4
eri fe i ngulupi azi onzi amanisi, eri ma onze ama ewu onzi curu’dori ma alia beni, ekile Mungu ama Atani lelerile;

5
diza ma ovu eri vu ewu vusi ewu vusi. Amena,

6
Ma osu tu emini emi ojale mbeleru ’doni, ’ba emi omvepi ’yeta anzutiri Kristoni ma aliari kuzu, e’yo baru andiniri a’izu ’dinirisi-

7
eri andini yo, te ’ba azini emi asi ezapi ’diyi indi, yi le e’yo baru Kristoniri ojazu ndu.

8
Te ka tro ama’i, kani malaika ’buari ti, ka e’yo baru andini olu emi tia pe lu kiri amani olule emi tia ’bori’i, eri ma ovu trizaru.

9
Ekile amani ’yole oko ’borile, ma ’yo dika curu’do ’dini, ’Ba azini kal e’yo bari ma andi olu emi tia’i, ka ovu emini a’ile ’bori’i ku, eri ma ovu mzaru.

10
Curu’do ma le ’ba ma inzi ma,kani ma le Mungu ma inzi mani ya? Kani ma o’bi ayiko fezu ’ba dri ya? Ma ka te ayiko fe ’ba dri ’dani, te’do ma ovuni ati’bo jeza Kristoni ku.

11
Te ma fe emi ma ni, adripi, kini e’yo bari mani oluleri engani ’ba vuku.

12
Ma a’ini eri ’ba vu ku, ’ba ada imbani mani eri onizuni ku indi, te Yesu Kristo ece eri ma dri lecetasini.

13
Te emi eri adriza ndra mani inzita ’ba Yahudini ma aliari ma e’yo ’bo, kini ma adri ndra kanisa Munguni inza aga ra, ma eza eri ra;

14
azini kini inzita ’ba Yahudini ma alia, ma aga agyi mani i ovuzu yi be anziaziru suru mani ma ’alia ’diyi kakau ra, azita ama a’bipini idrile ’diyi ma avani ma vale tu turisi.

15
Te o’du Mungu ma pepi ndu engazu ma andri ma opojoa, ma omvepi ’yeta anzutiri erinisirini

16
lezu Mvi erini ecezu ma alia, ma ma olu ani e’yo bari erini ’ba Jururu ma eselia benirisi, o’du ’dasi coti ma ecini ti e’yo nzezu ’ba rua ari beri be ku,

17
ma tuni vini Yerusalemua ’ba ovupi ti peleriru ma drilia oko ’diyi vu ku indi, te ma fu mu Arabua; ma nga emvi dika Damasikia ndo.

18
Vilerisi, eli na ma vutia, ma nga tu uru Yerusalemua Kefani nizu, ma nga ovu eri be o’du mudri drini towi.

19
Te ma ndreni ’ba ti opele ’diyi ma azini aluni ku, pe kiri lu Yakobo Opi ma adri’i.

20
(Mi ndre, Mungu ma milia, ma lini inzo le’yo mani sile emi vu’diyisi ku!)

21
Vutinia ma mu angu Suria pi ma ageia Kilikia beria ndo.

22
Te kanisa Yudiaa ovupi Kristo ma alia ’diyi nini ndra nga ma mile ku;

23
yi eri kiri bilesi a’dule kini, ’Ba ndra ama inzapiri, eri curu’do a’ita ndra erini ezaleri ma e’yo olu’i.

24
Yi fe diza Mungu dri e’yo manisi.


E’yo Siza Alatararu Munguniri BIBLIA Bible in Lugbara © United Bible Societies, 1966.