Beblia

	Lugbara Bible Yakoboni 1


Save Notes

1
Yakobo, ati’bo Munguni azini Opi Yesu Kristoniri, Suru mudri drini iri yi erepi ndu ndu ’diyi vu: Ma zi emi ci ci,

2
Emi ka ovu obeta ndu ndu ma alia, ma adripi, e’yo ’diri ma ovu emi dri ayikoru,

3
emini niria o’biza a’ita emini o’bizuri eri asi teza eji.

4
Emi ku asi teza ma de azi ini dri fuzu ’yeke, emi ma ovu ani fudri ci afa dria be ’yeke, emini ani ecezu e’yo alunisi ku.

5
Te ’ba azini emi eselia ka ece onduasi ra, eri ma zi Mungu afa fepi ’ba dria dri avasi, egapi ’ba dria kuri ma tia, eri nga ovu fezaro eri dri.

6
Te eri ma zi a’itasi, abaza kokoru, te ’ba asisile abaza beri si ekile yi mbuza mirini olini drole azini adile ’dale’dolerile.

7
Agu nderi ma ega, i asia kini i nga afa azini isu Opi dri, ’dini ku;

8
eri ’ba asi iri be, oyapi oya geri ini ma aliasi driari’i.

9
Te adripi valeruri ma ovu ayiko be yini eri ’bale ururisi,

10
azini ’ba afa e’iruri ma ovu vini ayiko be yini eri ’bale valerisi, erini ngale lule va ekile ase fulerisi.

11
Te etuni adri efu oli aciru be, eri fe aseni onyu onyu; funi nga lu va, wura ndriza erini nga avi ra. ’Dinile alu indi ’ba afa e’iruri nga dri ja acita erini ma alia ra.

12
’Ba pa sopi obeta ma alia ci asi tezasiri eri drilebaru, a’disiku eri ka nga o’bita eri o’bizuri aga ’bo, eri nga ekilaza idrini Opini ndra azile ’ba eri lepi ’diyi driri isu ra.

13
’Ba ovupi obezaruri ma ’yo kini, Mungu obe mani, ’dini aluni ku; te ’ba econi Mungu obezaru e’yo onzisi ku, Mungu obeni vini ’ba ku indi;

14
te ’ba alu alu ovu obezaru li erinini eri sele jile bileni ewilerisi.

15
’Di ma vutia, li ka mva isu i alia ’bo, eri ti ezatani; te ezata nde ka mba ra, eri osi dratani.

16
Adripi mani lele ’diyi la, ’ba, ma ici emi ku.

17
Afa feza onyiru dria, azini feta kililiru ’diyi dria ibi enga uru, esizu va engazu Ata diza beri vu, Ata nde i ojapi ku ovupi endrilendri ojataniri be kuri’i.

18
Eri asini lelerisi, eri ti ama e’yo adarurisi, ama ma ovu ani afa erini ’bale ’diyi ma esele afa kapi okoriru.

19
Adripi mani lele ’diyi, emi ma ni ’diri. ’Ba dria ma ovu e’yo erizu mbele, e’yo ’yozu e’yere, adra ’bazu mbele ku,

20
a’disiku adra ’bani ’yeni e’yo kililiru Munguniri ku.

21
E’yo ’disi emi ma nze e’yo ondiru dria, azini asi onzi karakarau agapi rari pie, yi ’bezu amve, emi ma a’i e’yo ovupi sazaru emi asia ecopi orindi emini papiri asi e’yeresi.

22
Te emi ma ovu ’ba e’yo ’yepi ’diyiru, te ’ba e’yo eripi bilesi toko ’yepi ku yi ngulupi icipi inzosi ’diyiru ku.

23
Te ’ba ka ovu ’ba e’yo eripi bilesi toko ’yepi kuriru, eri ovu ekile ’ba i ma ngulupi ma mileti ndrepi mandara ma aliarile;

24
te eri ka i mileti ama ’bo, eri mu ra, coti mileti erini te e’dapi ngoni yari avi eri dri ra.

25
Te ’ba lupi azita kililiru trutaniri ma aliari, ka adri alenia ’dani, ka ovu ’ba e’yo eripi avipi mbeleri’i ku, te ’ba ’yeta ’yepi rari’i, ’ba ’diri eri nga ovu drilebaru erini ’yeta ’yeria.

26
’Ba azini ka ega i ma asia i bi dini Mungu inzizuri ’bo, de nga eri ombeni i andre ku, te eri ici i ma asi, dini agu ’dirini Mungu inzizuri eri toko.

27
Dini Mungu inzizu alaru ezata kokoru Mungu Ata ma miliari eri ’di’i imvoanzi pi andrizu awuzi pie ocoko yini ma alia, azini ’bani i ma agei tezu e’yo nyakuni kazu eri ezazu ku.


E’yo Siza Alatararu Munguniri BIBLIA Bible in Lugbara © United Bible Societies, 1966.