Beblia

	Lugbara Bible 2 Petero 1


Save Notes

1
Simoni Petero, ati’bo Yesu Kristoni azini ’ba erini tini peleri, ’Ba a’ita arikariru trotro amanirileri isupi e’yo kililiru Mungu amanirinisi, azini Yesu Kristo ama Papirinisi ’diyi vu:

2
’Yeta anzutiri pi ma ere yi drile drile emi vu asi anzuru be, Mungu pi nizu Yesu Opi amaniri be.

3
A’disiku okpo erini Mungururi fe ama dri e’yo dria capi idri pisi ’yeke, adriza ’bani ani Mungu inzizuri be ’diyi, nita ’ba ama omvepi diza i ma ngulupini pisi onyi ini beri nizurisi;

4
e’yo ’diyisi eri fe ama dri aziza erini ambo ambo arikariru ’diyi ra, emi ma ovu ani aziza ndesi adriza Munguniri be emi pazu e’yo ’ba ezapi ava onzisi nyakuarisi.

5
E’yo nde ’disi emi ma fe emi asi dria onyi o’bazu a’ita eminiri ma dria, te onyi ma dria nitani,

6
nita ma dria asi e’yo ruani gazuri’i, asi e’yo ruani gazuri ma dria asi tezani, asi teza ma dria adriza Mungu inzizuri’i,

7
adriza Mungu inzizuri ma dria leta adripi lezuri’i, te leta adripi lezuri ma dria ale ’ba dria vuri’i.

8
E’yo ’diyi ka ovu emini, yi ka ga emi alia tre, yi nga fe emini ovuzu ovu kokoru, efi ’yazu ’dani, nita Opi amani Yesu Kristoni ma alia.

9
Te ’ba ovupi e’yo ’diyi be kuri eri mileko’i, afa ogogori ndrezu a’dule’i, eri ma drini avi ojita azi onzi erini oku ’diyi wuzuri ma e’yosi ra.

10
E’yo ’disi, ma adripi, emi ma fe emi asi aga ra omveta eminiri pi ’bazu okporu opeza eminiri be, te emi ka e’yo ’diyi ’ye ra kumu ngani emi si aluni ku;

11
te ’dinile yi nga geri fe emi dri avasi fizu suru i depi ku Opi amani Yesu Kristo ama Papiriniri ma alia.

12
Awa’dini, ma nga ovu ci ngonde ’dani fezu emini e’yo ’diyi egazu, emi ka tro yi ni ra, ka tro ovu okporu e’yo adaru ovupi emi beri ma alia ti.

13
Te ma kini eri ’yeke, mani nga ovuria rua borokoru ’dori ma alia, ma ma fe emi ma enga e’yoni egazu dika,

14
mani nile ma ’ye rua mani borokoru ’dori anzu anzurisi, ekile Opi amani Yesu Kristoni ecele ma dri ’borile.

15
Te ma nga ma asi ’ba fezu emini e’yo ’diyi egazu ewu vusi dria, mani drazu ’bori ma vutia.

16
Te ama bini o’duko olule ondua ’banisi ’diyi ma vuti ku, amani okpo Opi amani Yesu Kristoni pi ma e’yo eceria emi dri emviza erini be, te ama ngulupi ndre ambo erini inzitaruri ama milesi.

17
Te eri isu inzita pi diza be engazu Mungu Ata vu, o’duko ibipi engapi diza inzitaru tori ma aliari ka eca eri vu, kini, ’Di Mvi mani lele tu ayiko Ifepi ma dri turi’i.

18
Te ama eri o’duko ibipi engapi ’bua ’diri ama’i, amani ovuria eri be oni alatararu ma dria.

19
E’yo nabiruri so pa ama dri ani okporu aga okori ra. Emi ka emi asi ’ba drinia, emi ’ye onyiru, si ekile tala dipi angu bizaruriarile, de nga angu tra ecani ku, azini leleu efuni dizu emi asia ku.

20
Te emi ma ni e’yo ’diri okorisi, kini e’yo siza nabiruri ma efi ovuni ekile ’ba alu aluni egale yi ma ngulupisirile ’dini ku.

21
Te e’yo nabiruri ma aluni ecani ndra ’bani lelenirisi ku, te ’ba yi ’yo ndra Mungusi, Orindi Alatararuni yi dri celerisi.


E’yo Siza Alatararu Munguniri BIBLIA Bible in Lugbara © United Bible Societies, 1966.