Beblia

	नुवो नेम (मेवड़ी नया नियम) 2017 इब्रानियों 12


Save Notes

1
ईं वाते जद्याँ गवा की एक मोटी भीड़ आपणाँ च्यारूँमेर हे, तो आवो, आड़ी देबावाळी हारी चिजाँ ने अन उलजाबा पाप ने छेटी करा अन ज्या दोड़ आपाँने दोड़णी हे, वींने सेण करता तका दोड़ता रा।

2
विस्वास का मालिक अन वींने सिद करबावाळा ईसू मसी का आड़ी आपाँ देकता रा। जणी आपणाँ हामें राक्या तका आणन्द का वाते लाज-सरम की चन्ता ने किदी अन हूळी पे दुक जेल्यो अन परमेसर की गादी के जीमणे पाल्डे जान बेटग्यो।

3
ईं वाते वींका आड़ी चेतो देता रो, काँके वणी वींका खिलाप में किदा ग्यो, पाप्याँ को विरोद ने ईं वाते सेण किदो, ताँके आपीं चन्ता ने कराँ अन थाकन हिम्मत ने छोड़ा।

4
पाप का विरोद में आपणी लड़ई में थाँने अतरी मेनत ने करणी पड़ी के, थाँने आपणो लुई वेवाड़णो पड़्यो वे।

5
अन थाँ वीं हिम्मत बन्दाबावाळा बचन भूलग्या हो ज्यो थाँने बेटा मानन क्यो हो के, “हे मारा बेटा, परबू को तापड़णो हलको मती जाण, वींकी फटकारऊँ हतास मती वेज्ये,

6
काँके परबू जणीऊँ परेम करे, वींने तापड़े भी हे। अन जिंने बेटो बणा लेवे हे, वींके सजा भी देवे हे।”

7
थाँ दुक ने तापड़णो जाणन सेण करलो, परमेसर थाँका हाते आपणाँ बेटा के जस्यान वेवार करे हे। अस्यो कूण बेटो वेई जिंने वींका बापू ने तापड़े?

8
यद्याँ थाँने हाराई बाळकाँ का जस्यान ने तापड़या ग्या हे, तो थाँ थाँके बाप की ओलाद ने हो अन ने हाँची ओलाद हो।

9
पछे जद्याँ आपणी देह का बापू भी आपाँने तापड़े हे अन आपाँ वाँकी इजत करा हा, तो पछे आपाँने आपणाँ आत्मिक बापू का क्या में भी रेणो छावे, जणीऊँ आपाँ जीवता रेवा।

10
आपणाँ देह का बापू थोड़ीक देर का वाते जस्यान वाँने बड़िया लागो, आपाँने तापड़्या। पण परमेसर तो आपाँने आपणी भलई का वाते तापड़्या हे, जणीऊँ आपीं वाँकी धारमिकता में भेळा वे जावा।

11
जीं टेम तापड़्यो जावे हे तो आपाँने हव ने लागे, पण वणीऊँ दक वेवे हे, पण भी ज्यो वणीऊँ थोड़ाक टेम केड़े पाकाँ वेवे हे, वाँने धारमिकता की सान्ती को फळ देवे हे।

12
ईं वाते ढिला हाताँ अन दुबळा गोडा ने ताकड़े करो।

13
आपणाँ पगाँ का वाते हुदो अन हरिको गेलो बणावो, ताँके लंगड़ा अकड़े कोनी, पण हव वे जावे।

14
हाराई का हाते सान्ती का हाते रेवा वाते अन पुवितर वेबा का वाते हरेक तरियाऊँ कोसीस करता रेवो। काँके बना धारमिकता के कुई भी परबू का दरसण ने कर सकी।

15
ध्यान देता रेवो, अस्यान ने वे, कुई परमेसर की करपाऊँ छुट जावे। कन अस्यी कई फुट पड़ जावे, ज्या दुक देवे, अन वणीऊँ नरई मनक असुद बण जावे।

16
देको कुई भी कुकरम ने करे अन वीं एसाव के जस्यान परमेसरऊँ छेटी ने जावे ज्यो पाटवी बेटो हो अन उतरादिकार पाबा को अदिकार हो, पण वणी बेस एक दाण का खाणा का वाते वो पद बेंच दिदो।

17
थाँ तो जाणो हो, ईंका पछे जद्याँ वणी आसीस पाबा की आस किदी, तो वींने नकार दिदो ग्यो, अन वणी रो-रोन ज्यो वणी किदो हो वणीऊँ मन फेरवा को मोको होद्‍यो, पण वींने ने मल्यो।

18
थाँ इजराएली मनकाँ का जस्यान सिनाई मंगरा का नके ने आया जिंके अड़ सकता हा अन ज्यो वादीऊँ बळरियो हो, अंदारो भरियो तको हो, घोर अदंकार अन फुताळ्याऊँ भरियो तको हो।

19
रणभेरी का अवाज अन बोलबावाळा का सबदा की अस्यी अवाज हूणी, जणीऊँ हूणबावाळा अरज किदी ही के, अबे माँकाऊँ ईंके अलावा ओरी कई बाताँ मती करो।

20
काँके ज्यो आदेस दिदो ग्यो हो, वीं वींने जेल ने सक्या। काँके वाँने क्यो हो के, “यद्याँ कुई जनावर भी वीं मंगरा के अड़ी, तो वींपे भाटा भेक्या जाई।”

21
वो नजारो अतरो दरपाबावाळो हो के, मूसे खुद क्यो हो, “मूँ दरपऊँ धुँजरियो हूँ।”

22
पण थाँ सिय्योन मंगरा का नके, जीवता परमेसर का हरग का नगर यरूसलेम का नके अन हजारो हरग-दुताँ,

23
अन पाठव्या की आणन्द की सबा में मतलब जणा विस्वास्याँ का नाम हरग में लिक मेल्या हे अन हाराई को न्याव करबावाळा परमेसर का नके अन सिद बण्या तका धरमिया की आत्मा का नके,

24
अन एक नुवा वादा का बिचोलिया ईसू का नके अन छाट्याँ तका वीं लुईऊँ नके आग्या हो, ज्यो हाबिल का लुईऊँ भी बड़िया वादो करे हे।

25
ध्यान राकज्यो, के थाँ वणी बोलबावाळा ने मती नकार ज्यो। काँके जणी धरती पे चेतावणी दिदी ही, वींने नकारन वीं बंच ने सक्या, तो यद्याँ आपाँ वींने नकार देवा, ज्यो आपाँने हरगऊँ चेतावणी देरियो हे, तो आपाँ कदी दण्डऊँ बंच ने सका।

26
वीं दाण तो वणी आपणाँ बचनऊँ धरती हलई दिदी, पण अबे वणी वादो किदो हे के, “एक दाण ओरी मूँ खाली धरती नेईस ने, पण आकास ने भी हला देऊँ।”

27
अन या बात, “एक दाण ओरी” ईं बात ने परगट करे हे के, रचना किदी तकी चिजाँ मेंऊँ हालबावाळी चिजाँ नास किदी जाई, जणीऊँ ज्यो चिजाँ हाली कोनी, बेस वींइस अटल रेई।

28
अबे आपाँने एक अस्यो राज मलरियो हे, ज्यो हलायो ने जा सके हे, तो आवो, आपाँ दरपणी राकन परमेसर को आदर करता तका भगती का हाते धन्नेवाद देवा। जीं भगतीऊँ परमेसर राजी वे सके।

29
काँके आपणाँ परमेसर बाळ नाके अस्यी वादी हे।


Mewari Bible 2017 (c) 2010-2017, New Life Computer Institute. All rights reserved