Beblia

	Nouvo Testaman dan Kreol Morisien Tit 1


Save Notes

1
Mwa Pol, serviter Bondie, mo enn apot Zezi Kris ki finn swazir pou amenn bann krwayan dan lafwa ek gid zot dan laverite.

2
Zot pou gagn lesperans lavi eternel ki Bondie finn promet depi lontan. E Bondie zame koz manti.

3
Kan finn ariv lemoman, Bondie nou Sover finn manifeste so parol par enn proklamasion ki finn konfie mwa par so lord.

4
Mo adres sa let la pou twa Tit, mo vre zanfan dan lafwa. Mo priye Bondie nou Papa ek Lekris Zezi nou Sover: ki li amenn lagras ek lape lor twa.

5
Mo finn les twa dan Kret, pou terminn lorganizasion legliz ek etablir bann ansien dan sak lavil. Pa bliye seki mo finn dir twa:

6
enn pret bizin ireprosab, mari enn sel fam. So zanfan bizin krwayan ek ena bon repitasion ek bon kondwit.

7
Enn levek, antan ki enn zeran Bondie, bizin ireprosab: fode pa ki li arogan, fer koler, biver, batayer, kontan kas.

8
Okontrer, li bizin akeyan, fer dibien, ekilibre, enn dimoun zis, devoue, ki konn kontrol limem.

9
Li bizin tini ferm dan mesaz ki vre, parey kouma ti finn ansegne, pouki so lansegnman ed dimoun ek koriz bann ki opoz zot.

10
Wi, ena boukou, sirtou parmi bann sirkonsi, ki ena lespri rebel ek tronp lezot par bann bel-bel diskour kot zot koz ninport.

11
To bizin ferm zot labous. Sa bann dimoun la amenn boulversman dan bann fami ek zot pran kas.

12
Ena enn parmi, enn zot profet, ki finn dir, “Bann Kretwa enn bann manter; zot gourman ek pares kouma bebet!”

13
Sa temwagnaz la, li vre. Sa kalite dimoun la fode pa tolere. Bizin fer zot grandi dan lafwa.

14
Pa pret atansion ar tou sort kalite zistwar ki bann Zwif pe rakonte ek bann komannman imin ki fer dimoun tourn ledo ar laverite.

15
Tou kiksoz pir pou dimoun ki gard zot pir. Me pou bann ki inpir e ki pena lafwa, nanye pa pir. Zot lespri mem e zot konsians pa prop.

16
Zot dir ki zot konn Bondie, me par zot bann aksion, zot renie li. Zot enn bann rebel ki Bondie deteste ek zot pa vo nanye pou enn sou.


Morisyen Bible 2009 Mauritian Kreol New Testament © Bible Society of Mauritius, 2009