Beblia

	Nouvo Testaman dan Kreol Morisien Zak 1


Save Notes

1
Mwa, Zak, enn serviter Bondie ek Segner Zezi Kris, Mo pe salye zot tou pep Bondie disperse dan lemonn antie.

2
Mo bann kamarad, konsider li kouma enn lazwa letan zot fer fas avek bann moman eprev,

3
parski zot kone, kan zot lafwa pas par leprev, sa fer zot gagn landirans.

4
Zot landirans bizin kontigne mem pouki zot vinn parfe ek san okenn defo.

5
Si kikenn parmi zot mank lasazes, ki li demande, Bondie pou donn li. Bondie zenere e li donn tou dimoun avek enn gran leker.

6
Me demann avek lafwa, zame doute, parski seki doute li parey kouma vag lamer dirize par divan;

7
enn dimoun ki parey koumsa pa kapav atann pou gagn kiksoz avek Bondie,

8
parski li indesi e instab dan so panse.

9
Ki enn krwayan pov trouv so fierte akoz Bondie lev li lao,

10
e enn krwayan ki ris trouv so fierte akoz Bondie abes li, parski risar la pou disparet kouma enn fler dan karo.

11
Soley lev avek enn saler diplon ki bril bann plant; so bann fler tonbe e so bote disparet. Li parey avek enn dimoun ris; li pou disparet pandan ki li okipe ar so aktivite.

12
Li pou bienere sa dimoun ki tini ferm dan leprev. Bann ki prouve zot ferm pou resevwar kouronn laviktwar ki Bondie finn promet bann ki kontan li.

13
Si dimoun tante par leprev, fode pa ki li dir, “Bondie ki tant mwa.” Bondie pa kapav tante par lemal, e limem li pa tant personn.

14
Me enn dimoun, li tante par so prop dezir ki sedwir li, e ki antrenn li dan lemal.

15
Lerla, kan sa dezir la finn forme, li donn nesans pese, e kan pese grandi li donn lamor.

16
Mo bann kamarad, pa les zot anbete.

17
Tou don parfe ek tou bon kado sorti depi lao kot Bondie, Kreater lalimier. E Bondie pa sanze, li pa kre lonbraz parski li sanz pozision.

18
Par so prop volonte li finn donn nou lavi par so Parol ki laverite, pouki nou kapav vinn kouma bann premie fri kreasion.

19
Mo bann kamarad, konpran sa bien: sakenn bizin rapid pou ekoute, me pa prese pou koze, pa ankoler vit,

20
parski enn dimoun ankoler pa pou akonplir enn lavi ki drwat devan lizie Bondie.

21
Alor, rezet tou zot move manier ek zot mesanste. Me dan limilite, akeyir parol ki Bondie finn plant dan zot leker, samem parol ki pou sov zot.

22
Fodre pa ki zot anbet zotmem parski zot zis ekout so parol me zot pa met li anpratik.

23
Si kikenn ekout laparol e pa met li anpratik, li parey enn dimoun ki get limem dan laglas,

24
apre ki li finn get limem, li ale e li bliye kouma li ete.

25
Me dimoun ki persevere pou examinn vre lalwa, lalwa laliberte, e li kontign ladan avek fidelite, li pa zis kontant li ekoute, me li osi met parol la anpratik, abe sa dimoun la li pou beni dan tou seki li fer.

26
Si kikenn krwar li enn relizie e li pa vey so lalang, li pe tronp limem, so larelizion pena okenn valer.

27
Ala seki Bondie Papa konsider kouma vre relizion ki pena okenn tas: pran swin bann orfelin ek vev dan zot soufrans e pa les zot kontamine par lemonn.


Morisyen Bible 2009 Mauritian Kreol New Testament © Bible Society of Mauritius, 2009