Beblia

	KÃAB-PAALGÃ KOE-NOOGO 2 Timote 1


Save Notes

1
Maam a Poll sẽn ya a Zezi Kirist tẽn-tʋmda, Wẽnnaam daab yĩnga, sẽn zemsd ne vɩɩm kãabg ning sẽn be a Zezi Kirist pʋgẽ wã

2
n gʋlsd m bi-nongr a Tɩmote. Bɩ barka, la nimbãan-zoeere, la laafɩ sẽn yit ba a Wẽnnaam la tõnd Zu-soab a Zezi Kirist nengẽ wã zĩnd ne foom.

3
Mam pʋʋsda Wẽnnaam ning mam yaab-rãmbã sẽn dag n sakdã, la mam me sẽn sakd ne sũur kaset sẽn ya yolemdã barka. La mam ka basd tɩ pʋd fo yell m pʋʋsg pʋgẽ, wĩntoog ne yʋng ye.

4
Bala, mam ket n tẽra fo nintãmã, la mam data ne m sũur fãa n leb n yã-fo, tɩ m sũurã tõe n pid ne sũ-noogo.

5
Mam ket n tẽra tẽeb ning fo sẽn tara, sẽn ka kalem ne zãmbã yelle. Tẽ-kãng dag n zĩnda ne f yaab a Loyiis, la ne f ma a Eniisi, la mam mii m sũurẽ t'a bee ne foom me.

6
Rẽ n kɩt tɩ mam sagend foom tɩ f yãdg Wẽnnaam kũunã fo sẽn deeg ne mam nus-tikrã bugum.

7
Bala, ka rabeem Sɩɩg la Wẽnnaam kõ tõnd ye, la yaa pãnga, la nonglem, la yam Sɩɩga.

8
Da zoe yãnd ne Zu-soabã kaset fo sẽn tog n kɩsã ye, la f ra zoe yãnd mam yĩnga, mam sẽn be bi-bees roogẽ bãmb yĩngã yĩng ye. Ayo! Naag maam n nams koe-noogã yĩnga, Wẽnnaam pãngã sõngr yĩnga.

9
Yaa bãmb n fãag tõndo, la b bool tõnd bool-sõngo. La ka tõnd tʋʋm yĩng ye, yaa bãmb mengã tʋlsem la bark ning b sẽn maan tõnd a Zezi Kirist pʋgẽ hal sẽn deng wakat sẽn ka sɩngrã wakatã yĩnga.

10
Bark kãng lebga vẽeneg moasã ne tõnd fãagd a Zezi Kirist pukrã. Bãmb kɩtame tɩ kũum pãng sa, la b kɩt tɩ vɩɩm la yĩng sẽn ka kiidã yell yɩ vẽenega, koe-noogã maasem yĩnga.

11
Wẽnnaam yãka maam tɩ m yɩ koe-no-kãng moaanda, a tẽn-tʋmda, a karen-saamba.

12
Mam sakda namsg koe-noogã yĩnga, la yãnd ka tar maam ye, bala, mam mii m sẽn tẽ a soabã, la mam mii m sũur pʋgẽ tɩ b tara pãng tɩ gũ bũmb ning bãmb sẽn ning mam nugẽ wã hal tɩ da-kãng ta.

13
Gom-sõamy nins fo sẽn deeg mam nengẽ wã, tall rẽ tɩ yɩ mamsg fo yĩnga, tẽeb pʋgẽ, la nonglem sẽn be a Zezi Kirist pʋgẽ wã me pʋgẽ.

14
Bũmb ning sẽn be fo pʋgẽ wã, tall-a, Sɩɩg-sõng sẽn vɩ tõnd pʋgẽ wã maasem yĩnga.

15
Fo miime tɩ neb nins fãa sẽn be Azi wã basa maam. A Fizɛl ne a Hɛrmozɛn bee bãmb sʋka.

16
Bɩ Zu-soabã sudg a Onezifoor zaka rãmb barka, bala, a belsa maam naoor wʋsgo, la mam bãensã yãnd ka tall-a ye.

17
A pʋs n baoo maam ne a sũur fãa, a sẽn wa Rommã, hal n yãnd maam.

18
Bɩ Zu-soabã kɩt t'a paam bãmb nimbãan-zoeer da-kõng. Fo mii sõngr ning fãa a sẽn sõng maam Efɛɛsã n yɩɩd neb a taabã sẽn mi.


Mossi (SB) 1998 Moore New Testament © Bible Society of Burkina Faso, 1997