Beblia

	KÃAB-PAALGÃ KOE-NOOGO 2 Pɩyɛɛr 1


Save Notes

1
Maam a Sɩmo Pɩyɛɛr sẽn ya a Zezi Kirist yamba, la b tẽn-tʋmdã n tʋmd seb-kãnga neb nins sẽn paam tẽeb sẽn tar yõod wa tõnd dẽnda nengẽ. Yaa tõnd Wẽnnaamã ne d Fãagd a Zezi Kirist tɩrlem tʋʋmdã maasem yĩng la d paam-a.

2
Bɩ Yãmb sẽn bãng Wẽnnaam ne tõnd Zu-soab a Zezi wã kɩt tɩ y paam bark la laafɩ wʋsgo.

3
Wẽnnaam pãngã kõo tõnd bũmb ning fãa sẽn tõe n sõng tõnd tɩ d vɩɩmd Wẽnnaama tũudum pʋgẽ, la a kɩt tɩ d bãng soab ning sẽn bool-a tõnd tɩ d paam bãmb ziirã ne b sõmblemã.

4
Yaa bõn-kãens maasem yĩng la b kõ tõnd kãabs nins sẽn ya sõama la kãsemsã, tɩ yãmb sã n zoe n bas ratem-wẽnsã sẽn be dũniyã n wat ne sãoongã, kãab kãens yĩnga, yãmb na paam Wẽnnaam yalẽ wã.

5
La bõn-kãng yĩng me, maan-y y pãng sẽn tõe fãa, tɩ y tẽebã naag ne sõmblem, tɩ y sõmblemã naag ne bãngre.

6
La bãngrã pʋgẽ, bɩ y mao n paas yõk-m-menga la yõk-m-menga pʋgẽ, bɩ y paas sũ-tõogo la sũ-tõogã pʋgẽ, bɩ y paas Wẽnnaam sakre.

7
La Wẽnnaam sakrã pʋgẽ, maan-y taab ba-biir manesem la ba-biir manesem pʋgẽ, paas-y nonglem.

8
Sɩd me, bõn-kãensã sã n be yãmb pʋsẽ, la b sã n paamd pãng be n paasdẽ, b na n kɩtame tɩ yãmb maan tʋʋma la y wom biis sẽn na n kɩt tɩ yãmb bãng tõnd Zu-soab a Zezi kirist n paase.

9
La ned ning sẽn ka tar bõn-kãens yaa zoanga, la a nina mumame, la a yĩmdame tɩ yẽ paama pekr ne yel-wẽn nins yẽ sẽn da maan tɩ loogã.

10
M ba-biisi, yaa woto yĩnga, modg-y n yals-y kãenkãe Wẽnnaam sẽn bool yãmbã pʋgẽ, la b sẽn yãk yãmbã pʋgẽ, yãmb sã n maan woto, yãmb kõn tol n bʋdg n bas y tẽebã ye.

11
Yaa woto n na n kɩt tɩ b kõ yãmb noor zãnga, tɩ y kẽ tõnd Zu-soab la d fãagd a Zezi Kirist soolem sẽn kõn sa wã pʋgẽ.

12
Yaa woto yĩng tɩ mam na n tẽegd yãmb bõn-kãens daar fãa, baa ne yãmb sẽn zoe n mi-bã, la y sẽn yas kãenkãe sɩd-kãngã pʋgẽ wã.

13
Mam tagsame tɩ yaa neere, tɩ mam sẽn ket n vɩ yĩn-kiid-kãngã sẽn ya wa fu-roogã pʋga, bɩ m tẽeg-y tɩ y ra gũs ye.

14
Bala, mam miime tɩ sã n yɩ bilfu, mam na n yii yĩn-kiid-kãngã pʋgẽ, wa tõnd Zu-soab a Zezi Kirist sẽn vẽneg-a ne maama.

15
La mam na n modgame tɩ mam loogr poore, bɩ yãmb tõog n tẽegd bõn-kãens yell bũmb fãa pʋgẽ.

16
Sɩd me, tõnd ka tũnug soalem b sẽn tags n naane, n togs yãmb tõnd Zu-soab a Zezi Kirist pãn-kãsengã la bãmb waoongã yell ye, la yaa tɩ tõnd mens nin yãa bãmb ziirã.

17
Bala, bãmb deega waoogr la ziir tõnd Ba a Wẽnnaam nengẽ. Yaa bãmb sẽn wa n wʋm naam sẽn be ziirã koɛɛg sẽn gom ne bãmb n yeel tɩ: Ada yaa mam bi-ribl nongr sẽn ta mam yam zãnga.

18
Yaa tõnd sẽn wa n be tãn-sõngã zug ne bãmbã la tõnd wʋm koe-kãng sẽn yi arzãn n gome.

19
Tõnd leb n mii vẽeneg tɩ pĩnd-n-bãngr goam sẽn da togsã yaa sɩda. Yaa neer tɩ yãmb ges bõn-kãens wa y sẽn get fɩtl sẽn be zĩ-likẽ n yãgd n gũud hal beoog sẽn na n vẽeg tɩ yibeoog ãdgã yãg yãmb sũyã pʋse.

20
Sẽn deng bũmb fãa, bãng-y tɩ ned ka be n tõe n bilg Wẽnnaam gʋls-sõmyã pĩnd-n-bãngr gomd baa a yen võor ne a meng pãng ye.

21
Bala, pĩnd-n-bãngr gomd baa a ye zɩ n tol n yɩ ne ninsaal tʋlsem ye, la yaa Sɩɩg-sõng sẽn kõ bũmb ningã la ninsaalbã reegd n togsd Wẽnnaam yĩnga.


Mossi (SB) 1998 Moore New Testament © Bible Society of Burkina Faso, 1997