Beblia

	Nuer Bible 2012 Pɛl 25


Save Notes

1
Ti̱ti̱ bä kɛ ruaacni pɛli Thɔ-lo-mon tin kɔ̱ŋ, tëë ca gɔ̱r ɛ nɛɛ Ɣidh-ki-yaa Kuäär Juda.

2
Nhɔk Kuoth Nhial ni ɣöö /ca ŋɔak lat, kä nhɔk kuäär ni lat ŋɔaani raar.

3
/Ci ca̱r kua̱r dee met ŋa̱c, nɔ̱a̱nɛ ce̱tnikɛ kam puɔ̱ɔ̱rä kɛnɛ piny.

4
Woc nyäŋ cikä min bo̱r, bi bël mi gɔaa kulɛ täth kɛ jɛ.

5
Woc ti jiäk nhiam kua̱r, bi kuäärɛ rɔ kulɛ yiath piny kɛ cuŋ.

6
/Cu rɔ liak nhiam kua̱r, kä cu gua̱a̱thdɛ go̱r rɛy nath.

7
Kulɛ gɔaa ni ɣöö bɛ ji̱ jiök i̱, “Bër nhial wanɛ mi,” kä ɣöö bɛ ji̱ luɔc piny rɛy bööthni.

8
Kä mi ci nɛn kɛ waŋdu, /cu pɛ̈th kɛ naŋdɛ guäth luɔ̱k. kɛ ɣöö thilɛ mi bi la̱t mi wä gua̱n thieekädu ji̱ wä jak kä po̱c.

9
Mi latdɛ luk yɛnɛ gua̱n thieekädu, /cu ram mi dɔ̱diɛn mat thi̱n,

10
kɛ ɣöö ram ɔ bi jɛ liŋ ɔ bɛ ji̱ moc duer, a /ci kɛ̈k mi jiääk bi lɛ thuɔ̱k kä ji̱.

11
Kä ruac mi ca lat, ce̱t ta̱a̱dɛ nikɛ da̱a̱p mi ca la̱th rɛy cikä min bo̱r.

12
Kä ruac raam mi pɛl, ce̱tdɛ nikɛ ciɛk ji̱eth mi da̱a̱p, kä ram in liŋ jɛ.

13
Kä ja̱k mi gɔaa, kɔ̱cɛ ce̱tdɛ nikɛ pi̱ rɛy kayŋua̱a̱k kɛ gua̱th ŋër bɛɛl, kä nɛy tin ja̱k kɛ jɛ, jak ɛ lo̱ckiɛn kä tɛth.

14
Kä ram liak rɔ kɛ muc mi /kenɛ thöp, ce̱tdɛ nikɛ wuɔ̱n kɛnɛ jiɔam mi thil nhiaal.

15
Pɛlkɛ kuäär kɛ päl lɔaac piny, kä ruac mi gɔaa luucɛ buɔ̱m wec.

16
Kä mi ci tuaar jek cam ni min ro̱ŋ kɛ ji̱, mi wi̱i̱ jɛ ca̱m di̱t bi jɛ ŋɔk.

17
/Cu dhɔr gua̱n thieekädu jäl ɛlɔ̱ŋ, bɛ ŋɔa̱a̱ŋ kɛ ji̱ kä bɛ ji̱ lo̱k.

18
Ram lat nën kacä kɛ gua̱n thieekädɛ, ce̱tdɛ nikɛ thɛp kiɛ bäär mi moth moth.

19
Mi ŋääthi ram thil luɔt rɛy rikä, ce̱tdɛ nikɛ ley mi bɛc kɛnɛ cio̱o̱k mi ŋɔl.

20
Ram mi kɛt ram mi thiɛk lɔcdɛ kɛ dit, ce̱tdɛ kɛ ram mi ci bi̱i̱ woc puɔ̱nydɛ kɛ cäŋ kɔ̱a̱c, kɛnɛ li̱l tapä mi ca la̱th rɛy butdä.

21
Mi näk gua̱n tɛ̈ru buɔthɛ mocɛ mi̱eth, kä mi näk rɛw ɛ mocɛ pi̱w,

22
kɛ jɛn duɔ̱ɔ̱p ɛ mɔ bi moc ni lɔcdɛ pöc, kä bi Kuoth Nhial ji̱ culikä.

23
Ce̱tkɛ min la jiɔam kuec caam nhiaal a no̱o̱ŋ, inɔ bä bi lɛp mi jiääk gak nööŋ.

24
Gɔaa ni ɣöö deri cieŋ gekä duëël, kä ɣöö dërɛ duel nyuak yɛnɛ ciek mi gua̱n gaak.

25
Thok mi gɔaa mi bëë nɔ̱nä, ce̱tdɛ kɛ pi̱ ti kɔ̱c kä gua̱n rɛ̈w.

26
Gua̱n cuŋni mi gueny ram mi jiääk duɔ̱ɔ̱p, ce̱tdɛ kɛ lo̱o̱l pi̱i̱ni mi ci thia̱a̱ŋ kɛ pi̱.

27
/Cɛ gɔaa ɛn ɣöö bi tuaar cam ɛlɔ̱ŋ, kä /cɛ gɔaa ɛn ɣöö bi luth go̱r kä rɔa.

28
Kä ram /ci rɔ luth, ce̱tdɛ kɛ wec mi ci pänydɛ tɛɛth.


RUAC KUƆTH IN RƐL RƆ 2012 Nuer Bible © Bible Society in South Sudan 1998,2012