Beblia

	EKITABO EKIRIKWERA BAIBULI N'EBITABO EBY'OMUBONANO Zaaburi 106


Save Notes

1
Haleluya! Musiime Nyakubaho ahabw'okuba ni murungi; kandi rukundo ye etahararuka eba ey'ebiro byona.

2
N'oha owaakubaasa kubaruura eby'amaani byona ebi Nyakubaho yaakozire? Kandi n'oha owaakubaasa kumusingiza ekirikumara?

3
Baine omugisha abakuratira eby'oburyo, bakakora ebihikire obutoosha!

4
Ai Nyakubaho, onyijukye ahabwa rukundo ei ogirira abantu baawe, ombarire omu bu oraajune.

5
Mbone kureeba okugogyeera kw'abu waatooraine, nshemererwe ahabw'okwesiima kw'eihanga ryawe; n'ahabw'abantu baawe ahabwawe.

6
Itwe tukashiisha munonga nka baatatenkuriitwe; twakora kubi, twine orubanja.

7
Baatatenkuriitwe obu baabaire bari Misiri, tibareetegyereize by'okutangaaza ebi waakozire. Tibaraijukire rukundo mpango ya Rukiraboona etahararuka; ekyarugiremu, baamugomerera aha Nyanja erikutukura.

8
Kwonka ahabw'eiziina rye, yaabajuna, ngu aboorekye obushoboorozi bwe.

9
Yaakabukira egyo Nyanja erikutukura, yaayoma; yaabarabyamu nk'oku baraba ahoomire.

10
Yaabasikura abaabaire nibabanga; yaabaiha omu mikono y'abazigu.

11
Amaizi gaamira abaabaire nibabahata; tihaatsigaraho n'omwe.

12
Bo ahabw'okwikiriza ebi yaabaraganiise, ahoonaho baayeshongora eby'okumusingiza.

13
Kwonka bakarahuka kwebwa ebi yaakozire, tibaategyeereza kubanza kumwehabuzaho.

14
Ku baahikire omu ihamba, baitwa omugombo, baagyeza Ruhanga.

15
Yaabaha eki baamushabire, kwonka yaabarwaza omunywengyerero.

16
Ab'omu nsiisira ku baagiriire Musa eihari na Arooni orikwera wa Nyakubaho,

17
ensi yaayashama, yaamira Datani, kandi yaashweka abaayebumbire na Abiraamu;

18
omuriro gurikubuguma gwagwa aha beebumbire nabo, gwacwekyereza abo bantu babi.

19
Baakora ekishushani ky'ekimasha bari Horebu, baakiramya.

20
Omu mwanya gw'okuha Ruhanga ekitiinwa, baakiha ekishushani ky'enumi.

21
Baayebwa Ruhanga owaabajunire naabakorera ebikuru omuri Misiri,

22
eby'okutangaaza omu nsi ya Haamu, n'ebirikutiinisa aha Nyanja erikutukura.

23
N'ahabw'ekyo Ruhanga akagira ngu naija kubacwekyereza, kandi akaakikozire, kuri Musa ou yaatooraine ataramwemereire omumaisho, kuhorahoza ekiniga kye.

24
Batyo baagaya egyo nsi erikukundwa, tibaayesiga ki yaabaraganiise.

25
Baayegumira omu mahema gaabo nibeetomboita, bangire kuhurira eki Nyakubaho arikubagambira.

26
Nikyo yaarahiriire aimukize omukono, ku aribareka bakagwa omu ihamba,

27
n'ab'oruzaaro rwabo akabataataanisiza omu mahanga.

28
Bwanyima bakaihamu okwehongyera Baali y'omuri Peori, baarya ebitambiirwe emandwa.

29
Batyo ahabw'emitwarize yaabo baakwatsa Nyakubaho ekiniga, orufu rwabajuumikira.

30
Finehaasi nikwo kwimuka akabatonganira, orufu rukahongoza.

31
Okwiha obwo, ekyo kyamureetera kubarwa kuba ohikiriire, nk'oku enzaaro zaagumire nizikuratana ebiro byona.

32
Baagwisa kubi Nyakubaho aha maizi ga Meriba, ekyo kyareetera Musa ebintu kumugyendera kubi;

33
ahabw'okuba ku baamubiihiize munonga, yaagamba ebi atakugambire.

34
Tibarahwerekyereize banyamahanga nk'oku Nyakubaho yaabaragiire;

35
kureka ahabw'okushwererana nabo, baatooreza emicwe yaabo.

36
Ku baaheereize ebishushani byabo, baayeshanga baagwire omu mutego

37
ogwabareeteire kutambira emizimu abaana baabo aboojo n'abaishiki.

38
Baasheesha eshagama y'abataine rubanja, eya batabani baabo na bahara baabo abu baahongyeire emandwa za Kanaani; ensi yaahagazibwa eshagama.

39
Nikwo baayesiisire batyo ahabw'ebi baakozire, bakaba endeebya ahari Ruhanga nka maraaya.

40
Nyakubaho nikwo kubagirira ekiniga akabatamirwa kimwe,

41
Akabarekurira abanyamahanga abaabaire nibabanga, bakaba bakama baabo.

42
Ababisha baabo baabaita kubi, baabagomoora, baabategyeka.

43
Kaingi akaba abajuna, bo bamugomera nkana; batyo bongyera kweroha omu bibi.

44
Kwonka we ku yaabaire ahurira okutaka kwabo abagirira esaasi.

45
Ahabwabo akaijuka endagaano ye, n'ahabwa rukundo ye mpango etahararuka ekiniga kye kyaikaikana;

46
yaareetera abaabaire babanyagire kutuubya omwaga gu baabaire nibabaitsa.

47
Ai Mukama Ruhanga waitu, otujune, otutaaruure, otwihe omu banyamahanga, tubone kusiima eiziina ryawe eririkwera, tushemererwe nitukusingiza.

48
Mukama Ruhanga wa Isiraeli ahimbisibwe, okwiha ryari n'okuhitsya ryari! Haza abantu boona bagire bati: Amiina! Haleluya!


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.