Beblia

	EKITABO EKIRIKWERA BAIBULI N'EBITABO EBY'OMUBONANO Enfumu 17


Save Notes

1
Akatongye aku omuntu anyaata aine obusingye, nikahita obugyenyi bw'omu nju erimu entongane.

2
Omuhuuku w'obwengye aryaba mukuru w'omwana empemuzi, kandi abagane aha buhunguzi nk'abandi baana.

3
Eiziiko rishemeza efeeza, ekikoomi kishemeza zaabu, kwonka Nyakubaho acaaka emitima.

4
Enkozi y'ebibi eikiriza orukuru, kandi omunyabishuba ahurikiza eby'eitima.

5
Oteerera omworo enaku ajuma Owaamuhangire, kandi ogwo oshekyeerera abagwereirwe akagwe taribura kufubirwa.

6
Ekirunga ky'omugurusi kiba abaijukuruza; kandi ekitiinwa ky'abana baba baishebo.

7
Emigambire mirungi tegwisa gye mushema, n'omutegyeki tashemerererwa bishuba.

8
Oha enguzi aba nk'orikukora omugyereko, ei aza yoona aba gye.

9
Osaasira omushobeize asherura omukago; kwonka oijukiriza ebishobyo, ataanisa abanyamukago.

10
Okuhana kugasira omunyabwengye, okukira okuteera ekifamutima eminyaafu igana.

11
Omuntu mubi akunda kugoma, nikyo baryoherereza entumwa enshaarizi kumukwata.

12
Embu y'okubugana ekifamutima kigwire eiraro, obugana edubu eyakirwe ebyana byayo.

13
Ozimuura ekibi ahabw'ekirungi, ebibi tibirihwa mu ka ye.

14
Okwimutsya entongane ni nk'okwigurira amaizi; n'ahabw'ekyo ohungye zitakatandikire.

15
Oiha orubanja aha muntu mubi, n'osingisiriza ohikiriire, bombi baba ekihagaro ahari Nyakubaho.

16
Mbwenu shi ekifamutima kikwatira ki empiiha omu ngaro kugura obwengye, kunu kitarikwetegyereza?

17
Omunyamukago atuura aine rukundo; kandi omunyaruganda n'okukwatanisa na mwene ishe omu bihikiirizi.

18
Ekifamutima kikwatiriza, kandi kyehindura omukwato gwa mutaahi waakyo.

19
Okunda ekibi ataara entongane, n'oyetunguura asherura okucwekyerera.

20
Omuntu orikwehabagiza tatunga, kandi orikuryangatanisa agwerwa akagwe.

21
Omwana ekibura areetera ishe obusaasi; na ishe w'ekifamutima tashemererwa.

22
Omutima gushemereirwe guba omubazi murungi, kwonka omutima gucuramiriirwe gureetera omuntu kuhwa aha magufa.

23
Enyabibi eyakiira ebituga by'omu kikondooro, ngu etakurata amazima.

24
Omuntu orikwetegyereza akuratira obwengye, kwonka ekifamutima tikigira ki kyetaho.

25
Omwana ekifamutima agwisa kubi ishe, kandi areetera nyina kimuzaara obusaasi.

26
Ti kirungi kutangisa omuntu ataine rubanja; nainga kuteera omunyiginya.

27
Ogamba naayetwara, aine obwengye; kandi omucureezi aba omuntu orikwetegyereza.

28
Ekifamutima ku kiceceka, bagira ngu kiine obwengye, ku kihunama bagira ngu nikyetegyereza.


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.