Beblia

	EKITABO EKIRIKWERA BAIBULI N'EBITABO EBY'OMUBONANO Enfumu 23


Save Notes

1
Ku orishutama kurya n'omutegyeki, oyetegyereze gye ebikuri omu maisho,

2
haza waaba ori omunyamururu oyete omusyo aha mumiro.

3
Ebi arungire bitakwitsa omururu, ahabw'okuba birimu oburyarya.

4
Otarigwa ahaiguru n'oitanira eitungo, kureka ba omunyabwengye oyezibire.

5
Manya ku oriteerera oti eriisho ribura; reero ahonaaho riguruka, rituuruura nk'empungu erikuzeereera omu mwanya.

6
Otarirya ebyokurya by'omunyarwango, kandi otaryetenga ebi arungire.

7
Ahabw'okuba ari nk'oyemereza omutima naagira ati: Rya, onywe; haza atakiihire ha mutima.

8
Oryatanaka ebitongye bi oriba waaheza kurya, haza ebigaaniiro byawe birungi bife busha.

9
Otarigamba ekifamutima kikuhuriire, ahabw'okuba kiryagaya ebi waagamba ngu tibirimu bwengye.

10
Otariihaho akamanyiso k'emyatano akaatairweho ira, nari okataaha omu kibanja ky'efuuzi;

11
ahabw'okuba orikubarwanirira n'ow'amaani, kandi omu rubanja rwabo aryakushinja.

12
Ta omutima gwawe aha kuhaburwa, kandi otegye okutu ebigambo by'obwengye.

13
Otarireka kuhana omwana; nobu waakumuteeza omunyaafu, tarikufa.

14
Waamuteeza omunyaafu, biri obwo amagara ge waagatambira kushuuma owa Nyamuteza.

15
Mwana wangye, omutima gwawe ku gurigira obwengye, n'ogwangye guryashemererwa.

16
Ndyayesiima akanwa kaawe ku karigamba ebihikire.

17
Omutima gwawe gutarigirira abasiisi eihari, kureka otiine Nyakubaho eizooba ryona.

18
Buzimazima obwo oine amatsiko, kandi ago matsiko gaawe tigarifa busha.

19
Mwana wangye, hurira, kandi ogire obwengye, kandi oshoronzye gye omutima gwawe omu muhanda guhikire.

20
Otarikwatanisa n'abarikwetiiha viino, nari abariisa enyama omururu.

21
Ahabw'okuba abasinzi n'abanyamururu baryaitwa obworo, kandi okuhononoka kuryajwaza omuntu obucancabari.

22
Hurira sho owaakuzaire, kandi nyoko ku arikaikura otarimugaya.

23
Gura amazima, kwonka otagaguza; kandi ogure obwengye, okuhaburwa n'okwetegyereza.

24
Ishe w'ohikiriire aryayesiima munonga; n'ozaara omwana w'obwengye aryamunanura.

25
Sho na nyoko ka bananukye, na nyoko owaakuzaire ayesiime.

26
Mwana wangye, mpurira, kandi oyetegyereze emitwarize yangye.

27
Maraaya aba orwina ruraingwa, n'omukazi enshambani aba eiziba rifunzire.

28
Agwera nk'omwambuzi, kandi akanyisa abashaija baingi abateesigwa.

29
Enaku zigirwa oha? Obusaasi bugirwa oha? Entongane zigirwa oha? Oyetomboita n'oha? Obuhuta bwa busha bugirwa oha? Okutukura amaisho kugirwa oha?

30
Bigirwa abo abaraara enkyeera, n'abaroza viino y'enturire.

31
Otareebera viino okutukurinkana! Otagireebera okubiririra omu kikopo! Otagireebera okusheneneka aha mumiro!

32
Manya bwanyima eruma nk'enjoka, kandi eteme nk'empiri.

33
Reero amaisho gaawe gareeba ebintu okundi, omutima gwawe gugamba ebitaine nkwamo.

34
Oshusha nk'ogandaire ahagati y'enyanja, agwejegyereire aha mutwe gw'omurongooti gw'emeeri.

35
Noija kugira oti: Bampwire, tinaashaasha; banteire, tinaahurira kantu. Nsisiimukye ryari, nkaza kuvumba agandi?


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.