Beblia

	EKITABO EKIRIKWERA BAIBULI N'EBITABO EBY'OMUBONANO Hosea 2


Save Notes

1
Gambira Abaisiraeli beene sho oti: Muri abantu bangye, na banyaanyoko oti: Nimukundwa.

2
Yehanangirize nyoko, omwehanangirize, nobu araabe atakiri mukazi wangye, naanye ntakiri iba; arereere obwamaraaya, n'obushambani bwe;

3
ntakaamujweka busha, nkamutsiga ari entangaare nk'obu yaazaarwa, nkamuhindura eihamba, nkamugira nk'ensi ekarangataine, nkamwitsa eiriho.

4
N'abaana be tindibagirira saasi, ahabw'okuba n'aba maraaya.

5
Manya nyinabo akaraaya; yaababaka akozire ebirikwitsa enshoni. Ahabw'okuba akagira ati: Niinyija kukurata nkunzi zangye ezimpa ebyokurya n'ebyokunywa; ebyoya by'entaama na fulakisi, n'amajuta na viino.

6
Nikyo omuhanda gwe ndikwija kugwitsiza amahwa, nkazitira orugo rw'okumukumiirira akabura oburabo.

7
Akakurata nkunzi ze, kwonka atazihikye; akazisherura, kwonka atazibone. Reero nibwo araagire ati: Ka ngyende, ngarukire ibanye w'okubanza; ahabw'okuba buri nkaba ndi gye, okukira okundi hati.

8
Ogwo mukazi taramanyire ku niinye naabaire mmuha ebyokurya by'omujuma, na viino, n'amajuta; kandi ku niinye naamutungiise munonga efeeza n'ezaabu ezi baakoziremu Baali.

9
Nikyo ndikwija kugarukanira ebyokurya byangye by'omujuma omu igyesha, na viino yangye omu mweru gwayo; mmwakye ebyoya byangye by'entaama na fulakisi yangye, ebyakushwekire enjuuro ye.

10
Mbwenu niinyija kumujweka busha omu maisho ga nkunzi ze habure owaamuunyaka.

11
Kandi niinyija kumumaraho okushemerererwa, amagyenyi ge g'omwaka, n'ag'okwezi kubonekire, n'aga Zaasabato ze; n'ag'amagyenyi ge goona agaatairweho.

12
Reero ncwekyereze emizaabibu ye n'emitiini ye ebi yaayesiimiraine ati; Ebi n'ebihembo ebi nkunzi zangye zampaire. Haza ngihindure ekibira; enyamaishwa zigirye.

13
Mmufubire ahabw'ebiro by'amagyenyi ga Baabaali abu ayoterera obubaani, akeehunda empeta n'amahunde, akakurata nkunzi ze, Haza nyowe akaanyebwa; nikwo Nyakubaho arikugira.

14
Reeba, nikyo ndikwizira kumwetereza, nkamureeta omu ihamba, nkagamba gye nawe,

15
nkamuheerayo emisiri ye y'emizaabibu; oruhanga rwa Akori nkaruhindura Eirembo ry'amatsiko. Haza okwo niyo araayetabire, nk'obu yaabaire akiri empangare, obu yaaruga Misiri.

16
Reero Nyakubaho naagira ati: Eryo izooba nibwo orintsinda okaanyeta “Ogu”, otakiinyeta “Nyakubaho wangye”.

17
Manya ndyamuzibira kugamba amaziina ga Baabaali, garekye kugambwaho obundi.

18
Kandi eryo izooba ndyakukorera endagaano n'enyamaishwa, n'enyonyi, n'ebirikugyendesa enda aha itaka, mmare omu nsi amata, na zaarurara, n'engamba; nkureetere kubyama otaine keekyengo;

19
nkwegambire obugyenyi, obe owangye ebiro byona; mbukwegambire omu mazima n'omu bwesigwa, nkwiniire embabazi na rukundo etahararuka.

20
Ndyakwegambira obugyenyi omu bwesigwa, ompamye ku ndi Nyakubaho.

21
Kandi Mukama naagira ati: Eryo izooba ndyayetaba eiguru, ryetabe ensi,

22
n'ensi eyetabe ebyokurya by'omujuma na viino n'amajuta g'emioliva; reero nabyo byetabe Yezereeli.

23
Nyebibire Isiraeli omu nsi, ngirire Nyakwangwa esaasi; ngambire abatari bantu bangye nti: Muri abantu bangye, nabo bangarukyemu bati: Ori Ruhanga waitu.


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.