Beblia

	EKITABO EKIRIKWERA BAIBULI N'EBITABO EBY'OMUBONANO Okubara 1


Save Notes

1
Nyakubaho akagambirira Musa omu ihamba rya Sinaayi, omu ihema ry'okubugabuganiramu, aha kiro ky'okubanza eky'okwezi kwa kabiri omu mwaka gwa kabiri baherize kuruga omu nsi ya Misiri, yaamugira ati:

2
Mubare eihanga ry'Abaisiraeli ryona, nk'enganda zaabo n'emiryango ya baishenkurubo oku biri, nimubara abashaija boona, omwe-omwe nk'amaziina gaabo oku gari.

3
Abahikize emyaka y'obukuru makumi abiri n'okukiraho boona ab'omuri Isiraeli, abarikubaasa kuhurura, iwe na Arooni mubabare, nk'emitwe y'engabo zaabo oku eri.

4
Kandi omu buri ruganda harugyemu omushaija w'okukukwatsa; haza abe ari omukuru w'omuryango gwa baishenkuru.

5
Mbwenu aga nigo maziina g'abashaija abaraakwatanise naiwe. Omu ruganda rwa Reubeeni; Elizuuri mwene Shedeuri;

6
omu rwa Simeoni: Shelumieli mwene Zurishadai;

7
omu rwa Yuda Nahashooni mwene Aminadabu;

8
omu rwa Isakaari: Netaneeli mwene Zuari.

9
Omu rwa Zebuluuni: Eliyaabu mwene Heloni;

10
omuri beene Yosefu, omu rwa Efuraimu, Elishaama mwene Amihuudi, kandi omu rwa Manaase: Gamalieli mwene Pedahuzuuri;

11
omu rwa Benyamiini: Abidaani mwene Gideoni;

12
omu rwa Daani: Ahiyezeeri mwene Amishadai;

13
omu rwa Asheri: Pagieli mwene Okiraani;

14
omu rwa Gaadi: Eliyasaafu mwene Deueli;

15
omu rwa Nafutaali: Ahiira mwene Enani.

16
Abo nibo baatoorainwe omu ihanga ryona; abaabaire bari abeebembezi b'enganda za baishenkurubo, kandi bari abakuru b'emiryango ya Isiraeli.

17
Reero Musa na Arooni baatwara abo bantu abu amaziina gaabo gaagambwaho.

18
Aha kiro ky'okubanza eky'okwezi kwa kabiri, baateeranira hamwe ab'eihanga ryona, abaayehandiikiise, nk'oku enganda zaabo n'emiryango ya baishenkurubo biri. Batyo baababara nk'oku amaziina gaabo gari, okwiha aha b'emyaka makumi abiri y'obukuru n'okukiraho; omwe-omwe.

19
Nk'oku Nyakubaho yaaragiire Musa, nawe nikwo kubabarira omu ihamba rya Sinaayi.

20
Bakahandiika aba Reubeeni omujigaijo gwa Isiraeli, nk'oku obuzaare bwabo n'amaka gaabo n'emiryango ya baishenkurubo biri, kandi n'oku omubaro gw'amaziina gaabo, buri omwe buri omushaija weena ohikize emyaka makumi abiri y'obukuru n'okukiraho, boona abaabaire nibabaasa kuhurura.

21
Mpaho ab'oruganda rwa Reubeeni abaabazirwe baahika obukumi buna n'enkumi mukaaga na magana ataano.

22
Aba Simeoni boona, obuzaare bwabo, amaka gaabo n'emiryango ya ishenkurubo, abaabazirwe nibakuratira omubaro gw'amaziina gaabo omwe-omwe omushaija weena ohikize emyaka makumi abiri n'okukiraho, boona abarikubaasa kuhurura.

23
Ab'oruganda rwa Simeoni, abaabazirwe baahika obukumi butaano n'enkumi mwenda na magana ashatu.

24
Reero aba Gaadi n'obuzaare bwabo, n'amaka gaabo, n'emiryango ya baishenkurubo, abaabazirwe nibakuratira omubaro gw'amaziina g'abahikize emyaka y'obukuru makumi abiri n'okukiraho, boona abarikubaasa kuhurura;

25
omubaro gw'ab'oruganda rwa Gaadi gwahika obukumi buna n'enkumi itaano na magana mukaaga na makumi ataano.

26
Baahandiika n'Abaayuda, ab'obuzaare bwabo n'amaka gaabo n'emiryango ya baishenkurubo, nibakuratira omubaro gw'amaziina gaabo, okwiha aha b'emyaka makumi abiri n'okukiraho, buri mushaija orikubaasa kuhurura.

27
Omubaro gw'ab'oruganda rwa Yuda gwahika obukumi mushanju n'enkumi ina na magana mukaaga.

28
Omu ba Isakaari baahandiika ab'obuzaare bwabo ab'amaka gaabo n'ab'emiryango ya baishenkurubo, nk'oku omubaro gw'amaziina gaabo guri, okwiha aha w'emyaka makumi abiri n'okukiraho, omushaija weena orikubaasa kuhurura.

29
Batyo ab'oruganda rwa Isakaari abaabazirwe baahika obukumi butaano n'enkumi ina na magana ana.

30
Omu ba Zebuluuni baahandiika ab'obuzaare bwabo n'ab'amaka gaabo n'ab'emiryango ya baishenkurubo, nk'oku omubaro gw'amaziina gaabo guri, okwiha aha b'emyaka makumi abiri n'okukiraho, omushaija weena orikubaasa kuhurura.

31
Batyo ab'oruganda rwa Isakaari abaabazirwe baahika obukumi butaano n'enkumi ina na magana ana.

32
Omu ba Yosefu nikwo kugira ngu omu b'enda ya Efuraimu: ab'obuzaare bwabo n'amaka gaabo n'emiryango ya baishenkurubo, nk'oku omubaro gw'amaziina gaabo guri, okwiha aha b'emyaka makumi abiri n'okukiraho omushaija weena orikubaasa kuhurura;

33
ab'oruganda rwa Efuraimu abaabazirwe baahika obukumi buna na magana ataano.

34
Omu b'enda ya Manaase baahandiika ab'obuzaare bwabo n'amaka gaabo n'emiryango ya baishenkurubo, nibakuratira omubaro gw'amaziina gaabo, okwiha aha b'emyaka makumi abiri y'obukuru n'okukiraho, buri mushaija orikubaasa kuhurura.

35
Ab'oruganda rwa Manaase abaabazirwe baahika obukumi bushatu n'enkumi ibiri na magana abiri.

36
Baahandiika ab'oruzaaro rwa Benyamiini, nk'oku amaka gaabo n'emiryango ya baishenkurubo biri, nibabara amaziina g'abashaija boona omwe-omwe, abahikize emyaka makumi abiri n'okukiraho, boona abarikubaasa kuhurura.

37
Ab'oruganda rwa Benyamiini abaabazirwe baahika obukumi bushatu n'enkumi itaano na magana ana.

38
Baahandiika ab'oruzaaro rwa Daani, nk'amaka gaabo n'emiryango ya baishenkurubo oku biri nibabara amaziina g'abashaija boona omwe-omwe, abahikize emyaka makumi abiri n'okukiraho boona abarikubaasa kuhurura.

39
Ab'oruganda rwa Daani abaabazirwe baahika obukumi mukaaga n'enkumi ibiri na magana mushanju.

40
Baahandiika ab'oruzaaro rwa Asheri, nk'amaka gaabo n'emiryango ya baishenkurubo oku biri, nibabara amaziina g'abashaija boona abahikize emyaka makumi abiri n'okukiraho, boona abarikubaasa kuhurura.

41
Ab'oruganda rwa Asheri abaabazirwe baahika obukumi buna na rukumi na magana ataano.

42
Omu b'oruzaaro rwa Nafutaali baahandiika ab'amaka gaabo n'ab'emiryango ya baishenkurubo, nk'oku omubaro gw'amaziina gaabo gwabaire guri, okwiha aha b'emyaka makumi abiri y'obukuru n'okukiraho, abashaija boona abarikubaasa kuhurura.

43
Omubaro gw'ab'oruganda rwa Nafutaali gwahika obukumi butaano n'enkumi ishatu na magana ana.

44
Abo nibo baabazirwe Musa na Arooni, nibahwerwa abeebembezi b'Abaisiraeli, abashaija ikumi na babiri, buri omwe naajwekyera ab'enju ya ishenkuru.

45
Batyo Abaisiraeli boona abaabazirwe nibakuratira emiryango ya baishenkurubo, okwiha aha b'emyaka makumi abiri n'okukiraho, abashaija boona ab'omuri Isiraeli enkwata ngabo,

46
omubaro gwabo boona baahika obusiriira mukaaga n'enkumi ishatu na magana ataano na makumi ataano.

47
Kwonka Abaleevi n'ab'oruganda rwa baishenkurubo tibarabariirwe muri ezo nganda.

48
Nyakubaho akagambira Musa ati:

49
Ab'oruganda rwa Leevi bo otaribabara, nobu kwakuba okubabarira omu Baisiraeli;

50
kureka obahe omurimo gw'okureeberera Obutaaho bw'eby'Obuhamya n'ebintu byamwo, n'ebindi byona ebikwatiraine nabwo. Babe ab'okwekorera Obutaaho n'ebyabwo n'okubureeberera, kandi bagume bateere amahema gaabo okubwehinguririza.

51
Obutaaho ku buriba nibwimuka kugyenda, Abaleevi babe nibo baabukuura, kandi ku buriba nibuza kubyarwa, babe nibo baabwemereza. Ku harigira ondi muntu otari Muleevi yaabuhika haihi, aitwe.

52
Abaisiraeli baryaguma bateere amahema gaabo omu bimbuuro, buri muntu omu kirorero ky'abaabo n'aha rurango rwakyo.

53
Kwonka Abaleevi bo bateere amahema gaabo okwehinguririza Obutaaho bw'eby'Obuhamya, eihanga ry'Abaisiraeli ritakaagirirwa ekiniga. Kandi Abaleevi abo bagume bareeberere Obutaaho bw'eby'Obuhamya.

54
Batyo Abaisiraeli baakora byona, nk'oku Nyakubaho yaaragiire Musa.


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.