Beblia

	EKITABO EKIRIKWERA BAIBULI N'EBITABO EBY'OMUBONANO Luka 1


Save Notes

1
Ow'ekitiinwa Teofilo, abantu baingi bakateeraho kuhandiika ebyabaireho omuriitwe.

2
Haza ebyo bakabiiha aha bi twagambiirwe abaabyereebeire n'agaabo okwiha obu byatandika, kandi bakatumwa kubirangirira.

3
Mbwenu naanye, ku naaherize kubicondooza byona okwiha aha kutandika, naasiima kubikuhandiikira nk'oku byakurataine,

4
ngu obone kumanya ebi waayegyesiibwe ku biri eby'amazima.

5
Omu busingye bwa Herode omugabe wa Buyudaaya, hakaba hariho omuhongyerezi orikwetwa Zekariya ow'ab'omu rubu rwa Abiiya, n'omukazi we ow'omuri baijukuru ba Arooni, owaabaire naayetwa Elisaabeeti.

6
Bombi bakaba bari abahikiriire omu maisho ga Ruhanga, nibahikiiriza ebiragiro bya Nyakubaho byona n'ebyateirweho, bataine kamogo.

7
Kwonka bakaba bari encwekye, ahabw'okuba Elisaabeeti akaba ari engumba, kandi bombi bakaba baakuzire.

8
Mbwenu ku rwabaire ruri orubu rw'abahongyerezi abu Zekariya yaabaire arimu, Zekariya ogwo akaba naakorera Ruhanga omurimo gwe ogw'obuhongyerezi.

9
Obwo yaakwatwa enteenyu nk'oku omugyenzo gw'abahongyerezi gwabaire guri, kutaaha omu mwanya ogurikwera ogwa Nyakubaho kwotereramu obubaani.

10
Omuri ago magingo g'okwotereramu obubaani, ekimbuuro ky'abantu abarikuramya kikaba kiri aheeru nikishaba.

11
Mpaho maraika wa Nyakubaho yaamubonekyera, ayemereire aha rubaju rwa buryo orw'eitambiro eryotererwaho obubaani.

12
Zekariya ku yaamureebire, yaayekanga aitsirwe obwoba.

13
Kwonka maraika yaamugira ati: Zekariya, huumura. Manya eki otuura nooshaba kiikiriziibwe; omukazi waawe Elisaabeeti aryakuzaarira omwana omwojo, omwete Yohaana.

14
Aryakureetera okushemererwa n'okunanuka, kandi ku arizaarwa, baingi baryayesiima,

15
ahabw'okuba aryaba mukuru omu maisho ga Nyakubaho. Tarinywa viino nobu kyakuba ekirikusinza kyona. Aryaijura Mutima Orikwera akiri omunda ya nyina,

16
kandi aryagarura Abaisiraeli baingi ahari Mukama Ruhanga waabo.

17
Aryamwebembera aine omutima n'amaani nk'ebya Eliya, ahindure emitima y'abazaire, ngu bagarukane n'abaana baabo, kandi ahindure abagomi, babone kugira obwengye bw'abahikiriire, atyo atebeekanisize Mukama abantu abamweteekateekyeire.

18
Zekariya nikwo kubuuza maraika ati: Nyowe ekyo ninkihamiza hi? Ndi omugurusi kandi omukazi wangye akaikwire.

19
Maraika yaamugarukamu ati: Manya niinye Gaaburieli ogaragira Ruhanga. Mbwenu naatumwa kugamba naiwe n'okukumanyisa egyo nkuru nungi.

20
Kwonka hati nk'oku otaikiriza bi naakugambira, ebirihikiirira omu bunaku bwabyo obwatairweho, waaza kwigarwa akanwa, obure agagamba okuhitsya obu ebyo biribaho.

21
Omuri ago magingo abantu bakaguma bategyereize Zekariya, nibatangaara okureeba yaasiiba munonga omu mwanya ogurikwera.

22
Ku yaashohoire, tiyaabaasa kugamba nabo, baamanyiraho ku yaabonekyererwayo; kwonka we yaaguma naakoresa obumanyiso, orurimi rugobirwe.

23
Orubu rwe rw'okuheereza ku rwahwaire, yaagaruka omuka.

24
Ku haahingwireho akaanya, omukazi we Elisaabeeti yaabaka enda, yaamara ameezi ataano atarikureebwa naagira ati:

25
Eki nikyo Mukama ankoreire obu asiimire kuunyihaho ekihemu omu bantu.

26
Elisaabeeti ku yaabaire ahikize ameezi mukaaga aine enda, maraika Gaaburieli yaatumwa Ruhanga omu rurembo rw'omuri Galilaaya orurikwetwa Nazareeti,

27
aha mwishiki oshugaine, owaabaire ari ow'okuhingirwa omushaija orikwetwa Yosefu, ow'oruganda rwa Daudi. Omwishiki ogwo akaba naayetwa Mariya.

28
Maraika ku yaizire ahu ari, yaamugira ati: Shemererwa, iwe omutetsibwa buzima, Nyakubaho ari naiwe!

29
Mariya ebigambo ebyo byamuhuruutura omutima, yaayebuuza eki yaamuramukiza atyo.

30
Maraika nikwo kumugira ati: Mariya, huumura! Manya ohairwe obutetsi ahari Ruhanga.

31
Reeba, noija kubaka enda, ozaare omwana omwojo, omwete Yesu.

32
Aryaba mukuru, ayetwe Omwana wa Rukiraboona. Mukama Ruhanga aryamuha engoma ya Daudi ishenkuru;

33
ategyekye ab'oruzaaro rwa Yakobo obusingye bwona, n'obugabe bwe tiburihwaho.

34
Mariya yaabuuza maraika ati: Ekyo nikibaasika kita, nyowe ntaine mushaija?

35
Maraika yaamugarukamu ati: Mutima Orikwera aryakwijaho, n'amaani ga Rukiraboona gakusangire. N'ahabw'ekyo ogwo mwana aryaba Orikwera, ayetwe Omwana wa Ruhanga.

36
Kandi reeba, na Elisaabeeti, ow'oruganda rwanyu ou babaire beeta engumba, hati omu bukaikuru bwe aine enda y'omwana omwojo y'ameezi mukaaga.

37
Manya tihariho kitabaasika ahari Ruhanga.

38
Mariya nikwo kugira ati: Reeba, ndi omuzaana wa Nyakubaho, ka kibe nk'oku waagamba. Mpaho maraika amutsigaho.

39
Omu bunaku obwo Mariya akaimuka, yaayehuuta, yaaza omu kyaro eky'omu nsi y'ebibungo omuri Buyudaaya.

40
Yaataaha omwa Zekariya, yaaramutsya Elisaabeeti.

41
Elisaabeeti ku yaahuriire ati Mariya naamuramutsya, omwana yaagurukaguruka omu nda ye. Elisaabeeti yaijura Mutima Orikwera.

42
Obwo yaagamba n'eiraka rihango ati: Oine omugisha okukira abakazi boona, n'omwana w'omu nda yaawe aine omugisha!

43
Mbwenu nyowe kyandugira hi nyina wa Mukama wangye okunzindukira?

44
Reeba, ku naahurira nti nondamutsya, omwana w'omu nda yangye yaagurukaguruka ahabw'okushemererwa.

45
Buzimazima owaikiriize ebi Ruhanga yaamuraganiise ngu biryahikiirira, aine omugisha!

46
Mpaho Mariya agira ati: Amagara gangye nigahimbisa Nyakubaho,

47
n'omutima gwangye nigwesingiriza omuri Ruhanga omujuni wangye,

48
ahabw'okuba areebire obucureezi bw'omuzaana we! Mbwenu okwiha hati ab'obusingye bwona baryaguma baanyete ow'omugisha,

49
ahabw'okuba Omushoboorozi wa byona ankoreire bikuru. Eiziina rye n'eririkwera.

50
Embabazi ze azigirira abamutiina obusingye bwona.

51
Omukono gwe agukoreise eby'amaani; yaataataana ab'emitima eyetunguura.

52
Ab'obushoboorozi abaihire aha bitebe, yaatunguura abacureezi.

53
Abaine enjara yaabaigutsa ebirungi, abatungi yaababinga engaro nsha.

54
Ahweraire Isiraeli omugaragwa we, naijuka embabazi ze,

55
nk'oku yaaraganiise baatatenkuriitwe, Aburahamu n'abaijukuru obusingye bwona!

56
Mariya akaguma na Elisaabeeti ameezi nk'ashatu, bwanyima yaagaruka owaabo.

57
Ebiro bya Elisaabeeti ku byahikire, yaazaara omwana omwojo.

58
Bataahi be n'abanyabuzaare ku baahuriire oku Nyakubaho amugiriire embabazi nyingi, baashemererwa hamwe nawe.

59
Omwana ku yaahikize ebiro munaana, baija kumushara; bakaba nibenda kumweta Zekariya, eiziina rya ishe;

60
kwonka nyina yaabangira naagira ati: Ngaaha, ayetwe Yohaana.

61
Baamugarukamu bati: Ka hatariho n'omwe omu ruganda rwanyu oyetwa eryo iziina.

62
Batyo baabuzisa ishe engaro oku arikwenda ogwo mwana ayetwe.

63
Ishe yaabashaba eky'okuhandiikaho; yaahandiika ati: Eiziina rye ni Yohaana. Boona baatangaara.

64
Omuri ako kaanya orurimi rwe rwakomooroka, yaatandika kugamba kandi yaahimbisa Ruhanga.

65
Bataahi baabo boona baakwatwa obwoba; ebyabaireho byona byagambwa omu nsi ya Buyudaaya yoona ey'ebibungo.

66
Boona abaabihuriire baabigumya aha mutima nibeebuuza bati: Beitu ogu mwana aryarugamu muntu ki? Kandi buzimazima amaani ga Nyakubaho gakaguma nawe.

67
Zekariya ishe akaijura Mutima Orikwera, yaaranga ati:

68
Mukama Ruhanga wa Isiraeli ahimbisibwe, ahabw'okuba aizire kujuna abantu be.

69
Atwimukiize Omujuni w'obushoboorozi omu b'oruzaaro rwa Daudi omugaragwa we,

70
nk'oku ira yaaraganisiize omu barangi be abarikwera,

71
ngu aryatujuna abazigu, atwihe omu mikono y'abarikutwanga boona.

72
Eki akikozire kworeka embabazi ezi yaaraganiise baatatenkuriitwe, n'okwijuka endagaano ye erikwera.

73
Endahiro ei yaarahiire Aburahamu tataitwe,

74
ngu atwihe omu mikono y'abazigu baitu, tubone kumuheereza tutaine bwoba,

75
nitwera kandi tuhikiriire omu maisho ge, ebiro by'amagara gaitu byona.

76
Naiwe mwana 'we, oryayetwa omurangi wa Rukiraboona, ahabw'okuba niiwe oryebembera Mukama kumutebeekanisiza omuhanda,

77
n'okumanyisa abantu be okujunwa oku batunga baasaasirwa ebibi byabo.

78
Ruhanga waitu ahabw'embabazi ze enyingi, aryatureetera omushekye gujugute,

79
gumurikire abari omu mwirima n'omu kibunda kya rufu, n'okushoronzya ebigyere byaitu omu muhanda gw'obusingye.

80
Omwana ogwo akaguma naakura, yaahama omu mutima, kandi yaatuura omu ihamba okuhitsya obu yaayeyorekire Isiraeli.


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.