Beblia

	EKITABO EKIRIKWERA BAIBULI N'EBITABO EBY'OMUBONANO Abaheburaayo 12


Save Notes

1
N'ahabw'ekyo, nk'oku twehinguririziibwe ekimbuuro kihango kityo ekya baakareebi, ka tujuure ekintu kyona ekirikuturemeerera, n'ekibi ekitwezingiriire. Ka twirukye empaka ezituteereirweho nitugumisiriza,

2
obwo amaisho tugahangire Yesu, okomookwaho okwikiriza kwaitu kandi okuhikiiririza kimwe. Manya ahabw'okushemererwa okwabaire kumuteekateekyeirwe, akeemera omusharaba, yaagaya okuhemuka. Mbwenu ashutami aha rubaju rwa buryo rw'ekitebe ky'obugabe ekya Ruhanga.

3
Muteekateekye ahari Ogwo owaagumisiririze rwango, ei abasiisi baamugiriire; haza murekye kuruha n'okugwa enshazi.

4
Omu kurwanisa ekibi, timukeehangaine kuhika n'aha kusheesha eshagama yaanyu.

5
Mbwenu shi mwebirwe eki Ruhanga arikubeehanangirizamu nk'abaana be? Ekigira kiti: Mwana wangye, otagaya okuhana kwa Nyakubaho, n'obu kwakuba okucweka entegye, yaakufubira.

6
Ahabw'okuba Nyakubaho ou akunda, niwe ahana; kandi ou ayeta omwana we, niwe ateera.

7
Manya muri ab'okugumisiriza mwaba nimuhanwa; ahabw'okuba Ruhanga naabatwaza nk'abaana be. Mbwenu ni mwana ki, ou ishe atahana?

8
Ku muraabe mutarikuhanwa nk'abandi boona, biri muri ebizaarwa, timuri baana.

9
Naitwe tukaba tugira baatataitwe omu nsi, batuhana kandi tubatiina. Mbwenu titushemereire kukizaho kworobera Tataitwe w'emitima, haza tukagira amagara?

10
Manya baatataitwe bakaba batuhana okumara ebiro bikye, nk'oku baabaire benda. Kwonka Ruhanga atuhana ngu tugasirwe, tubone kubagana aha kuhikiirira kwe.

11
Mbwenu obwa hati, okuhanwa kwona nikushusha nk'okurikureeta obusaasi, kutari okugwisa gye. Kwonka bwanyima abakutendekirwemu kuryabarugiramu okuhikiirira n'obusingye.

12
Mwimutsye emikono yaanyu enoganogokire, muhamye amaju gaanyu agajogajogokire,

13
n'ebigyere byanyu mubicwere emihanda egororokire; abarikucumbagira barekye kuhendekyeramu, kureka bakire.

14
Mwitanire okugira obusingye n'abantu boona, kandi n'okwezibwa, ahabw'okuba tihariho orireeba Mukama ateeziibwe.

15
Mwerinde, hatakaagira owaayefeereza emigisha ya Ruhanga, omuzi gw'okusambisirwa gukabameramu, gukabaganzya, haza baingi gukabareetera okusiisikara.

16
Mwerinde, hatakaabaho omushambani, nari orikururuuhira eby'ensi nka Esau, owaagurize obuhunguzi bwe ekiihuro kimwe.

17
Nimumanya ngu bwanyima, ku yaayenzire kugarukana ogwo mugisha gw'obuhunguzi taraikiriziibwe, n'obu araabe yaagushabire naarira, ahabw'okuba akaba atakiine mugisha gw'okwegarukamu.

18
Mbwenu timwizire ha rushozi orurikuhikwaho, oruriho omuriro gurikubuguma, n'omwirima n'okwiririmba n'eihunga

19
n'eiraka ry'enzamba, kandi n'eiraka ry'ebigambo eryareeteire abaarihuriire kweshengyereza, ngu hatagira ebindi bigambo ebi baagambirwa.

20
Ahabw'okuba tibarabaasize kwemera kiragiro ekyabahairwe, nikigira kiti: Nangwa nobu eriba enyamaishwa, yaakora ahari oru rushozi, eryateerwa amabaare.

21
Buzimazima ebyabaire nibireebwa bikaba nibitiinisa. Nikyo Musa yaagiriire ati: Nyine obwoba, nintetema.

22
Kwonka imwe mwizire aha Rushozi Siyooni, omu rurembo rwa Ruhanga ohuriire, nirwo Yerusalemu ey'omu iguru, oru baamaraika abatarikubarwa bateeraniiremu nibashemererwa.

23
Mwizire omu ruteerane rw'emijigaijo eyaahandiikirwe omu iguru. Mwizire ahari Ruhanga omuramuzi wa boona, n'aha mitima y'abarikwera abaahikiiririziibwe kimwe.

24
Mwizire ahari Yesu omuteeranizi w'endagaano ensya, kandi n'aha shagama emiisiirwe, egamba ebirungi okukira eya Abeeli.

25
Mwerinde, mutanga kuhurira ogwo orikugamba. Ahabw'okuba abaayangire kuhurira owaabateisiize omu nsi, ku baraabe batarakizire, kaashwa itwe, ku twakwanga kuhurira orikututeisa naayema omu iguru!

26
Manya obwo eiraka rye rikatengyeetsa ensi; kwonka mbwenu araganiise ati: Hatsigaireyo omurundi gumwe, ntengyeetse ti nsi yonka, kureka n'eiguru naryo.

27
Ekigambo ekyo: Hatsigaireyo omurundi gumwe, nikimanyisa okwihwaho kw'ebitengyeetsibwa, nibyo ebyahangirwe, ngu ebitatengyeetsibwa bibone kugumaho.

28
N'ahabw'ekyo nk'oku twine obukama obutabaasa kutengyeetsibwa, ka tusiime Ruhanga, kandi tumuramye nk'oku akunda, nitumutiina kandi nitumuha ekitiinwa.

29
Manya Ruhanga waitu n'omuriro ogurikurya busha.


Nyankole Bible 2008 The Bible with Apocrypha in Runyankore-Rukiga, new revised joint translation © The Bible Society of Uganda, 2008.