Beblia

	जीवन को च्यानणो (सेकावाटी नया नियम की पोथ्या) इफिसुस 4


Save Notes

1
इ ताँई म, जखो परबु की सेवा ताँई केदि हूँ थारूँ आ अरदास करूं हूँ क जखा हेलाऊँ थानै बुलायो गयो हो बिकै जोगीई चाल चालो,

2
सगळी बाता म खुदनै छोटो बणार नरमाई समेत, थ्यावस राख'र प्यार-परेमऊँ एक दुसरा की सेण करो;

3
अर मेळमिलाप का बंदणऊँ पबितर आत्मा को एको राखबा ताँई जोक्यु कर सको बो करो।

4
क्युं क एकई पबितर आत्मा ह अर आपा बिस्वासी एकई काया हां अर आपणी एकई आस ह जी ताँई परमेसर थानै बुलायो ह।

5
आपणो परबु मसी एक ह, जिमै आपणो एक सो बिस्वास ह अर आपा एकई बतिस्मो लेवां हां अर अंय्यां आपा सगळा एक हां,

6
सगळा को परमेसर अर परम-पिता एकई ह जखो सगळा क उपर, सगळा क मांयनै ह अर सगळा की बजेऊँ काम करै।

7
पण आपा सगळानै दया मिली ह अर जंय्यां मसी चायो बंय्यांई बो इ बरदाननै बाट्यो ह।

8
इ ताँई धरमसास्तर खेवै ह क, “बो आपका बेरीयानै केदि बणार बोळो उचो चढ्यो अर आपका मिनखानै बरदान दिओ।”

9
बिकै उचो चढबा को मतबल काँई ह? ओई क, बो उचो चढबाऊँ पेली धरती का पताळ म जार आपका बेरीयानै केदि बणायो।

10
अर जखो उतर्यो बो ओई ह क सगळा आसमानऊँ बी उपर चढगो जिऊँ सक्यानै आपकी मोजूदगीऊँ भर्योपूरो करदे।

11
बोई क्युंकनै तो भेजबा ताँई भेजेड़ा चेला बणार, क्युंकनै परमेसर की खेबाळा बणार, क्युंकनै चोखा समचार को हेलो पाड़बा ताँई, क्युंकनै बिस्वास्या की बिस्वासी मंडळी की रूखाळी करबाळा अर परमेसर की सीख देबाळा बणार टाळ लिआ।

12
बो अंय्यां मसी की कायानै मजबूत करबा अर परमेसर का मिनखानै मसी की सेवा ताँई त्यार करबानै कर्यो।

13
जद ताँई आपा सगळा बिस्वास अर परमेसर का बेटा की जाण-पिछाण म एक नइ होज्यावां, अर पक्का मिनख बणर मसी का रूप म पूरा नइ बढ ज्यावां।

14
जिऊँ आपा टाबरपुणो नइ करां। जिऊँ आपा मिनखा का ठगपुणा अर चतराईऊँ अर बाकी भंगराबाळी सीख म आर इनै-बिनै भटकता नइ फिरां।

15
इ ताँई परबु का नामऊँ म थानै चेतार्यो हूँ क इब आगैऊँ परमेसरनै नइ ध्यारबाळा मिनखा की जंय्यां मना जीवो क्युं क बाकी सोच बुरी ह,

16
बाकी मती मरेड़ी ह। बे आपकी अज्ञानता अर हिया की कलडाई की बजेऊँ परमेसर का जीवनऊँ न्यारा ह।

17
बाकी सगळी सरम-हया मरी पड़ी ह; बे खुदनै बुरी बाण म गेर राख्या हीं, अर सगळा लुचापुणा का काम बिना रोक-टोक करबा लागर्या हीं।

18
पण मसी क बारां म थानै अंय्यांलकी सीख मिली ह के?

19
अर मन आत्मा म नया बणता जाओ,

20
अर नएड़ा सुभावनै पेरल्यो जखो सची धारमिक्‍ता अर पबितरता म परमेसर की जंय्यां ओज्यु नयो करेड़ो ह।

21
इ ताँई झूठ बोलबो छोडर हरेक आपका संगी-साती बिस्वासीऊँ सच बोलै, क्युं क मसी म आपा सगळा एकई काया का अंग हां।

22
थे झाळ तो काडो, पण पाप मना करो; सूरज ढळबाऊँ पेली थारी झाळ खतम होणी चाए।

23
अर सेताननै मोको मना द्‍यो, की बो थानै पाप म गेरै।

24
जखा चोरी करीं हीं बानै चोरी करनी छोडर भला कामा म मेनत कर खुद ताँई कमाणो चाए अर गरीबानै दान देणो चाए।

25
कोईबी बुरी बात थारै मुंडाऊँ नइ निकळै पण दुसरा को भलो करबाळी बाता बोलो जिऊँ सुणबाळा की जुर्ता पूरी होवै अर बाको भलो होवै।

26
परमेसर की पबितर आत्मा को निरादर मना करो क्युं क छुडाबाळा दिन ताँई आ पबितर आत्मा थारै ताँई बिकी जामनी ह, की बो थानै छुड़ासी।

27
इ ताँई थे सगळी कड़वाट, परकोप, झाळ, कळै, दुसरा की बुराई करबाऊँ अर दुसरा की हानी करबाऊँ दूर रेह्ओ।

28
एक दुसरा प दया कर्या करो अर जंय्यां परमेसर ईसु मसी म थारा बुरा कामा ताँई थानै माफ कर्यो ह बंय्यांई थे बी एक दुसरानै माफ करो।


Shekhawati Bible 2017 (c) 2010-2017, New Life Computer Institute. All rights reserved