Beblia

	जीवन को च्यानणो (सेकावाटी नया नियम की पोथ्या) 2 पतरस 1


Save Notes

1
म, समोन जिको नाम पतरस बी ह, जखो परबु ईसु मसी को दास अर भेजेड़ो चेलो हूँ। आ चिठी बा मिनखानै मांडूँ हूँ जखा आपणा परमेसर अर छुटकारो देबाळा ईसु मसी की धारमिक्‍ता की बजेऊँ आपणी जंय्यांई बिस्वास करीं हीं।

2
म चाऊँ हूँ क, परमेसर अर आपणा परबु ईसुनै जाणबा क जरिए स्यांती अर दया बेसीऊँ बेसी थार प होती रेह्‍वै।

3
जीवन जीबा ताँई अर परबु की सेवा करबा ताँई जोक्यु बी आपणानै चाए हो, बो सक्यु परबु आपकी अनोरी सक्‍तिऊँ आपणानै दिओ ह। क्युं क आपा बिनै जाणा हां। बोई आपणानै आपकी धारमिक्‍ता अर मेमाऊँ बुलायो ह।

4
इ बजेऊँ बो आपणाऊँ बडा-बडा अर किमती करार कर्या हीं, जिऊँ आपणा म परमेसर को सुभाव आ सकै, जिऊँ आपा आपणी बुरी इंछ्या अर इ दुनिया की बुराईऊँ बच सकां।

5
थे जी तोड़ मेनत कर्या करो जिऊँ थे बिस्वासनै बढा सको, बिस्वासऊँ सदगुणनै, अर सदगुणऊँ समजनै,

6
अर समजऊँ खुद प काबू राखबानै अर खुद प काबू राखबाऊँ थ्यावसनै अर थ्यावसऊँ परमेसर की भगतीनै,

7
अर भगतीऊँ भाईचारानै, अर इ भाईचाराऊँ परेमनै।

8
क्युं क ज थारै म अ सगळी बाता रेह्सी अर थे आ बाता म बढता रेहस्यो जणा परबु ईसु मसी की पिछाण म बो थानै निकम्मो कोनी होबा देसी।

9
क्युं क जखो बी आ बातानै कोनी मानै बो आँदो ह, अर बिनै धुन्दो-धुन्दो सुजै ह, अर बो आबी भूलगो क पेल्याई बिका पापनै धोर बिनै सुद कर्यो गयो ह।

10
ओ मेरा लाडला बिस्वास्यो, थे थारा बुलाया जाबानै, अर टाळ्या जाबानै पक्को करो। क्युं क ज थे अंय्यां करस्यो जणा कदैई आखळी कोनी खास्यो,

11
अर ज थे इ रीत गेल चालस्यो जणा एक दिन पक्काई आपणा परबु अर छुटकारो देबाळा ईसु मसी का अजर-अमर राज म जास्यो।

12
जदकी थे आ बातानै जाणो हो, अर थानै जखी सचाई का बचन मिल्या हीं अर थे आ बचनानै मानो बी हो। जणा बी म थानै अ बाता याद दिवाऊँ हूँ।

13
म सोचूँ हूँ क, ओ चोखो ह क जद ताँई म इ काया म हूँ, थानै अ बाता याद दिवातो रेहस्युं।

14
जंय्यांकी आपणो परबु ईसु मसी मनै साप-साप बता दिनी ही क, म तावळोई इ कायानै छोडबाळो हूँ।

15
इ ताँई म पूरी कोसिस करूं हूँ, क मेरै मरबा क पाछै आ बातानै थे याद राखो।

16
म्हें थानै आपणा परबु ईसु मसी की सक्‍ति क बारां म अर बिकै ओज्यु आबा क बारां म जखो समचार सुणाया हां, बा कोई मन घड़त क्हाणी कोनी ही, पण म्हें खुद बिकी मेमानै म्हारी आँख्याऊँ देख्या हां।

17
क्युं क जद बो पिता परमेसरऊँ मेमा अर आसिरबाद लेर्यो हो जणा सऊँ सक्‍तिसाली परम-पिता परमेसर कानिऊँ ओ हेलो आयो, “ओ मेरो लाडलो बेटो ह, जिऊँ म राजी हूँ।”

18
म्हें खुद ईस्बर नगरीऊँ आबाळा हेलानै सुण्या, क्युं क बि टेम म्हें खुद बिकै सागै पबितर डूँगरी प हा।

19
अर म्हारै कनै परमेसर की खेबाळा का जखा बचन ह बिऊँ आ साबित बी होवै ह। अर थे समजर इपै ध्यान करो हो अंय्यां कर थे चोखोई करो हो। क्युं क बो च्यानणो ह, जखो अँधेरा म जद ताँई च्यानणो देसी जद ताँई दिन नइ निकळै अर थारा हिया म भोर को तारो नइ उग्यावै।

20
पण थानै ओ जाणलेबो चाए क, पबितर सास्तर की कोईबी भबिस्बाणीनै कोईबी खुदऊँ कोनी जाण सकै।

21
क्युं क कोईबी भबिस्वाणी मिनखा की इंछ्याऊँ कदैई कोनी आई, पण भगत मिनख पबितर आत्माऊँ परमेसर कानिऊँ बोलता हा।


Shekhawati Bible 2017 (c) 2010-2017, New Life Computer Institute.