Beblia

	Qullaawa Maxaafa LAWISHSHA 17


Save Notes

1
Gibbote mine noo jilinni, keerunni intoonnihu moolu timi woyyate.

2
Jallaaga gashshaanchu beetto busulu borojjichi murrisanno; roduu gede ledosi iqqa beeqqanno.

3
Birranna culka giiratenni daashshinanni. Mannu wodana kayinni Kaaliiqi fonqole la"anno.

4
Bushu manchi bunshe guungeessanno; kaphaanchuno xagaraammu coyidhannore wodana wore macciishshanno.

5
Buxane arrassannohu Kalaqinonsaha mishannoho; qarraminoha qacifatannohu qorichishamikkinni digatanno.

6
Jajjabbu manni oosonsa oosonni hagiidhanno; oosono annunninna amatenni ayirritanno.

7
Gowwu dancha coye coyi'reno dibiifanno; gashshaanchu kaphiro hakkiinni baasinoha ikkanno.

8
Mitu mannira gubbo itisa kii'la labbannonsa; gubbisatenni baalunkuri qinaannonke yite agadhitanno.

9
Sao assinohura agurannohu baxille hasi'rannoho; marro marro hige coyi'rannohu kayinni fiixooma xeertisanno.

10
Gowwaho xibbe hinge ganneennano dieannosi; busulu kayinni mitte hinge kulloonnitenni seejjamanno.

11
Bushu manchi bunshe calla hasanno; isira mararannokki gashshaancho sonkanni.

12
Gowware loosanni noo gowwinni xaadantenni, qalino dagunchinni xaada woyyate.

13
Danchumma bunshetenni qolannohura, bushu coyi minisinni difulanno.

14
Coye kayisa, wayi gammala kurkure xullo fushshate ledo mittete; kunnira gibbo ka'ukkinni coyi'ransho aguri.

15
Keeraanchoho beebba woranna, cubbaataamo keereensa, lamunku Kaaliiqi giwanno coyeti.

16
Egenno afi'ra'ra hasi'rannokki daafira, gowwaho angasi noo woxi ma kaa'lannosi?

17
Jaalu wo'manka woyite jaalaholla; roduuno qarru barra iillanno.

18
Wodaniweelu manchi muddame afoo fulanno; mannaho rahe waase ikkanno.

19
Gibbo hasannohu cubbo baxannoho; naaxxaleessu umisira bao abbi'ranno.

20
Wodanisinni busha malannohura diqinaannosi; lamu arrawinni coyi'rannohu qarru aana uwanno.

21
Gowwa ilinohu yaadanni hee'ranno; jallaagu beetti anni dihagiidhanno.

22
Hagiirraamu wodani mannimmate fayyimma aanno; dadillaamu wodani kayinni mannimma maniissanno.

23
Bushu manchi halaale dawisara yee, maaxe gubbo itanno.

24
Egennaamu manchi looso hayyotenni loosanno; gowwu kayinni batinyewa kabbi yaanno.

25
Gowwu beetti annaho dadilleho; iltino amarano gaabbote.

26
Keeraanchu manchira erecco kara digaraho; dancha coye assannoha dancha manna ganano bushate.

27
Egennaamu manchi batinyere dicoyi'ranno; wodancha afi'rino manchi geinoho.

28
Gowwu sammi yaanno woyite egennaamo lawanno; afoosi gamba assi'ranno woyite afinoha lawanno.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014