Beblia

	Qullaawa Maxaafa LAWISHSHA 23


Save Notes

1
Ayirradu manchi ledo itattora ofollatto woyite, albakkiinni noore wodanchite lai.

2
Itate kokke fa'nituherono, atenee ittisi'ri.

3
Xagarrote shiqinshoonnita ikkitannona, coommitino sagale doggoonkehe.

4
Jirote yite atenee orbaassooti; hakko daafurinni gatate egennaamo ikki.

5
Jiro iima hige buuwanno allamurchi gede, ati la'anna hedeweelcho qoola assidhe buubbe ba'anno.

6
Do'nichu manchi sagale ittooti; coommitannoti sagalesi halchishshoonkehe.

7
Wodanisinni sagale fushshitannore calla hedanni, goowi alita iti agi yaannohe.

8
Itise kae tushshiishannohe; guwisittosi guwishshino mullare ikke gatanno.

9
Dancha coyekki mullare asse hunannona, gowwaho sirnya hasaabbooti.

10
Alba worroonni danna xiibbooti; annanna ama afidhinokki ooso baatto adhitooti.

11
Kaaliiqi golonsaatina, insa daafira isi coyi'ramanno.

12
Wodanakki seejjote widira, maccakkino egennote qaaliwa qoli.

13
Wodambu dishaannona, ooso seejjate huluullantooti.

14
Wodambunni gana isinni, lubbo reyotenni gatisate.

15
Beetto'ya, ate wodani egennaamo ikkiro, anera tashshi yaannoe.

16
Arrawikki dancha coyi'ranno woyite, lubbo'ya hagiidhitanno.

17
Wodanikki cubbaataamma hinaasoonke; barra baala Kaaliiqa waajjatenni hee'ri.

18
Hatto assittoro, hexxokki diba'anno.

19
Beetto'ya macciishshi; egennaamo ikki; wodanakkino halaalaancho doogo widira qoli.

20
Agaasinete ledo hossooti; lowo maala ita baxxannori ledono waartooti.

21
Dimbaasinenna itaasine buxxanno; goxanote batinyino hoccaame uddano uddisiisanno.

22
Ilinohehu annikki yaannore macciishshi; amakkino geedhitanno yannara mishshootise.

23
Halaale afi'ri ikkinnina hu'nitooti; egenno, afanna wodanchano hooggooti.

24
Keeraancho beetto afi'rino annira, lowo geeshsha tashshi yaannosi. egennaamo beetto ilinohuno hagiidhanno.

25
Annikkinna amakki hagiidhitannohe gede ikki iltinoheta tashshi assise.

26
Beetto'ya ballo, yeemmore seekkite macciishshi; ani ha'reemmo doogo higge ha'ri.

27
Foora mancho qile bale gedeete; saaliweelo meyatino woshshaadote.

28
Mulqidhannori gede dugganno; lowo manna yawaawuloota assitanno.

29
Raarannohu ayeti? Dadillannohu ayeti? Mannu ledo giwamannohu ayeti? Gaabbannohu ayeti? Beebbatenni madi'rannohu ayeti? Ille duu'mannohu ayeti?

30
Agunni gale hosannoha di"ikkino? Haaro agatto hasanni ha'rannoha di"ikkino?

31
Woyinete xajje kokkete coommitanno daafira, birillete xabbanno woyite ise widira higge la'ooti.

32
Gedensaanni hamashshu gede qassanno; buutete gede idditanno.

33
Illete xawute ganannohe; garunni hedanna coyi'ra didandaatto.

34
Goxoottowa daallasu doyannohe; ka'anna kawa suutto ga'nitanni noottoha lawannohe.

35
«Gannoonnieha ikkanno; kayinnilla diqaageemmo. Awwaaltinoeha ikkanno; kayinnilla leellinoeri dino. Kunnira kae agatto hasi'ro ikka?» yaatto.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014