Beblia

	Qullaawa Maxaafa SOQQAMAASINETE LOOSO 1


Save Notes

1
Tewofiloosi: Umi borro'yara Yesuusi loosinorenna rosiisinore baala borreessoommo. Borreessoommohu Yesuusi loososi hanafihunni kayise,

2
gordo fuli barri geeshsha nooreeti. Gordo fulinohu, doodhinonsa soqqamaasinera Qullaawu Ayyaaninni hajajo uyinsahu gedensaanniiti.

3
Lowo qarra adhe reyihu gedensaanni batinye hige daanni, heeshshonniha ikkasi leellishinonsa. Shoyilloo barra wo'ma leellanninsa Maganu gashshootire rosiisinonsa.

4
Ledonsa hee'ri yannara, «Ani kuloommo'neha Anni'ya uyinoe hexxo agadhe ikkinnina Yerusaalametenni fultinoonte.

5
Yohaannisi wayinni cuuino; ki'ne kayinni shiimu barri gedensaanni Qullaawu Ayyaaninni cuuantinanni» yee hajajinsa.

6
Insa mitteenni gamba yite heedheenna, «Mootichanke! Israeelete Gashshoote xaanni galagalchite qolattoni?» yite xa'mitusi.

7
Yesuusi kayinni, «Annu roorresinni hirqino yannanna diro afate ki'nera diuyinoonni'ne.

8
Ikkollana Qullaawu Ayyaani ki'ne aana dirranno yannara wolqa adhitinanni. Hakka woyite Yerusaalamete, Yihuda baalaho, Samaariyahonna gobbate qacce geeshsha naqaashshe'ya ikkitinanni» yiinsa.

9
Hatto yiihu gedensaanni, insa la'anni heedheenna gordu iimira fuli. Gomichu guggushshe albinsanni golisi.

10
Isi gordu iimira fulanna, rosaanosi iima higge la'anni heedheenna lamu waajjo uddano uddidhino mannooti mulensa uurrite,

11
«Ki'ne Galiilu manna, iima higgine la'inanni kawiicho mayira uurritinoonni? Iima hige ha'ranna la'ini Yesuusi, iima hige ha'ranna la'ini garinni galagale daanno» yitunsa.

12
Hakkunni gedensaanni Ejedhete Ilaalinni dirrite Yerusaalame higgu. Ejedhete Ilaali Yerusaalametenni mitte kiilo metire ha'risanno.

13
Yerusaalame dagge minu aana minnoonni minira fultu. Insa, Pheexiroosi, Yohaannisi, Yaiqoobi, Indiriyaasi, Filiphoosi, Toomaasi, Bertelemewoosi, Maatiyaasi, Ilfiyoosi beetti Yaiqoobi, Laalaataanchu Simiooninna Yaiqoobi beetti Yihudaati.

14
Kuri baalu wo'manka woyite huuccattote mitteenni gamba yitanno. Insa ledo mitu mitu meenti, Yesuusi ama Maariyaaminna Yesuusi roduuwi no.

15
Hatte yannara Pheexiroosi 120 ikkitanno ammanaano mereero uurre,

16
«Roduuwa'ya, Yesuusa amadi mannira albisa ikkino Yihudire, Qullaawu Ayyaani balaxe Daawiti widoonni qole kulinoti qullaawa borro adda ikkitino.

17
Yihudu ninke ledo noo yannara ledonke soqqamino.

18
«Kuni manchi loososi mixxino; alba hige uwe lamewa fulino; helleesino du'nantino.

19
Konne coye Yerusaalamete hee'ranno manni baalu macciishshino. Kunnira hatte baattora insa afiinni, ‹Akelidaama› yine su'ma fushshinoonni. Hatto yaano, ‹Mundeete baattooti› yaate.

20
«Kuni ikkinohu faarsote giddo, ‹Baattosi mulla ikkito; galannohuno hee'roonke; gashshootesino wolu adho› yine borreessinoonni daafiraati.

21
«Kunnira Mootichinke Yesuusi ninke ledo ha'rami yanna baalate ninke ledo noori,

22
hattono Yohaannisi cuuanni kayise Mootichu Yesuusi gordu iimira fuli barri geeshsha ledonke noori kunni manni giddonni mittu kaote naqaashshe ikka hasiissanno» yii.

23
Kunnira lame mancho shiqishshu; insano Bersabaasi, woy Yusixoosi yinanni Yooseefiitinna Maatiyaasiiti.

24
Hakkunni gedensaanni, «Mannu baalu wodana afattohu Mootichanke, kunni lamunku giddonni hiikkonne doodhoottoro leellishinke.

25
Yihudi umisi doogo ha're agurino soqqanshonna isi darga amade soqqamaasincho ikkannoha leellishattonke gede huucci'neemmohe» yitu.

26
Hixa tungi woyite, hixu Maatiyaasira fuli. Kunnira isi tonaalayinki soqqamaasincho ikke kiirami.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014