Beblia

	Qullaawa Maxaafa GALATIYU SOKKA 1


Save Notes

1
Mannunni woy mannu widoonni ikkikkinni, Yesuusi Kiristoosinninna iso reyotenni kayisinohu Maganu Annunni soqqamaasincho ikkammora dooramoommohu ani Phaawuloosinna,

2
ledo'ya noo roduuwi baalu, Galatiyu beetekiristaannara:

3
Anninke Maganunna Mootichu Yesuusi Kiristoosi eltonna keeru ki'ne ledo hee'ro.

4
Maganu Anninke hedino garinni, tenne busha yannara gatisankera ninke cubbira yee umosi reyote sayise uyino.

5
Maganoho hegere hegerera ayirrinyu ikkosi! Hamii'ni.

6
Kiristoosi eltonni woshshino'ne Maganiwiinni muddantine wolu duduwi widira ha'ra'ne lowo geeshsha dhagge ikkitannoe.

7
Togo yoommo'nehuno, gara hawissannorinna Kiristoosiha Dancha Duduwo shokkisha hasidhannori mitu mitu noo daafiraati ikkinnina, Danchu Duduwi mitto callaholla.

8
Ikkollana, ninke woy gordu sokkaasinchono ikkiro, ninke kulloommo'nehunni baxxinoha wolu gariha dancha duduwo kulanno'nehu, rumaminoha ikko.

9
Albaanni kulummo'nente gede xaano lede kuleemmo'nena, ayino adhitinoonnihuwiinni baxxinoha wolu gariha dancha duduwo kulanno'nehu rumaminoha ikko.

10
Xa ani mannunso Maganu galataera hasi'roommo? Woy manna hagiirsiisa hasi'roommoha lawino'ne ikka? Manna hagiirsiisa hasi'reemmoha ikkoommoro Kiristoosi borojjicho ikka didandeemmo.

11
Roduuwa'ya, ani kuleemmo'nehu Danchu Duduwi mannunniha ikkinokkita affinara hasi'reemmo.

12
Konne Dancha Duduwo Yesuusi Kiristoosi xawisinoe ikkinnina, mannu uyinoeha woy rosiisinoeha di"ikkino.

13
Kunni albaanni Ayihudete amma'nonni hee'reemmo yannara ani hiittoohoro egentinoonni. Maganu Beetekiristaane mararro nookkiha xiiwanni hunammora mixi'reemmoho.

14
Ani yanna'yara noo Ayihude lowotenni roortino amma'no nooeho; akaakka'ya woga agadhate lowo geeshsha laalaatoommoho.

15
Ikkollana, Maganu ilamammora albaanni doorinoe; eltosinnino woshshinoe.

16
Dagate Dancha Duduwo kulammora Maganu Beettosi leellishaera hasi'ri yannara mannunni diamaalamoommo.

17
Anera albaanni soqqamaano ikkite noori ledo xaadammora Yerusaalame diha'roommo. Ikkollana, Arabete gobba ha're, galagale Demaasiqo higoommo.

18
Sasu diri gedensaannino Pheexiroosi la"ammora Yerusaalame ha're, hakkiicho isi ledo tonaa onte barra keeshshoommo.

19
Hakkiicho Mootichu rodoo Yaiqoobi agurranna wole soqqamaasine diafoommo.

20
Kuni borreesseemmo'ne coyi kapho ikkinokkita Maganu albaanni hee're coyi'reemmo.

21
Hakkunni gedensaanni Sooriyunna Kiliqiyu gobba ha'roommo.

22
Yihudu gobbara noo ammanaasine kunni albaanni ane affe diegentinoe.

23
Insa, «Kunni albaanni tenne amma'na hunara ninke qarrisanni hee'rinohu, xa isinni hattenne amma'na kulannoha ikkino» yee mannu coyi'ranna macciishshitino.

24
Anenni kainohunni Maganono galattu.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014