Beblia

	Qullaawa Maxaafa TIITO 1


Save Notes

1
Maganu borojjichonna Yesuusi Kiristoosi soqqamaasincho ikkoommohu, Maganu doodhino manni ammana jawaachishatenna maganittete heeshsho halaale affanno gede assate dooramoommohu ani Phaawuloosi soommo sokka:

2
Tini ammanano hegere heeshsho hexxo aana xintantinote. Kaphannokki Magani tenne heeshsho aankera lowo dirira albaanni hexxo uyinonke.

3
Yiino yanna iillituta, gatisaanchinke Maganu hajajonni, anera eeggo uyinoe garinni qaalesi xawisino.

4
Ledo ammananni halaalu beetto'ya ikkoottohura Tiitora: Maganu Annunnihunna Gatisaanchinke Yesuusi Kiristoosi eltonna keeri ate ledo hee'ro.

5
Ate Qerxeesi aguroommohu, biddi yiinokki coye biddi assattonna hajajummohe garinni katammate beetekiristaanete cimeeyye dooratto gedeeti.

6
Beetekiristaanete cimeessi minshanniri nookkihanna mitte galteha ikkona; afimala gede ikkatenninna hajajama giwatenni hemantannokkiti ammantino ooso noosiha ikka hasiissanno.

7
Beetekiristaanete sooreessi, Maganu looso eeggo uyinoonnisiha ikkino daafira, minshanniri nookkiha ikka hasiissannosi. Naaxxannokkiha, hanqoho muddamannokkiha, dimbannokkiha, giwamannokkiha, woxeho hafuurannokkiha,

8
wosina adhannoha, dancha coye baxannoha, umosi ceinoha, halaalaancho, Maganu soqqanshora baxxinoha, jilba sa"annokkiha ikkona.

9
Halaalu coye rosiisate, seejjatenna qoxxissannorira dawaro qola dandaanno gede rosino coyinni kaajje hee'rannoha ikkona.

10
Hajajamannokkihu, wolunkunni barcimmoommo yee haafare coyi'ranni dogannohu lowo manni no.

11
Garimale doogonni qiniite lexxitara yite, hasiisannokki coye rosiissanni mittu mini manna wodaassanno. Hattoo manna sammi assa hasiissanno.

12
Mittu insa uminsa himanaanchi, «Qerxeesi manni wo'manka woyite kaphaasinete; bushu moyichi gedeereeti; loossukkinni heedhanno itaasineeti» yiino.

13
Tini farci'ro halaaleho; kunnira wo'ma ammana heedhannonsa gede konne manna seejji.

14
Ayihudete maammaashshi hoode hadhannokki gedenna halaale gibbannori amaale macciishshitannokki gede duudhe seejjinsa.

15
Keeraanote, baalunku coyi keeraanchoho. Battaabbinoriranna ammantinokkirira kayinni, keeraanchu coyi mittuno dinonsa. Hakkiinnino sae, wodaninsanna tii"insa battaawinoho.

16
«Magano egenninoommo» yitanno. Loosinsanni kayinni isira badhe wodhitinoreeti. Insa giwissannoreeti; hajajantannokkireetinna mittono dancha coye assa dandiitannokkireeti.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014