Beblia

	Qullaawa Maxaafa IBIRAAWOOTA 12


Save Notes

1
Bati'ru gomichu gede doyissitinonketi tini baala naqaashshe noonke. Kunni daafira, duha ikkannonkere baalanna aananke qa'manno cubbo hunne, albankeenni noo qolchanshora cincatenni jawaante dondo.

2
Amma'nanke umonna gawalo ikkinohu Yesuusi aaninni ille'ne hooltinoonte. Isi albasiinni noo hagiirri daafira yee, shollinye waajjikkinni masiqalu aana ree, ayirradu Maganu barcimira qiniiteenni ofollino.

3
Kunnira, wolqa ba'inikkinninna hexxo mudhitinikkinni, cubbaataammu baalu gibbannasi cincinoha Yesuusa qaagge.

4
Ki'ne cubbu ledo sharramatenni, xaara mundee'ne du'nantanno gede ikkitine digaarantinoonni.

5
Maganu oososi gede asse, «Beetto'ya, Kaaliiqi seejjo mishshooti! Rufannohe woyiteno wolqa ba'ooti!

6
Kaaliiqi baxannoha seejjanno; beettosi ikkinoha baala qorichishanno» yee seejjino'ne seejjo habbinoonni.

7
Maganu oososi gede asse seejjanno'ne daafira, qorichasi cincitine adhe; annu qorichishannokki beetti nooni?

8
Ilate gede qoricha adhannokkihu, baanaho ikkinnina ila di"ikkino.

9
Wole widoonni, qorichishshannonketi iltino annuwa noonke; insano ayirrinsoommo. Hatto ikkina, lubbotenni hee'rate ayyaanunni Anna ikkinonkehura roorsine mayira dihajajammeemmo?

10
Iltinonke annuwa shiimalla qorichishinonke. Maganu kayinni qullaambesi gutammeemmo gedenna ninkera seyara yee qorichishannonke.

11
Qorichu yannasira yaachishannota ikkinnina dihagiirsiisanno. Gedensaanni kayinni rosino mannira keeru giddo wo'minoha keeraanchimmate guma laalannonsa.

12
Kunnira, shaqqitinota anga'nenna daafurtinota gulubba'ne jawaachishidhe.

13
Miicantinoti hurtanno gede ikkinnina, darginni ka'e faatantannokki gede lekka'nera taalo doogo seekkidhe.

14
Mannu baalu ledo keere hee'ratenna qullaawoota ikkate jawaatte! Qullaambe nookkiha ayino Kaaliiqa la"a didandaanno.

15
Ki'ne giddonni ayerano Maganu elto xe'annokki gede qorophe! Mereero'ne qaraaranno rumushshi mu're qarrisanno'nekki gedenna lowo mannano batteessannokki gede qorophe.

16
Foorannohu gede woy mittu woyiti sagalera yee bayirreenyesi hirihu Eesawu gede maganiweelo ikkinohu giddo'ne hee'rannokki gede qorophe.

17
Gedensaanni Eesawu maasso galagalche qo'lara hasi'reenna gimboonnisita affinoonni; hattenne maasso qo'late hururame wi'le nafa diafi'rino; gaabbeno qo'la didandiino.

18
Ki'ne Israeelete gede angatenni amandannihuwa woy buwannohuwa Siina Ilaaliwa di"iillitinoonni; guunjonniwa, tunsichunniwanna hombobolattete,

19
woy xurumbu luuliwa woy coyi'nanni huuro macciishshinanniwa di"iillitinoonni. Mannu Maganu huuro macciishshe, tenne lede wole qaale coyi'rannonsakki gede huucci'rino.

20
«Saada nafa ilaala kissuro, kinnatenni ganne shinona» yitanno hajajo ayirritinonsa daafira duha didandiitino.

21
Illete leeltino ikkito lowo geeshsha waajjishshannota ikkitinohura, Muse nafa, «Ani waajjoommo; huxi'roommo» yiino.

22
Ki'ne kayinni Tsiyooni Ilaaliwa dagginoonni. Kumu kumi sokkaasine hagiidhitannowa Heeshshote Magani katama gordu Yerusaalame dagginoonni.

23
Su'mansa gordoho borreessinoonniriwa bayirraaddu songo ammanaanonnitewa, wo'munkura yoo yaanno Maganiwanna guuta assinoonni keeraanowa gamba yitinoonni.

24
Haaru gondoorira mereerima ikkinohuwa Yesuusiwa, Aabeeli mundeenni roore woyyino coye coyidhannotewa winxoonni mundeewa shiqqinoonni.

25
Coyi'rannohura gara gibbinannikki gede qorophe. Uullate aana coyi'reenna gibbinori gattinokkiha ikkiro, gordoho hee're coyi'rannohura badhe wodhine hiitto ikkine ganteemmo?

26
Hatte yannara huurosi baatto shaffino. Xa kayinni, «Baatto calla ikkitukkinni, layinkimeeshsho gordono shafeemmo» yee coyi'rino.

27
Kuni, «layinkimeeshsho» yaanno qaali, shafamannokki coyi kaajje hee'rannotanna shafamannohu woy kalaqamino coyi ba"annota malaatisanno.

28
Kunnira, ninke shafamannokki gashshoote ragi'neemmo daafira Magano galaxxineemmo. Hagiidhanno garinni ayirrinyunninna waajjatenni magansi'nosi.

29
Maganinke ittanno giiraati.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014