Beblia

	Qullaawa Maxaafa UMI PHEEXIROOSI 1


Save Notes

1
Gobba baalate billaallite noorira tonaa lamente Israeelete ga'rera, Maganunna Mootichu Yesuusi Kiristoosi soqqamaancho ikkoommohu ani Yaiqoobi soommo sokka. Keeru ki'ne ledo hee'ro.

2
Roduuwa'ya! Addi addi jifama iillitu'nero, tashshi assanno coye afidhinoonnihu gede assitine kiirre.

3
Ammana'ne jifanturo, cinca afidhinanni gede assitannota egentinoonni.

4
Cincatenni kaajja'ne mitturino xei'nekkinni guutanna wo'ma manna assitanno'neta ikkito.

5
Ki'ne giddo egenno xe'inosihu hee'riro, Magano huucci'ro; Maganuno aannosi. Isi ayeno mishikkinni baalunkura elate shooshaqa Maganooti.

6
Ikkollana mannu mittoreno huluullamikkinni ammanatenni huucci'ro. Huluullamanno manchi bubbe ganteenna shashshafaminoha baaru dambala lawanno.

7
Hattoo manchi Maganuwiinni mittoreno afi'reemmo yee hedoonke.

8
Lame hedo noosihuranna yiinowa kaajje uurrannokki daafira afi'rara didandaanno.

9
Gadadaame heeshsho hee'ranno ammanaanchi, Maganu aliidiha assannosi daafira hagiidho.

10
Mannu jiro daraarchu gede giggiltanno daafira hee'ranno heeshshonni aliidiha ikkinohu amma'nate rodii, Maganu heeshshosinni woriidiha assisirono tashshi yoosi.

11
Arrishsho iibbitanno yannara hayisso mooshshitanno; daraarono giggiltanno; biinfillisino ba"anno. Hattono dureessu manchi loosisinni raankanni ba"anno.

12
Jifamate yannara cincanno manchi ba'raa'rinoho. Jifamihu gedensaanni, Maganu baxannorira uyino hexxonna heeshshote ba'latto adhanno.

13
Ayino jifamanno yannara, «Maganu jifinoe» yoonke. Maganu bushu coyinni dijifanno; horontanni isi ayeno dijifanno.

14
Ikkollana mittu mittunku manchi jifamannohu umisi yortonni goshooshamanninna dogamanniiti.

15
Hakkunni gedensaanni yorto godobbe cubbo iltanno; cubbu lophiro reyo qalanno.

16
Baxantinoonni roduuwa'ya! Sodhinoonte!

17
Dancha eltonna wo'mu atooti baalu Maganuwiinniiti. Kuni daannohu caalu gede doyannokkihu woy soorramannokkihu xawaabbu Anni Maganuwiinniiti.

18
Maganu kalaqama baalaho umire ikkinammora isi umisi hedonni halaalu qaalinni ilinonke.

19
Baxantinoonni roduuwa'ya! Konne habbinoonte; mannu baalu macciishshate rahinoha, coyi'ratenna hanqoho muddamannokkiha ikko.

20
Mannu hanqi Maganu keeraanchimma afi'nanni gede diassanno.

21
Kunnira battetenna bunshete batinye baala huntine, Maganu wodani'ne giddo kaasinohanna lubbo'ne gatisa dandaanno qaale joongillunni adhe.

22
Qaalesi guuttinannire ikke ikkinnina, umo'ne dogginanni macciishshaasine calla ikkitinoonte.

23
Qaalesi macciishshe guutannokki manchi, kalaqamunniha albasi hincilaallotenni layi'ranno manchi gedeeho.

24
Hakku manchi, albasi hincilaallotenni layi'rihu gedensaanni ha'ranno; hiittoohoro hakkawoyintenni hawanno.

25
Ikkollana wolassannoha guuta seera buuxe afe isinni kaajje hee'rannohu, macciishshe hawannoha ikkikkinni, loosu aana hosiisanno manchi loosisinni maassaminoho.

26
Arrawosi eemadhikkinni Magano magansi'reemmo yaanno manchi umosi doganno; isi magansi'ra haafaho.

27
Maganu Annu albaanni keeraanchonna battaabbinokki amma'no: Annanna ama shiidhino ooso, hattonni galte shii'rino meento kaa'la, tenne gobba ishinchiwiinni meessaneete agadhate.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014