Beblia

	Qullaawa Maxaafa LAYINKI PHEEXIROOSI 1


Save Notes

1
Yesuusi Kiristoosi soqqamaasinchi ani Pheexiroosi, Manni gobba manna ikkitine Phanxoosi, Galaatiyaho, Qephedooqiyaho, Issiyahonna Biitaaniyaho billaallitine heedhinannirira,

2
Maganu Annu alba asse hedino garinni doorantinoonnirira, Yesuusi Kiristoosira hajajantinanninna mundeesi winxa'nera Ayyaanu qullaawoota assino'nerira: Eltonna keeru batiro'ne.

3
Yesuusi Kiristoosi reyotenni ka"asinni heeshshote hexxo uyinke. Jawa maarosinni haaro ilamanni oososi assinonkehu, Mootichinke Yesuusi Kiristoosi Anni Maganu galatamo.

4
Isino ba"annokkiha, dukukkannokkihanna akkalannokki iqqa gordoho qixxeessino'ne.

5
Ki'neno goofimarchu barra xawo fultara noo gato adhitinanni gede, ammanate widoonni Maganu wolqanni agarantinoonni.

6
Shiima yanna geeshsha addi addi qarri amadi'nero nafa, kunni coyinni hagiidhe!

7
Hakku qarri iillanno'nehu ammana'ne halaalaanchimma buuxateeti. Ba"anno culka nafa giiratenni fonqolle la'nanni; culkunni roore ayirrado ammana'neno hattonni fonqolama hasiissannose. Tini fonqolantinoti ammana'ne Yesuusi Kiristoosi daanno barra galata, ayirrinyenna gaamaarre uyitanno'ne.

8
Yesuusa Kiristoosa la'inoonnikkiha ikkirono baxxinannisi. Xa la'inoonnisikkiha ikkirono, ammantinannisi; kulle dandiinannikkihanna ayirrado hagiirre hagiidhitinanni.

9
Ammana'nenni agadhitinannita lubbo'ne gatono afidhinanni.

10
Ki'nera hendoonni eltore himantino himanaano, tenne gatore lowo geeshsha diinaggaabbe xiinxallitino.

11
Insa giddo noohu Kiristoosi Ayyaani Kiristoosira iillanno qarranna qarru gedensaanni afi'ranno ayirrinye alba asse qummi assino. Insano kuni baalu ma yannaranna ma garinni ikkannoro buuxxino.

12
Tini himanaano ki'nera ikkinnina uminsara soqqantinokkiti xabbe leeltinonsa; soqqantino'nehuno gordunni sonkoonnihu Qullaawu Ayyaani widoonni xa Dancha Duduwo kuli'ne manni hasaawinore xawisatenniiti. Konne coye sokkaasine nafa la'ara halchitanno.

13
Kunnira wodana'ne feeffachishshine, jilbunni heedhe. Yesuusi Kiristoosi daanno yannara afidhinanni eltora wo'ma hexxo heedho'ne.

14
Hajajantanno ooso gede ikkitine, alba affinikkinni heedhinita busha yorto ha'runsitinoonte.

15
Woshshino'ne Magani qullaawa ikkinonte gede, ki'neno heeshsho'ne baalatenni qullaawoota ikke.

16
«Ani qullaawa ikkoommonte gede, ki'neno qullaawoota ikke!» yine borreessinoonni.

17
Ayerano godowa hosikkinni mittu mittunkura loosisi garinni yoo yaanno Magano, «Annanke» yitine woshshidhinanniha ikkiro, tenne gobbara wosinchimma heedhinoonni yannara, iso waajjitinanni heedhe.

18
Annuwa'newiinni ragidhinoonnita haafu heeshsho heedhinanniwiinni wondoonni'nehu ba"anno birrinni woy ba"anno culkinni di"ikkino.

19
Ki'ne wondoonnihu kullannire woy minshannire afi'rinokki ge'rechite gedeetenni ayirrado Kiristoosi mundeenniiti.

20
Isi egennaminohu gobba kalaqantara albaanniiti; xa goofimarchu yannara kayinni ki'ne daafira leellino.

21
Ammana'nenna hexxo'ne Maganunni ikkitanno gede, Yesuusi widoonni amma'nitinoonnihanna iso reyotenni kayise ayirrinye uyinosi Magano addaxxe.

22
Ammanaano taalu baxillinni baxxinanni gede, halaaleho hajajamatenni lubbo'ne keereensidhinoonni. Kunnira mimmiti'ne ledo xalalu wodaninni seekkitine baxamme.

23
Layinkimeeshsho ilantinoonnihu, heeshshonnihunninna hegere geeshsha hee'rannohunni Maganu qaalinni ba"annokki wixinniiti ikkinnina, ba"anno wixinni di"ikkino.

24
«Mannu baalu hayissote gedeeho; ayirrinyisino xawu daraaro gedeeho. Hayisso mooltanno; daraarono giggiltanno.

25
Mootichu qaali kayinni, hegere geeshsha hee'ranno» Kulli'nehu Danchu Duduwino konneeti.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014