Beblia

	Qullaawa Maxaafa YOHAANNIS AJUUJA 1


Save Notes

1
Tini Yesuusi Kiristoosi ajuujaati. Muli yanna giddo ikkanno coye soqqamaanosira leellishanno gede Maganu uyinosite. Kiristoosino sokkaasincho soye soqqamaanchisi Yohaannisira kulino.

2
Yohaannisino afino coye baala, Maganu qaalenna Yesuusi xawisino halaale farci'rino.

3
Kuni coyi baalu muli yanna giddo ikkanno daafira, konne himanu qaale nabbawannohu ba'raa'rinoho; konne qaale macciishshitannorinna kunni maxaafi giddo borreessinoonniha wonshitannori ba'raadhinoreeti.

4
Yohaannisiwiinni Issiyaho nootera lamalante beetekiristaanera: Noohu, hee'rinohunna daanno Maganiwiinninna ayirradu barcimisira albaanni noo ayyaanna lamalantewiinni,

5
reyotenni ka"atenni umiha ikkinohu, ammanamino naqaashshenna uullate mootoolla gashshaancho ikkinohu Yesuusi Kiristoosiwiinni eltonna keeru iillo'ne. Baxannonkehura mundeesinni cubbonke hayishshinonkehura,

6
Maganu Annisira soqqammeemmo gede qeesootu gashshoote assinonkehura, Yesuusi Kiristoosira hegere hegerera ayirrinyunna wolqa ikkitosi! Hamii'ni!

7
Kuneeti, gomichunni daanni no! Qassusiri nafa gattukkinni, mannu baalu ille la"annosi; baattote aana noo manni baaluno, iso lae hururame wi'lanno. Yinoonnirino ikkanno. Hamii'ni!

8
Noohunna hee'rinohu, daannohuno, Wo'manka Dandaanno Magani Kaaliiqi, «Albihunna Gedensihu aneeti» yaanno.

9
Ki'ne ledo Yesuusi qarra, gashshootesinna cincasi beeqqeemmohu ani rodii'ne Yohaannisi, Maganu qaaliranna Yesuusi naqaashshimma daafira Fiximo yinanni giddichora noommo.

10
Mootichu barra Qullaawu Ayyaani aana'ya hee'reenna, badhe'yaanni xurumbu luuli gedeetenni lowo huuronni,

11
«La'anni noottore maxaafaho borreessite, Efesooni, Semirineesi, Phergamooni, Tiyaxiroosi, Serdeesi, Filidelfiyahonna Lodooqiyaho nootera lamalante beetekiristaanera soyi!» yiie.

12
Coyi'riehu ayetiro afammora badhe hige caaqqi yeemmo woyite, culkunni seekkinoonnire lamala caabbiyye worranni uduunne afummo.

13
Hakko uduunni mereero manchi beetto lawannoha afummo. Isi hunda iillitinota seeda uddano uddi're no; gagasoho culku hiito usudhe no.

14
Umisi dananchi waajjo shaallichaho; illesino giirate buwani gedeete.

15
Lekkasi giiratenni daashshinihu gedensaanni fiinoonni camo labbanno; huurosino lowo wayi foonchi gedeete.

16
Qiniiticho angara lamala beeddakko haa're no; afiisinni lamenka wido iibbitino bise fultu; albisino barru taali arrishsho gede xawanno.

17
Iso laummo woyite, reyino manchi gede ikke lekkasi hunda uwummo. Isi kayinni qiniiticho angasi aana'ya wore, «Waajjitooti; umihunna gedenihu,

18
heeshshonnihuno aneeti. Kunni albaanni reyommo; xa kayinni kune hegere heeshshoha ikkoommo; reyotenna jeennaatu roorre anga'ya no.

19
Kunnira, la'anni noottoha, xa noohanna kunni ka'a daara nooha borreessi!.

20
Qiniiticho anga'yara la'anni noottori, lamala beeddakkonna culkunni seekkinoonnihu lamalu caabbiyye worranni uduunni tiro kunninni aante noote: Lamala beeddakko lamalante beetekiristaane sokkaasineeti. Culkunni seekkinoonnihu lamalu caabbiyye worranni uduunni lamala beetekiristaaneeti» yiie.


Sidamo Bible 2014 © The Bible Society of Ethiopia; Sidama Holy Bible BSE-UBS 262 P 2014